Элегерәк һәр урында тиерлек яҡшы дан алған димселәр булған. Ә бына буйҙаҡтар, кейәүгә сыҡмаған ҡыҙҙар һирәк осраған. Бөгөн нимә күрәбеҙ: айырыуса ауылдарҙа ир-ат өйләнә һалып бармай, яңғыҙ ҡыҙҙар ҙа быуа быуырлыҡ. Тәүгеләре, ҡыҙҙар юҡ бит, тип аҡланһа, һуңғылары йүнле егеттәрҙең аҙлығына һылтана. Ғаилә ҡормау, уны тиҙ тарҡатыу йәмғиәттең бер бәләһенә әйләнеп бара. Димсе тигән бик тә кәрәкле “һөнәр”ҙе ҡайтанан тергеҙеү талап ителә түгелме?
Замана яңғыҙаҡтары проблемаларына битараф булмағандар бар ул бөгөн. Шундайҙарҙың береһе – Белоретта йәшәгән Айгөл Ниғмәтуллина. Ул ойошторған “Аулаҡ өй” клубы биш йыл эсендә 260-ҡа яҡын парҙы ҡауыштырып, никахлы иткән. Димсе Көньяҡ Урал райондарында әүҙем эшләй, хатта Ғафуриҙан, Силәбе өлкәһенең Магнитогорск ҡалаһынан да клуб эшенә ҡыҙыҡһыныу белдереп, ҡушылыусылар бар икән. “Беҙҙең клуб үткәргән сараларҙа танышып ҡауышыусыларҙың туйҙарында ҡатнашабыҙ, һәр 50-се парға алтын балдаҡ та алып бирәбеҙ. Хәҙер һәр 25-се парға бүләк итергә уйлап торабыҙ. Бәпес туйҙары үткәрәбеҙ. Теләгебеҙ – яңғыҙаҡтар кәмеһен, өлгөлө ғаиләләр артһын, халҡыбыҙ ишәйһен. Киләһе йылдың 14 февралендә беҙҙең “Аулаҡ өй”гә биш йыл була. 300-ләп кисә үткәрҙек, Аллаға шөкөр, парһыҙҙарға ярҙам итеү йәһәтенән эшебеҙ алға бара”, – ти Айгөл Ниғмәтуллина. Бөтә донъя башҡорттары ҡоролтайы башланғысы менән булдырылған “Башҡорт ғаиләһе” ассоциацияһы етәксеһе итеп тә һайланды ул. Кешегә уңышлы булыу өсөн нимә кәрәк, тигән һорауҙы ла бирҙек Башҡортостандың иң шәп димсеһенә. Түбәндә уның яуаптары.
Кешелекле булыу
– Минең өсөн был сифат бик мөһим, сөнки заманыбыҙ ғәйеплеме икән, кеше бер аҙ тупаҫланды, ихлас аралашыу һирәгәйҙе, бер-береһенә былай ғына, бушлай ярҙам итергә бик атлығып та тормайҙар. Айырыуса ҡалала хатта күршеләрен белмәүселәр бар. Яман кешеләр күбәйгән һымаҡ. Ниндәй генә хәлдә лә кешелекле булып ҡалыу мотлаҡ.
Насар ғәҙәттәрҙән баш тартыу
– Эскелек бер ҡасан да яҡшыға килтермәй. Уның аҙағы фажиғә менән тамамланыуы ихтимал. Һуңғы ваҡытта ҡатын-ҡыҙҙарҙың тәмәкегә ылығыуы эсемде бошора. Балалар күреп үҫә бит. Эсеү-тартыу – киләһе быуынға битараф булыу ул. Насар ғәҙәттәрҙе ташлағыҙ һәм үҙегеҙгә еңеллек килеүен аңларһығыҙ, тип әйткем килә.
Ялҡауланмау
– Эш юҡ тиеүселәргә мин ышанып етмәйем. Һәр ерҙә эш табырға була. Тырышлыҡ, ынтылыш, маҡсат кәрәк. Ялҡаулыҡтан ҡотолорға кәрәк. Һис юғында ауылда ҡош-ҡорт аҫрап та килем алырға мөмкин.
Ғаиләңде күҙ ҡараһы кеүек һаҡлау
– Бөгөн ата-әсәле була тороп та, етем иҫәпләнгән балалар күп. Ниңә? Сәбәбе – әлеге лә баяғы эскелек. Минең уйымса, ауылдарҙа айыҡ тормош булһа, халҡыбыҙ бөтөнләй икенсе төрлө йәшәр ине. Ғаиләләр тарҡалмаҫ, балалар атайһыҙ йә әсәйһеҙ ҡалмаҫ ине.
Көнсөллөктән ҡотолоу
– Шундай күренеш йыш осрай: мул, етеш, уңышлы йәшәгән кешене күрә алмайҙар. Көнсөллөктән был. Һөҙөмтәлә көнсөл кеше бер нисек тә уңышлы була алмай. Татыу йәшәргә, матур уйлы булырға кәрәк. Иң ҙур теләгем – халыҡ эсмәһен һәм дуҫ булһын. Бергә беҙ әллә ниндәй ҙур эштәр атҡара алабыҙ.