Әсәләр көнө алдынан республикала ҙур, әһәмиәтле сара булып уҙҙы: баш ҡалала Республика перинаталь үҙәгенең яңы акушер-неонаталь корпусы асылды. Башҡортостанда медицина ярҙамы күрһәтеүҙе яңы кимәлгә күтәргән мөһим сарала Рәсәйҙең һаулыҡ һаҡлау министры Вероника Скворцова, Башҡортостан Башлығы Рөстәм Хәмитов, төҙөлөштөң заказсыһы – “Ростех” дәүләт корпорацияһының генераль директоры Сергей Чемезов ҡатнашты.

– Һуңғы йылдарҙа Башҡортостан әсәлекте, балалыҡты һаҡлау йәһәтенән алға табан гигант аҙымдар эшләне. 2014 йылдан төбәктә сабыйҙарҙың үлеме 20 процентҡа кәмегән һәм әле 5,8-5,9 процент тәшкил итә. Был Рәсәйҙәге уртаса күрһәткестәрҙән түбән. Әсәйҙәргә килгәндә, төбәктә 100 мең бала табыусыға ете үлем осрағы теркәлгән – был да сағыштырмаса аҙ. Республиканың өҫтәмә мөмкинлектәрҙе тормошҡа ашырыу буйынса резервы бик ҙур, яңы перинаталь үҙәк ошоға булышлыҡ итәсәк, – тине Вероника Игоревна, тантананы асып.
Шау-шыулы ҡала үҙәгенән ситтә (бында – урман, һауа ла саф), Аврора урамында урынлашҡан үҙәктең майҙаны – 24,3 мең квадрат метр, 130 пациентҡа иҫәпләнгән. Корпус 2014 йылда Башҡортостанда һаулыҡ һаҡлауҙы үҫтереү программаһы сиктәрендә төҙөлә башлаған. Рәсәй Президенты ҡарары менән, төҙөлөш буйынса заказсы һәм сафҡа индереүсе ролен “Ростех” дәүләт корпо­рацияһы үтәгән. Объекттың проект хаҡы – 2 миллиард һум, шуларҙың 1,5 миллиарды – федераль, 500 миллион һумы республика ҡаҙнаһынан бүленгән. 106 медицина белгесе махсус әҙерлек үткән.
– Үҙәк барлыҡ заман талаптарына яуап бирә, бында Башҡортостандың төрлө төбәктәренән килгән пациенттар юғары квалификациялы медицина ярҙамы аласаҡ, – тине Сергей Чемезов. – Был “Ростех” өсөн генә түгел, бында бала табасаҡ ҡатындар, тыуасаҡ сабыйҙар өсөн дә иҫтәлекле ваҡиға.
Рөстәм Хәмитов перинаталь үҙәктәге йыһаз-ҡоролмаларҙың күп өлөшө Рәсәйҙә етештерелеүен һыҙыҡ өҫтөнә алды.
– Бында йылына 4 – 4,5 мең сабый – илебеҙҙең граждандары донъяға киләсәк. Юл аша ғына 4-се бала табыу йорто урынлашҡан. Унда йылына 7,5 – 8 мең сабый тыуа. Тимәк, ошо бәхетле кварталда йылына 12 – 13 мең бала донъяға ауаз һаласаҡ. Әммә өлгә­шелгәндәр менән туҡтарға йыйынмайбыҙ, яңы объекттар төҙөләсәк. Кардиоүҙәк, онкоүҙәк буйынса пландарыбыҙ бар, был эштәрҙе мотлаҡ башҡарасаҡбыҙ, – тине Рөстәм Зәки улы үҙенең сығышында.
Ҡунаҡтар перинаталь үҙәктең эше менән танышты, Белорет һәм Бөрө райондарынан килгән тәүге пациенттар менән аралашты. Әйт­кәндәй, үҙәктә тәүге сабый 21 ноябрҙә донъя­ға килгән, Ләйсән Вәлинурова өсөнсө тапҡыр әсәй булыу бәхетенә өлгәшкән. “Элекке тәжрибә менән сағыштырғанда, әлбиттә, бындағы мөмкинлектәр күпкә юғары, әсә һәм бала өсөн барлыҡ шарттар булдырылған”, – ти Ләйсән.
Яңы корпус нигеҙендә ҡеүәтле республика телемедицина үҙәге һәм локаль медицина селтәре булдырылған. Ул беренсе һәм икенсе кимәлдәге бала табыу йорттарының эшен берләштереүсе өс кимәлле балалар табыу системаһын координацияларға ярҙам итә, республиканың һәммә төбәгендәге ауырлы ҡатындарҙың һәм донъяға килгән сабыйҙарҙың яҙмышы хаҡында һәр ваҡыт хәбәрҙар булыуҙы нигеҙләй.
Әйткәндәй, Аврора урамындағы перинаталь үҙәкте башҡа бер нәмә менән дә бутау мөмкин түгел – көндөҙ ул үҙенең асыҡ төҫтәге күркәм бинаһы менән ылыҡтырып торһа, төнөн үҙәктең махсус яҡтыртыу системаһы уны тылсымлы һарайға әүерелдерә: ҡыҙыл, күк, аҡ, йәшел төҫтәге мең уттар күҙе ҡамаштыра, йыраҡтан уҡ күренеп, саҡырып тора. Хәйер, перинаталь үҙәк киләсәктә ысынлап та меңәрләгән ғаилә өсөн бәхет йортона әйләнәсәк: улар донъялағы иң ҙур ҡыуанысы – көтөп алған сабыйҙары артынан тап ошонда киләсәк.