Иртәгә илебеҙ Ватанды һаҡлаусылар көнөн билдәләй. Был иҫтәлекле көн ил тарихында 1918 йылдан – Ҡыҙыл Армияның Германияның кайзер ғәскәрҙәрен еңеү көнөнән билдәләнә. 1946 йылдарҙа был байрам Совет армияһы һәм Хәрби Диңгеҙ флоты көнө тип атала, үҙгәртеп ҡороу осоронда Рәсәй армияһы көнө булараҡ билдәләнә, ә 1995 йылдың 13 мартында Б. Ельцин тарафынан раҫланған “Хәрби дан һәм Рәсәйҙең иҫтәлекле даталары көнө тураһында”ғы Федераль законға ярашлы 23 февраль Ватанды һаҡлаусылар көнө тип иғлан ителә.
Байрам тураһында халыҡ ниндәй фекерҙә һәм кемде ҡотлаясаҡтар тигән һорау менән гәзит уҡыусыларыбыҙға мөрәжәғәт иттек.

Рауил ЗАРИПОВ, пенсионер:
– 23 февраль – тәү сиратта хәрби хеҙмәттәрен үтәгән һәм һуғышта булғандарҙың байрамы. Шуға ла элек-электән был көндө хеҙмәттәштәремде һәм Бөйөк Ватан һуғышында ҡатнашҡан ветерандарҙы ҡотлайым. Мин Венгрияла хеҙмәт иттем. Хәтеремдә, Ҡыҙыл Армия көнөндә командирҙар алдынан парад менән үтеп, честь бирә торғайныҡ. Бөгөн иһә бер нисә элекке хеҙмәттәшемде, ҡустыларҙы, кейәүҙәрҙе тәбрикләйем. Ветерандар, беҙҙең яҡындарыбыҙ, хөрмәткә лайыҡ кешеләр. Байрамда ғына түгел, һәр көндә лә онотмаһаҡ ине уларҙы.
Динислам ҒӨБӘЙҘУЛЛИН, водитель:
– Кемдәр Ватан алдындағы бурысын үтәгән һәм әлеге ваҡытта үтәй, шуларҙың байрамы ул 23 февраль. Ысынлап та, әрменән һуң был байрам нығыраҡ һиҙелә. Был көндә Һауа десанты ғәскәрендә бергә хеҙмәт иткән иптәштәремде, дуҫтарымды ҡотлайым. Үҙемде иһә коллегаларым тәбрик итә, өйҙә кәләшем менән бәләкәй ҡыҙым торт бешереп ҡаршы ала.
Шәһиҙә ЙӘҒӘФӘРОВА, ағинәй:
– Мин үҙем Бөрйән районының Исламбай ауылынан, иптәшем сығышы менән Байназар яғынан. Брәтәк ауылында ғаилә ҡороп, бабайым менән алты ул тәрбиәләп үҫтерҙек. Алты улыбыҙ ҙа, шөкөр, башлы-күҙле. Барыһының да үҙ ғаиләләре бар, өсөшәр бала тәрбиәләйҙәр, ҡайһы береһе үҙҙәре олатай-өләсәй булды. Иптәшем әрмелә өс йыл хеҙмәт иткән. Улдарыбыҙҙың да барыһы ла ил алдындағы бурыстарын намыҫлы үтәне, шөкөр. Беҙҙең өсөн ошо ҙур ғорурлыҡ инде, олоғайған көндә балаларҙың уңыштарына, уларҙың бәхеттәренә һөйөнөп йәшәйбеҙ. Байрам көндө бабайымды, улдарым һәм уларҙың әрме хеҙмәтендә булған улдарын – ейәндәремде ҡотлайым.
Нургөл ҒӘЛИНА, студент:
– Ватанды һаҡлаусылар көнө – ир-егеттәрҙең байрамы. Был көндө һәр ҡатын-ҡыҙ тәү сиратта ир туғандарын һәм яҡын кешеһен, тормош иптәшен ҡотлайҙыр. Әммә беҙҙең байрам тип ир-егеттәрҙең егетлек һанап “байрам итеп” йөрөүҙәре матур күренеш түгел. Ватанды һаҡлаусылар көнө тип аталғас, көслө заттар иң беренсе илен һаҡлаусы, яҡындарын яҡлаусы, ҡайғыртыусы булырға, һәр эш өсөн яуаплы ҡарарға тейеш, минеңсә. Беҙҙең ғаиләбеҙҙә шулай ҡабул ителгән, был көндө ғаиләбеҙ менән күркәм аш өҫтәленә йыйылабыҙ. Байрам көнөндә беҙгә өлгө, терәк булыр атайымды һәм ағайымдарҙы, уҡып та, эшләп тә йөрөгән яратҡан ҡустымды ҡотлайбыҙ.
Азамат, 5 йәш:
– 23 февраль көндө батырҙарҙы ҡотлайбыҙ. Кемдәр ул батырҙар? Минең атайым һымаҡ кешеләр. Көсһөҙҙәрҙе яҡлайҙар, бер нәмәнән дә ҡурҡмайҙар. Мин дә атайым кеүек көслө булырға теләйем.