“Борон-борондан Уралтау буйында батырҙарҙы тыуҙырған, тәрбиәләгән, үҫтергәндәр. Башҡорт ғаиләһендә тыуып үҫкән кешегә иң ыңғай сифаттар хас: илһөйәр, эскерһеҙ, тоғро, аҡыллы, ғорур, ҡыйыу, ябай, кешелекле, мөхәббәтле, моңло, ярҙамсыл... Шулай уҡ был ғаиләлә хупланған һәм тәрбиәләнгән иң күркәм һыҙаттар – егәрле, уҡымышлы, фиҙакәр, яугир, оҫта ҡуллы, тәбиғәт йәнле, бала йәнле булыу. Беҙ ата-бабаларыбыҙға ошондай ғаилә ҡото, ғаилә ҡиммәттәре мираҫ иткән өсөн мең рәхмәт әйтәбеҙ, уларҙың рухы алдында баш эйәбеҙ!”
Ошондай алтын һүҙҙәр менән башланып китте Башҡорт ғаиләһе көнө уңайынан ойошторолған байрам сараһы. Ысынлап та, туған халҡыбыҙҙың көслө булыуы уның ныҡлы ғаиләләренән башлана ла инде. Шуға күрә лә Бөтә донъя башҡорттары ҡоролтайының ҡарары менән 1 март республикабыҙҙа Башҡорт ғаиләһе көнө тип иғлан ителгәс, халыҡ быны берҙәм хупланы. Һәм ҡайһы бер райондар үҙҙәренең иң күркәм, халҡыбыҙҙың ғорурлығы булған иң матур ғаиләләрен сәхнә түрендә күреп ҡыуанды ла инде. Уларға бар тамашасы һоҡланды һәм, әлбиттә, үрнәк алды. Сараны асыу тантанаһына килгәндә, баш ҡалабыҙҙың һәр милли байрамында ғәҙәтләнгәнсә, был сараны ла егеттәр ҡурайҙа башҡорт халыҡ көйө “Урал”ды уйнап асып ебәрҙе. Аяғүрә баҫып гимн тыңлаған тамашасыларҙа, үҙ милләте өсөн ғорурлыҡ, мөхәббәт тойғолары менән бер рәттән, уны ҡурсыу, һаҡлау тәңгәлендәге уйҙары ла яралмай ҡалмағандыр.
Бөгөнгө байрамдың төп ойоштороусыһы, Бөтә донъя башҡорттары ҡоролтайының Башҡарма комитеты рәйесе Әмир Миңләхмәт улы Ишемғолов үҙенең сығышында, һәр йыл ошо көндө милләтебеҙҙең матурлығын, мөхәббәтен, тоғролоғон, ышанысын, әхлаҡи сафлығын һаҡлаған күркәм ғаиләләребеҙгә бағышлап, оло бер фестиваль булараҡ байрам итәсәкбеҙ, тип күңелдәргә өмөт орлоғо һалды.
Байрам уңайынан сәхнә түренән урын алған ғаиләләребеҙ, ысынлап та, бар яҡтан да өлгө булып торҙо. Мәҫәлән, Ишембай ҡалаһынан һигеҙ бала тәрбиәләгән Хафизовтарҙың сығышы күптәрҙе уйландырып, улай ғына ла түгел, иманға, камиллыҡҡа әйҙәгәндер. Ғаилә башлығы Илшат Амур улы үҙе лә, ҡатыны һәм балалары ла дин юлында. Алып барыусыларҙың: “Ир-егетте рухлы итеп тәрбиәләү ниҙән башлана?” тигән һорауына ул: “Рух менән дин бер-береһенә тығыҙ бәйле, кеше күпме динлерәк, тәҡүәлерәк, мәсеткә йөрөһә, намаҙ уҡыһа, ураҙа тотһа, уның шул тиклем рухы ныҡ була. Мәсеткә йөрөгән кеше бер ҡасан да башын эймәй, бер ҡасан да аптырап, юғалып ҡалмай”, – тип яуап бирҙе.
Хәйер, ошондай тағы ла бер нисә ғаиләне сәхнә түренә алҡышлап саҡырҙы тамашасы. Улар араһында Илеш районының Айыу ауылынан Мулләхмәтовтарҙың, Мәсетле районының Һөләймән ауылынан Зәйнетдиновтарҙың, Бөрйән районының Әбделмәмбәт ауылынан Боҫҡоновтарҙың, Әбйәлил районының Асҡар ауылынан Баймырҙиндарҙың, Иглин районының Түбәнге Ләмәҙ ауылынан Хәлитовтарҙың, Баймаҡ районының Буранбай ауылынан Аралбаевтарҙың ғаиләләре бар яҡтан да милләтебеҙгә өлгө булырлыҡ, халҡыбыҙ ихтирамына лайыҡлы.
Ә инде киләсәктә “Матур ғаилә – ил ҡото” йыйыны һәр районда башҡорт ғаиләләрен барлау, яҡлау, ярҙам итеү, өйрәнеү һәм танытыу-танышыу йолаһы булараҡ үтәсәк. Һәр төбәктең аҡһаҡалдары, ил инәләре, етәкселәре, төрлө ғаиләләре ошондай кисәләрҙә ҡатнашасаҡ.