Башҡортостан Республикаһы Башлығы ҡарамағындағы Фән һәм техника өлкәһендәге дәүләт премиялары буйынса комиссия (артабан – Комиссия) 31 майға тиклем премияға дәғүә итеү өсөн эштәр ҡабул итә.

Республика Президентының 1998 йылдың 22 декабрендәге “Башҡортостан Республикаһының фән һәм техника өлкәһендәге дәүләт премиялары тураһында”ғы 875-се Указына ярашлы (Башҡортостан Республикаһы Президентының 2013 йылдың февралендәге 22-се Указына, Башҡортостан Республикаһы Башлығының 2015 йылдың 19 февралендәге 31-се, 2016 йылдың 8 декабрендәге 310-сы, 2017 йылдың 25 февралендәге 23-сө указдарына индерелгән үҙгәрештәр менән), республикала тәбиғәт, техник һәм гуманитар фәндәрҙе үҫтереүгә тос өлөш индергән ғилми тикшеренеүҙәрҙең һөҙөмтәләре, иҡтисадтың һәм социаль өлкәнең инновациялы үҫешен тәьмин иткән өр-яңы техника өлгөләрен һәм прогрессив технологиялар эшләгән өсөн ике йылға бер тапҡыр һәр береһе 500-әр мең һумлыҡ өс премия бирелә.
Эштәре уларҙы ҡабул итеү ваҡыты тамамланғанға тиклем кәмендә ике йыл алдан баҫылып сыҡҡан йәки башҡа алым менән халыҡҡа сығарылған кешеләр премияға тәҡдим ителә ала. Шул уҡ ваҡытта эштәр комиссия ҡуйған талаптарға ярашлы рәсмиләштерелергә тейеш.
Премияға дәғүә итеүселәр коллективы биш кешенән артмаҫҡа тейеш. Премияға тәҡдим ителгән башҡа эштең авторҙар коллективына ингән йәки административ йә иһә ойоштороу бурыстарын башҡарған кешеләр улар иҫәбендә була алмай.
Фән, техника, технологиялар йәки инновациялар өлкәһендә дәүләт әһәмиәтендәге башҡа премияға тәҡдим ителгән йәки ошондай премияны алған эш әлеге премияға дәғүә итә алмай. Конкурстан үтмәгән дәғүәсе премияға дүрт йылдан һуң ғына ҡайтанан тәҡдим ителә ала. Ә премия лауреаты иһә конкурста биш йылдан һуң ҡатнашыу мөмкинлегенә эйә.
Комиссияға түбәндәге документтар тәҡдим ителә:
1) кандидатты премияға тәҡдим итеү тураһындағы хат (тәҡдим иткән ойошманың етәксеһе уға ҡул ҡуйырға тейеш);
2) тәҡдим иткән ойошманың һәм башҡа авторҙаштар эшләгән ойошмаларҙың коллегиаль идара итеү органдары ултырышы протоколдарынан өҙөмтәләр, тейешле иҫәп комиссияларының протоколдары;
3) һәр дәғүәсе тураһында мәғлүмәттәр;
4) эштең һүрәтләмәһе;
5) эшкә аннотация;
6) өҫтәмә материалдар.
Документтар Башҡортостандың фән һәм техника өлкәһендәге дәүләт премиялары буйынса комиссия тарафынан эшләнгән өлгөләргә ярашлы рәсмиләштерелергә тейеш. Бөтә документтарҙың һәм өҫтәмә материалдарҙың рус телендә компьютерҙа баҫылыуы һәм заманса әҙәби тел нормаларына тап килеүе шарт.
Премияға тәҡдим ителеүселәрҙең документтары 2017 йылдың 31 майына киске сәғәт 6-ға тиклем Комиссияла (Өфө ҡалаһы, Туҡай урамы, 46, Башҡортостан Республикаһы Башлығы Хакимиәте, 315-се бүлмә) ҡабул ителә. Белешмәләр өсөн телефон: 280-80-93.
Эштәрҙе тәҡдим итеп, документтар тултырыуҙың ошо тәртибен боҙоп рәсмиләштерелгән йәки почта аша ебәрелгән мәғлүмәттәр ҡаралмай.
Ошо хаҡта тулыраҡ мәғлүмәт республика Башлығы сайтында баҫылған.