Ҡәҙерле атай-әсәйебеҙ Фәниә Сәхәп ҡыҙы менән Миңлехәт Мәүлетйән улы Бикмаевтарҙы бергә йәшәүҙәренә 60 йыл тулыу айҡанлы ҡотлайбыҙ! Бөгөн улар гәүһәр туйҙарын билдәләй. Ошо бер-береһен ихлас һөйгән кешеләр тойғоларын һис ҡасан да юғалтманы. Гәүһәр — ныҡлыҡ һәм бәхет символы.
Атайыбыҙ 1932 йылда Әлшәй районының Түбәнге Әүрез ауылында тыуған. Ул ғаиләлә етенсе, иң кесе, бала булған. Ике йәшендә район үҙәгенә — Раевка эшселәр ҡасабаһына күсенәләр. Һуғыш башланғанда уға ни бары туғыҙ йәш була. Ауыр йылдарҙа бер нисә ғаилә берләшеп, Никифар ауылында йәшәй. Шул осорҙан алып атайыбыҙ колхозда эш башлай, яҡындарына мөмкин тиклем ярҙам итергә тырыша. 1947 йылда фиҙакәр хеҙмәте өсөн “1941—1945 йылдарҙағы Бөйөк Ватан һуғышында намыҫлы хеҙмәте өсөн” миҙалы менән бүләкләнә. 1949 йылда Раевка ит комбинатына эшкә урынлаша. Хаҡлы ялға сыҡҡанға тиклем ошонда төрлө вазифалар башҡара. Коллективта ихлас­лығы, изге күңеллелеге һәм итәғәтлелеге өсөн ихтирам һәм абруй яулай. Оҙаҡ йылдар намыҫлы эшләгәне өсөн Миңлехәт Мәүлетйән улы “Коммунистик хеҙмәт ударнигы” исеменә лайыҡ була, бик күп маҡтау грамоталары, “Хеҙмәт ветераны”, “Бөйөк Ватан һуғышында Еңеүгә 65 йыл” миҙалдары менән бүләкләнә, исеме күп йылдар Почет таҡтаһынан төшмәй.
Әсәйебеҙ 1939 йылда Миәкә районының Ҡырғыҙ-Миәкә ауылында һигеҙ балалы ғаиләлә алтынсы сабый булып донъяға килә. 1957 йылдың мартында әсәйебеҙ менән атайыбыҙ никахын теркәй. Улар өс балаға яҡшы тәрбиә бирҙе. Хәҙер ике ҡыҙҙарының һәм улдарының үҙ ғаиләләре бар. Биш ейән-ейәнсәре — ҙур шатлыҡ­тары.
1959 йылда әсәйебеҙ Раевка үҙәк ашханаһында эш башлай һәм ғүмер буйы шунда эшләй. Фәниә Сәхәп ҡыҙы хеҙмәттәштәре араһында ҙур абруй ҡаҙана, фиҙакәр һәм өлгөлө хеҙмәте өсөн рәхмәт хаттары, маҡтау грамоталары менән бүләкләнә, район Советы депутаты итеп һайлана, профсоюз ойошмаһы рәйесе була. Әсәйебеҙ — Коммунистик хеҙмәт ударнигы, социалистик ярыш еңеүсеһе, III дәрәжә Хеҙмәт даны ордены, “В.И. Лениндың тыуыуына 100 йыл тулыу айҡанлы өлгөлө хеҙмәте өсөн” миҙалы, “Ун беренсе биш йыллыҡ ударнигы” билдәһе менән бүләкләнгән.
Ҡәҙерле атай-әсәйебеҙ! Һеҙҙе ғүмер байрамығыҙ менән ихлас ҡотлайбыҙ! Ғаилә тормошоғоҙ — һөйөү менән берҙәмлектең күркәм өлгөһө ул. Никахығыҙ рухи туғанлыҡҡа әүерелгән. Беҙҙең өсөн һеҙ — изгелек, итәғәтлелек, ҡаһарманлыҡ, наҙ сығанағы. Алты тиҫтә йыл дауамында шатлыҡта ла, ҡыуаныста ла бер-берегеҙгә терәк-таяныс булып, күңел йылығыҙҙы, мөхәббәтегеҙҙе юғалтманығыҙ.
Ҡәҙерлеләребеҙ! Беҙ һеҙҙе бик яратабыҙ, хөрмәт итәбеҙ. Татыулыҡта, һаулыҡта бергә-бергә оҙаҡ йәшәргә насип булһын. Күңелегеҙҙән тыныслыҡ һәм изгелек китмәһен.

Балаларығыҙ Әлфиә һәм Фәрғәт, Рим, Венера һәм Радик,
ейәндәрегеҙ Дамир, Ратмир, Рузана, Зарина һәм Марат.