Ғалимдарҙың һуңғы ғилми тикшеренеүҙәре күрһәтеүенсә, кешенең мейеһе 18 йәштә түгел, ә байтаҡ һуңғараҡ тулыһынса формалаша. Уның үҫешеп етеүе 25–30 йәштә генә тамамлана икән. Был хаҡта беҙгә Британия психологы Лаверн Антробус хәбәр итә.
Ошо йәһәттән “формалашыу” тигән төшөнсә нимәне аңлата? Баҡһаң, эш шунда икән: үҫмерҙәрҙең мәғлүмәтте эшкәртеү процесы ололарҙыҡынан ҡырҡа айырыла. Шуға ла үҫмерлек осоронда теге йәки был ваҡиғаларға көтөлмәгән реакция барлыҡҡа килә.
Психологтар өлкәнәйеүҙең өс стадияһын билдәләй: башланғыс осор (12-14 йәштәр), урта стадия (15-17 йәш – иң ҡурҡынысы, был ваҡытта балалар үҙҙәрен раҫ­ларға, олоғайыуҙарын иҫбатларға тырыша) һәм һуңғы (18 йәш һәм унан өлкәнерәктәр). Тикшеренеү­ҙәр күрһәтеүенсә, 25 йәштә лә префронталь ҡабыҡ формалашыуын дауам итә. Ошо процесс тамамланғас ҡына, кеше үҙенең эмоциональ өлгөр­гәнлеген күр­һәтә, ҡылыҡтарын объектив баһа­лай ала, ғүмерен аңлы планлаштыра һәм килеп сыҡҡан пробле­маларҙы аныҡ хәл итә ала. Әйткәндәй, 25-30 йәштәргә ҡарай организмда ваҡыты менән ҡыҙыу­ҙарҙы баш етмәҫлек ҡылыҡҡа этәргән гормональ үҙгәрештәр ҙә тамамлана. Быларҙы иҫбат­лағандай, Британия ғалимдары телевизорға бармаҡ төртә: ҡарағыҙ, йәнәһе, күпме өлкән кеше хәҙер балалар йәнһүрәт­тәрен һәм тапшырыуҙарын мауығып ҡарай, әкиәттәр буйынса эшләнгән уйындар уйнай.
Был йәһәттән башҡа төрлө ҡараштар ҙа бар. Оҙаҡҡа һуҙылған инфантилизм осорон йәштәрҙең социаль яуаплылыҡҡа һуңлап инеүенә лә бәйләйҙәр. Уларға икмәклек аҡса табыу, олоғайған ата-әсәһен ҡарау тураһында, ата-бабаларына ҡара­ғанда һуңлабыраҡ уйланырға тура килә. Борон юғары уҡыу йорттарында инде өлгөргән шәхестәр генә белем алһа, хәҙер килеп уларҙа мәктәп балаларын ғына күрергә мөмкин.