“Ауыл” һүҙен ишетеү менән әтәстәр ҡысҡырыуы, мал-тыуарҙың көтөүҙән ҡайтыуы, хужаларҙың өй мәшәҡәте менән йүгереүе, әсәйҙең мейестән алынған күпереп бешкән икмәге, хуш еҫле үлән сәйҙәре һәм өҫтәлдә йырлап ултырған самауыр күҙ алдына баҫа. Күңел ҡанатлана ғына түгел, ул бейеклеккә күтәрелеп ошо күренештән ләззәтләнә.
Абҙанда хаҡлы ялдағы ихтирамлы уҡытыусы, мәғариф отличнигы Мәрйәм Ғафарова йортона инеү менән кисерештәр тағы ла күркәмерәк төҫ алды.
Сығышы менән Мәләүез районының Аҡназар ауылынан ул. Урта белем алғас, Салауат педагогия училищеһына уҡырға инә. Артабан белгесте Стәрлебаш районы Аллағыуат ауылына эшкә тәғәйенләйҙәр. Әхирәте Рәшиҙә Ишбаева менән башкөллө хеҙмәткә күмелә. Үҙ һөнәрен еренә еткереп башҡарған йәштәрҙең булдыҡлылығын директор иғтибарһыҙ ҡалдырмай һәм уҡыуҙарын артабан камиллаштырыу маҡсатын ҡуя. 1972 йылда Мәрйәм Ҡылысбаева Стәрлетамаҡ педагогия институтының филология факультеты студенты булып китә. Абҙан егете Хәләф Ғафаров та документтарын ошонда тапшыра. Сибәр ҡыҙҙы оҡшатып, егет йыш ҡына уның янында урала. Бишенсе курсты тамамлағас, өйләнешәләр, ауылға ҡайтып, ғаилә һәм эш йөгөн бергәләп тарта башлайҙар.
Мәрйәм Шәкир ҡыҙы мәктәптә рус теле һәм әҙәбиәтенән уҡыта. Йәшлегенең матур, ҡабат­ланмаҫ мәлдәре бихисап саралар, бәйгеләр, олимпиадалар, байрамдар уҙғарылыуы менән хәтерендә һаман.
– Элек балалар күп ине, 750 уҡыусы барлығы иҫемдә. Кластар араһында ярыштар үткәрҙек. Үҙемдең уҡытыу осоро бай ваҡиғалары менән иҫтәлекле. Ул ваҡытта Нәсиә Хәмиҙулла ҡыҙы Йосопова директор ине. Хеҙмәттәштәрем Фәрүәз Нуретдин ҡыҙы Рәхмәтуллина һәм Мәстүрә Зөлфәр ҡыҙы Яҡшығолова менән бер-беребеҙгә ярҙам­лаштыҡ, балаларға белем биреүҙә көсөбөҙҙө йәлләмәнек. Уларҙың эскерһеҙлеге, итәғәтлелеге һәм эшһөйәрлеге минең өсөн һәр саҡ үрнәк булды. Үҙем пенсияға сыҡҡас та тик ултырманым, яратҡан һөнәрем буйынса 2011 йылға ҡәҙәр мәктәптә ҡайнаным, – ти хеҙмәт ветераны.
Мәрйәм апай сигеү, һырыу эштәренә бик оҫта. Уның маһирлығын стеналағы картиналары раҫлай: береһендә аҡҡоштар йөҙә, икенсеһендә иман нуры сәсеп, мәсет балҡый, өсөнсөһөндә ер еләге бешеп өлгөргән... Тәбиғәттең һоҡланғыс күренештәренә хайран ҡалып, ғәзиздәренә шартына килтереп ойоҡбаш бәйләүенә, хужабикәнең етеҙлегенә һоҡландым.
– Иптәшем менән бер ҡыҙ, ике ул үҫтерҙек. Тик йән яртымдың ғүмере ҡыҫҡа булды шул. Ауыл Советында тир түкте, парторг вазифаһын да үтәне. Балалар һөйөндөрөп тора, ялдарында ҡайтып хәлемде белә. Раушан ҡыҙыбыҙ Башҡорт дәүләт педагогия университетын һәм БАГСУ-ны тамамлап, Мәҙәниәт министрлығында эшләй, Илһам башта Стәрлетамаҡ физкультура техникумында, унан Бөрө физкультура институтында уҡыны, хәҙер Абхазияла — контракт хеҙмәтендә. Баш ҡалалағы Вилдан да хәрби юлды һайланы, ул юридик белемле, икеһе лә – сержант. Оло улым быйыл өйгә газ үткәреште, бындай уңайлыҡ хужалыҡ мәшәҡәтен күпкә еңеләйтте, шөкөр. Буш саҡтарҙа тегенә лә инем, инде бәйләм тотам. Ә бына өҫтәлдәге бәйләнгән сағыу рауза гөлдәрен Йомағужала йәшәгән Дамир энемдең ҡатыны, уңған киленебеҙ Ғәлимә бүләк итте.
Хәрәкәтһеҙ, ҡул ҡаушырып ултырған юҡ, ҡош-ҡорт, башмаҡ бар хужалығымда. Байрамдарҙа иман йортона барам. Күңел төшкәндә китаптар уҡып, рухланып алам, айырыуса Рәми Ғарипов ижады оҡшай, – тип күңел һандығын бушатты әңгәмәсем.
Бишенсе класта ғына әсәйҙән тороп ҡалғанға күрә, балалары өсөн бигерәк йән ата ул, ҡәҙерлеләренең парланышып ҡайтыуҙарын, киләсәктә матур уй-хыялдарының тормошҡа ашыуын теләп йәшәй бөгөн хөрмәтле мөғәллимә Мәрйәм Шәкир ҡыҙы.