Ораны – “Аҡтайлаҡ!”, тамғаһы – һәнәк, ағасы – аҡ өйәңке, ҡошо иһә әтәлге булған ниндәй ырыуҙы беләһегеҙ? Ошо билдәләргә тағы “Батыры – Ҡараһаҡал, ғалимы – Әхмәтзәки Вәлиди” тигәнде лә өҫтәһәк? Әлбиттә, атыбыҙ ҙа, затыбыҙ ҙа, ырыуыбыҙ ҙа – Юрматы беҙҙең.
Ишеткәнһегеҙҙер, 20 майҙа Ишембай районында юрматылар йыйын ойоштора. Торатау буйына аҡ тирмәләр ҡороп, ырыуҙаштарҙы ла, башҡа ырыу вәкилдәрен дә, сит-ят тарафтан килгән ҡунаҡ­тарҙы ла бер ҡорға йыялар.
Ишембай, Стәрлебаш, Стәр­летамаҡ, Федоровка, Мә­ләүез, Ауырғазы, Ғафури, Баҡалы райондарында, Ишем­бай, Стәрлетамаҡ, Салауат, Мәләүез ҡалаларында, Ырымбур өлкәһендә, Татар­с­танда, Венгрияла йәшәгән ырыуҙаштар йыйынының тәү­ге өлөшө иртәнге сәғәт 9-ҙа Ишембай ҡалаһының Мәҙә­ниәт йортонда (Ленин урамы, 23) башлана. Унда ошо көн­дәрҙә райондарҙа булып үткән йыйындарҙа һайланған делегаттар ҡатнаша.
Сәғәт 2-лә иһә ырыуҙаш­тарҙы һәм ҡунаҡтарҙы изге Торатау буйында көтәбеҙ. Торатау буйындағы байрам программаһына 1812 йылғы Ватан һуғышы геройы Ҡаһым Мырҙашев исеменә милли көрәш, Юрматы ере батыры, 1735 – 1740 йылдарҙағы башҡорт ихтилалы етәксеһе, Ҡырым ханлығында һәм Осман империяһында башҡорт илселеге ағзаһы булған Кил­мәк абыҙ Нөрөшев кубогына традицион уҡтан атыу буйынса “Мәргән уҡсы” турниры индерелгән (ярыштарҙа ҡат­нашыу өсөн заявкалар ҡабул итеү бара).
Байрамыбыҙҙы юғарыла барланған райондарҙың тир­мәләре, шәжәрәләр, халыҡ һөнәрмәндәренең эштәре һәм милли ризыҡ күргәҙмәләре биҙәйәсәк. Һәм, әлбиттә, та­нылған сәнғәт әһелдәре, ра­йондарҙың үҙешмәкәр коллективтары ойошторған ҙур концерт программаһы ла ҡуйыласаҡ.
Байрамыбыҙға башҡа ырыу башҡорттары ла рәхим итһен, ә юрматыларға иһә үҙ байрамына бармай ҡалыу хилаф булыр. Яҡты уйҙар, матур теләктәр, асыҡ һәм ихлас күңел менән килегеҙ изге тауыбыҙ эргәһендәге йы­йынға, тип бар тарафҡа саҡырыу ебәрәбеҙ.