Яңы йыл менән! » Башҡортостан гәзите | Газета Башкортостан на башкирском языке. Архив материалов.

Башҡортостан гәзите » Йәмғиәт » Яңы йыл менән!

Яңы йыл менән! 02.01.2017 // Йәмғиәт

Республика Башлығы Рөстәм Хәмитов Башҡортостан халҡын Яңы 2017 йыл менән ҡотланы.
Унда былай тиелә:
"Ҡәҙерле дуҫтар!
Һеҙҙе етеп килгән Яңы 2017 йыл менән ихлас ҡотлайым!
Яңы йыл байрамы һәр ҡайһыбыҙ өсөн иң элек яҡындарыбыҙ менән аралашыу шатлығы, уларға йылы тойғоларыбыҙҙы еткереү мөмкинлеге йәһәтенән әһәмиәтле. Үтеп барған йылда бергәләп беҙ күп нәмәгә өлгәштек. Республикала тормош яҡшыраҡ, сағыуыраҡ, ҡыҙыҡлыраҡ булһын өсөн тырыштыҡ. Башҡортостан төп эш әүҙемлеге, мәҙәниәт, фән һәм спорт үҙәктәренең береһе булараҡ үҙ урындарын нығытты.
Әлбиттә, ҡыйынлыҡтар ҙа булды. Әммә хеҙмәт һәм ныҡышмалылыҡ һөҙөмтәһендә беҙ алға табан мөһим аҙым яһаныҡ, артабанғы үҫешкә ныҡлы нигеҙ һалдыҡ. Республика алдында киң офоҡтар асыла, бөтә донъя буйынса яңы дуҫтар барлыҡҡа килә. Киләһе йыл ҙур башланғыстар осорона әүерелер, тыуған яғыбыҙ файҙаһына йүнәлтелгән уртаҡ эшебеҙ тирәләй тағы ла нығыраҡ берләштерер, тип ышанам.
Ҡәҙерле ватандаштар!
Беҙ гүзәл илдә, һоҡланғыс республикала йәшәйбеҙ. Халыҡтарыбыҙ араһындағы дуҫлыҡтың ҡәҙерен беләбеҙ, дөйөм тарихыбыҙҙы, күп төрлө мәҙәниәтебеҙҙе һәм йолаларыбыҙҙы ихтирам итәбеҙ. Был – беҙҙең баһалап бөткөһөҙ байлығыбыҙ, көс-ҡеүәтебеҙ һәм буласаҡ ҡаҙаныштарыбыҙҙың нигеҙе. Хөрмәтле дуҫтар, һеҙгә намыҫлы хеҙмәтегеҙ, сабырлығығыҙ һәм оптимизм өсөн ҙур рәхмәт.
Яңы йыл именлек һәм эшегеҙҙә уңыштар килтерһен. Һәр ғаиләнең тормошонда күберәк шатлыҡ-ҡыуаныстар, тотороҡлолоҡ һәм муллыҡ булһын.
Һаулыҡ, бәхет, уңыштар һеҙгә, ҡәҙерле дуҫтар!
Байрам менән! Яңы йыл менән, ҡәҙерле туғандар!"