– Ҡаты ауырығанымды, шәбәйеүгә өмөтөм юғалғанын белгән ауылдаштарым һәр яҡлап ярҙам итә. Аҙыҡ-түлек килтерәләр, аҡса бирәләр. Ҙур рәхмәт барыһына ла! Тик бына туғандарым араһынан берәүҙең балаларыма үҙҙәренә кәрәкмәгән кейемдәрен ташыуына һағайып ҡарайым. Улай яраймы икән һуң, Нурмөхәмәт хәҙрәт? Башҡаның кейеменән насар энергия күсә, тиҙәр бит.
З. Н.
Белорет районы.

Башҡортостан мосолман­дарының Диниә назараты рәйесе мөфтөй Нурмөхәмәт хәҙрәт НИҒМӘТУЛЛИН:
– Бисмилләһир-рахмәнир-рахим!
Донъя – һынау йорто, хөр­мәтле ҡәрҙәштәр. Аллаһ Тәғәлә биргән һәр көнөбөҙ имтихан­дарҙан хасил. Шул уҡ ваҡытта иң ҙур ауырлыҡтарҙы кисергән әҙәм балаһы ябай кеше түгел: бындай йөк пәйғәмбәр­ҙәргә, Раббыбыҙҙың тәрбиәһен, бойо­ро­ғон еткереп тороу бурысын йөкмә­гән­дәр­гә генә һалына. Ҡорамалдарҙа ла бит механизмдың эшендә төп ғәмәлде үтәгән детал­дәр айырым сыныҡтырыла, уларға ныҡлы тикшереү уҙға­ры­ла. Ауыр саҡтарҙа, сирләгәндә до­ға­ларға мөрәжәғәт итһәң, сабыр булһаң, Аллаһ Тәғәлә рәхмәтен насип ҡылыр, иншаллаһ. Миңә әлеге һорауҙы юллаған ҡәрҙәшебеҙгә Раббыбыҙ ҙур ихтыяр көсө, түҙемлек бирһен, ауырыуҙы еңеп сығырға насип итһен. Күңелдәге ышанысты һүндерергә яҙмаһын. Өмөтһөҙлөккә бирелеү гонаһ ул. Бындай хәлгә еткән әҙәм балаһы Аллаһтан ярлыҡау һораһа, тәүбә итһә, әжерен алыр. “Миңә ҡолом бер ҡарыш ынтылһа, уға бер ҡолас яҡын­лармын. Атлап килә башлаһа, ҡаршыһына йүгереп барырмын”, – тиелгән Ҡөрьәндә.
Әл-хәмдү лил-ләһ, халҡыбыҙ ауыр ваҡыттарҙа ҡәрҙәштәрен яңғыҙ ҡалдырмай. Әлеге һорауҙа ла бының матур өлгөһөн күрәбеҙ. Изгелек, мәрхәмәтлек, мохтаждарға булышлыҡ ҡылыу динебеҙҙә юғары урынға ҡуйылған. Сауабы ғәйәт ҙур был ғәмәлдәрҙең. Ихлас күңелдән ярҙам күрһәткән һәр кем Аллаһ Тәғәләнең рәхмәтенә өлгәшһен, иншаллаһ. Сирле кешегә бит ауырыуҙы еңеп сығыу өсөн дарыу ғына түгел, башҡаларҙың иғтибары, йөрәк йылыһы, ҡеүәтләүе, өмөт-ышаныс өҫтәүе, яңғыҙ ҡалдырмауы кәрәк. Изге ғәмәлдәрҙең, яҡшы һүҙҙең көсө шул ҡәҙәр ҙур.
Кейем биреүгә лә шикләнеп ҡарарға кәрәкмәй. Ысын күңелдән күрһәтелгән ярҙамды шундай уҡ ихласлыҡ менән ҡабул ҡылыу зарур. “Насар энергия күсер” тип икеләнеү урынһыҙ. Исламда шик-шөбһәгә бирелеү, кирегә юрау бөтөнләй тыйыла.
“Исраф ҡылмағыҙ” тигән бойороҡ бар “Ҡөрьән Кәрим”дә. Һәр нәмәне үҙ миҡдарында тотона белеү, ҡәҙерен ебәрмәү, һаҡсыл булыу мөһим. Ә бөгөн, хөрмәтле ҡәрҙәштәр, күп нәмәне исраф итәбеҙ. Хатта ки ваҡыттың ҡәҙерен белмәй башланыҡ. Көнө-төнө телевизор ҡарауға һабышҡандар аҙмы ни? Шул уҡ ваҡытта балаларҙы компьютерҙан айырыу ҙур проблемаға әүерелде. Һөҙөмтәлә аҡыл-зиһен артмай, ә ваҡыт елгә оса, һаулыҡ зыян күрә. Кейем мәсьәләһенә килгәндә лә, булғандың ҡәҙерен белеү, исраф итмәү ниәте алға килеп баҫа. Халҡыбыҙҙа борон-борондан ғаиләләр ишле булған. Билдәле, балалар бер-береһенең әйберен кейеп үҫкән. Туҡыма туҙғас та ташланмаған әле: сабыйға йүргәк итеп файҙаланылған, ҡорама юрған, түшәктәр тегелгән һ.б. Кемдер ахирәткә күскән осраҡта уның әйберҙәре туғандарына таратылған, “ҡәрҙәшемдең иҫтәлеге” тип ҡәҙерләп кейелгән. Мөлкәтен исраф итмәү, хәстәрләү, һаҡлау мәрхүмгә изге доға булып бара.
Аллаһ Тәғәлә һәр нәмәне үлсәүле итеп яратҡан. Ә әҙәм балаларының күбеһе тиерлек, ҡыҙғанысҡа ҡаршы, барҙың ҡәҙерен белмәй. “Юҡ, бер нимәгә етешә алмайбыҙ, эш хаҡы аҙ” кеүек зарланыуҙар йыш ишетелә, ә булғанды баһалау, һаҡлау кәрәклеге онотола. Барына шөкөр итәйек, исраф ҡылмайыҡ, хөрмәтле ҡәрҙәштәр. Аллаһ Тәғәлә бер-беребеҙгә ярҙам итеп, мәрхәмәтлек күрһәтеп, булғандың ҡәҙерен белеп, бүлешеп, күңелдәргә ышаныс-өмөт өләшеп йәшәргә насип ҡылһын, иншаллаһ. Әс-сәләмү-ғәләйкүм үә рәхмәтул-лаһи үә бәрәкәтүһ! Амин.