Редакциябыҙ хеҙмәткәрҙәренең кескәй ул һәм ҡыҙҙарын иҫтәлеккә фотоға төшөрөү – Халыҡ-ара балаларҙы яҡлау көнө уңайынан үтәлеп килгән матур йола. Ошондай осрашыуҙарҙан һуң һәр саҡ Сыңғыҙ Айытматовтың “Тормошта бәхетле булыр өсөн аҡһаҡал аҡылы һәм сабый күҙҙәре менән ҡарарға кәрәк” тигән фекеренең хаҡлығына инанабыҙ.
Дүрт йәшлек Әҙилә Әһлиуллина, ҡыҙғылт-һары милли күлдәге менән ҡара камзулын кейеп, барыһынан алдараҡ килеп етте. Ҡыҙыҡай күп йыр һәм шиғыр белә, художестволы гимнастика түңәрәгендә шөғөлләнә, китап уҡырға һәм пианинола уйнарға өйрәнә. Күп һөнәргә эйә Әҙилә үҙен ҙур апай тип хис итә, шуға күрә “һин әле бәләкәс” тигәнгә ныҡ үпкәләй.
Фатима Аҡъюловаға ла тиҙҙән дүрт йәш туласаҡ. “Буласаҡ рәссам” тип йөрөтә уны яҡын­дары, сөнки сәғәттәр буйы һүрәт төшө­рөргә, төҫтәрҙе ҡушып тәжрибәләр үткәрергә әүәҫ. Илгәҙәк ҡыҙсыҡ: “Атай, һин мине ни өсөн яратаһың?” – тип йыш һорарға һәм үҙен маҡтағанды тыңларға ярата.
Тиҫтере Сафия Балтабаева ла ижади ҡарашлы – пластилин, ҡом һәм конструкторҙан төрлө нәмәләр уйлап сығарырға оҫта.
Бер аҙҙан Шамил Хәйруллин күп итеп кәнфит тотоп килеп инде лә барыһын һыйларға тотондо. Ул көн дә балалар баҡсаһындағы дуҫтарына шулай күстәнәс тарата. Йомарт малай тағы әсәһен ҡыуандырырға ярата: тышҡа сыҡҡан һайын тубырсыҡ, матур таш йә бәпембә бүләк итә.
Дүрт йәшлек Нурсолтан Хәсәнов үҙенә һөнәр ҙә һайлап ҡуйған – палеонтолог булырға һәм динозавр һөйәген табырға теләй. “Сәлимә һеңлем “ағай” тип әйтергә өйрәнде”, – тип ҡыуанысын уртаҡлашты малай. Уның йәштәше Эмир Таһиров машиналар менән ҡыҙыҡһына, тиҙерәк рулгә ултырғыһы килә. Апаһы Эльвина быйыл I класты тамамлаған. “Теш табибы булам да балаларҙы илатмайынса дауаларға өйрәнәм”, — тине ҡыҙыҡай.
Биш йәшлек Исламнур Дәүләтбәков бигерәк тиктормаҫ: велосипедта елдерергә, бейергә ярата, каратэ менән шөғөлләнә. Шул уҡ ваҡытта яуаплы ағай булып ҡала белә – өс йәшлек ҡустыһы Искәндәргә күҙ-ҡолаҡ ул. Малайҙар янғын һүндереүсе булырға теләй.
Алты йәшлек Руслан Мосабиров уҡый белә инде. Шау-шыулы уйындар ярата, олатаһы төҙөп биргән майҙансыҡта күп ваҡытын уҙғара.
Ильяс Ҡолбахтин, Вилена Ғимаева һәм Дилә Нуретдинова яңыраҡ ҡына ошо бәлә­кәстәр кеүек шаярып йөрөй ине, ҡайһы арала үҫеп, етдиләнеп киткәндәр! Быйыл II класты тамамланы улар. Ильяс “бишле”гә генә өлгәшә, робототехника түңәрәгенә йөрөй. Дилә киләһе уҡыу йылында өс “дүртле”һен төҙәтеүҙе маҡсат итеп алған. Яҡындары сирләһә – табип, йорт ҡуяндары ауырыһа, ветеринар булырға теләй икән. Вилена – әсәһенең ҙур ярҙамсыһы, бер йәшлек һеңлеһе Сабинаны матур итеп тәрбиәләшә, балалар табибы булғыһы килә.
Сәскәләй сағыу итеп кейенгән кескәйҙәр, фотоға төшөргә тип, һап-һары бәпембәләр түшәлгән паркка йүгерҙе. Шул саҡ респуб­ликабыҙҙа күптәргә таныш йәмәғәт эшмәкәре Альбина Исхаҡова (Кусимова) тап булды. “Тамыр” студияһы әҙерләгән фильмдарҙа өләсәй ролен башҡарған ағинәйҙе балалар шунда уҡ таныны һәм һырып алды.
Еңеү көнө уңайынан “Урал” галереяһында Альбина Хажим ҡыҙының “Мин яратам...” тигән күргәҙмәһе асылғайны, шунда яңы өлгөләр алып китеп бара икән. Үҙенсәлекле күргәҙмәлә оҫта теккән иллегә яҡын селтәр һәм һаҡал, ҡашмау, башҡа төр ҡул эштәре тупланған. Үҙе менән алған милли биҙәүес­тәрҙе балаларға күрһәтергә булғайны, ҡыҙҙар кемуҙарҙан кейеп тә алды.
Альбина Исхаҡова 1938 йылда Әбйәлил районының Асҡар ауылында донъяға килгән. Бөйөк Ватан һуғышы арҡаһында балалар йортонда тәрбиәләнгән, артабан Өфөләге 1-се мәктәп-интернатта уҡыған. Уҡыуҙа ла, спортта ла алдынғы һаналған ул: саңғы, волейбол, еңел атлетиканан разрядтары бар, спорт гимнастикаһы буйынса Башҡортостан һәм Рәсәй чемпионы булған. Өфө нефть инс­титутын (хәҙерге Өфө дәүләт нефть техник университеты) тамамлағас, ире Фәнис Исхаҡов менән СССР-ҙың төрлө төбәктәрендә газ үткәргес трассаларында инженер булып эшләгән, ул һәм ҡыҙ үҫтергәндәр.
Хаҡлы ялға сыҡҡас, Альбина Хажим ҡыҙы күңеле күптән талап иткән шөғөлгә тотонған – һаҡал, селтәр, ҡашмау кеүек милли башҡорт биҙәүестәрен яһай, йәштәргә уларҙы эшләргә өйрәтә, төрлө мәҙәни сараларҙа тағып йөрөргә һәм тергеҙергә саҡыра. Маһир булыуына ҡарамаҫтан, ағинәй әленән-әле төрлө оҫталыҡ дәрестәренә йөрөй, заманса алымдарҙы отоп алырға тырыша, ғөмүмән, тормошҡа балаларса ҡыҙыҡһынып ҡарауы менән һоҡландыра.
– Беҙҙең бала саҡ аяныслы йылдарға тура килде. Кис ятһам да, иртән торһам да, ил-йорт тыныс торһон, һуғыш булмаһын, балала­ры­быҙ имен үҫһен, тип теләйем. Күргәҙмәмде лә Ерҙә тыныслыҡ һәм бәхетле тормош өсөн туғанлыҡ хистәрен, ғаилә усағын һәм быуындар күсәгилешлеген һаҡлауға бағыш­ланым, – тине ағинәй.