Ҡояш янында — йылылыҡ, әсә янында — изгелек, ти халыҡ мәҡәле. Күп балалы ғаиләләрҙә әсә наҙына, иғтибарына төрөнөп үҫкән, тәүфиҡлы, рухлы сабыйҙарҙың булыуы һөйөндөрә.
Республика Хөкүмәте йортонда күп балалы әсә­ләрҙе тәбрикләү тантанаһы үтте. Башҡортостан Хөкү­мәте Премьер-министры урын­баҫары Салауат Сәғи­тов биш һәм унан да күберәк бала тәрбиәләгән ҡатын-ҡыҙға “Әсәлек даны” миҙалын тапшырҙы.
— Ошо матур иртәлә беҙ иле­беҙҙең ихтирамға лайыҡ оло йө­рәкле кешеләрен бергә туплаған ҙур һәм ябай, матур сараға йы­йылғанбыҙ. Был тантана беҙҙең һәм һеҙҙең өсөн икеләтә ҡыуа­ныслы, сөнки тиҙҙән илебеҙ Әсә көнөн билдәләй. Ошо уңай менән һеҙҙе республика етәксе­леге исеменән ихлас күңел­дән ҡот­ла­йым. Яҡты килә­сәктә йөрәгегеҙҙән сыҡҡан йылылыҡ балаларығыҙҙың иғтибар-хөрмәте, улар өл­гәш­кән уңыштар, рәхмәт һүҙҙәре булып үҙегеҙгә әйләнеп ҡайтһын, – тине Салауат Тәлғәт улы, ҙур ҡыуаныс менән тәбрикләү һүҙҙәрен еткереп.
Был күркәм сара 1998 йылдан алып үткәрелә. Ошо ваҡыт ара­уығында күп бала тәрбиәләгән ете меңгә яҡын гүзәл зат дәүләт наг­радаһына лайыҡ булған. Респуб­ликабыҙҙың ҡала һәм райондарынан килгән ҡатын-ҡыҙҙар ара­һын­да ауыл хужалығы, һаулыҡ һаҡлау, мәғариф һәм мәҙәниәт хеҙмәткәрҙәре бар, хужабикәләр һәм шәхси эшҡыуарҙар күп.
Тантана залында булған әсәләр Башҡортостан Башлығы ҡотлауын тыңлай, бер аҙ тулҡынланыу һәм шатлыҡ хистәре менән рәхмәт һүҙҙәрен еткерә. Уларҙың йөҙҙә­рендә иңгә алған оло яуаплылыҡ той­ғоһо менән бергә әсә булыу бәхетенән һәм бөгөнгө байрамдан кисергән ҡыуаныс сатҡы­лары ла сағыла. Бала тапҡан түгел, баҡҡан әсә тигәндәй, гүзәл зат иңенә төшкән балаға ғүмер бүләк итеү тәҡдире менән бергә уны бағыу, уға аҡыл-зиһен, матур тәрбиә биреү, ҡотло туған телгә өйрәтеү күпме йән сабырлығы, йоҡоһоҙ төн­дәр, оло йөрәк талап итә.
Бөрйән районынан кил­гән Са­жи­ҙә Билалова биш балаға – Илнар, Илсур, Саръян, Cәлим һәм Ибра­һим исемле батыр булып үҫер улдарға ғүмер биргән. Тормош иптәше менән Кил­деғол ауылында матур итеп донъя көтәләр. Күп балалы йүнсел ғаилә, эштә­рендә ҡыҫҡартыуға эләккәс, зар­ланып тормай, үҙҙәре­нең шәхси эшен асып ебәргән.
Әлеге ваҡытта бишенсе бала­һын бағып ялда ултыр­ған Гөлфиә Иҫәнғәлиева – Хәйбулла районынан. “Ғаи­ләлә балаларыбыҙҙы ир­кәләп-наҙлап, етеш тәрбиә биреп, кешенән кәм-хур булмаҫлыҡ итеп үҫтерергә тырышабыҙ. Балалар — беҙҙең ҡыуанысыбыҙ ҙа, ғорурлығыбыҙ ҙа”, — ти ул.
Туймазы районынан Римма Муллағәлиева оло шатлыҡ менән рәхмәт һүҙ­ҙә­рен еткерҙе: “Беҙҙе шулай ҡәҙерләгән республика Хөкү­мәтенә, етәксебеҙ Рөстәм Зәки улына рәхмәт. Киләсәктә бала­ларыбыҙҙы һау-сәләмәт һәм иле­беҙгә кәрәкле кешеләр итеп үҫтерергә тырышырбыҙ”.
Ҡатын-ҡыҙға бирелгән иң оло бәхет, иң ҙур шат­лыҡ әсә булыу­ҙыр, моға­йын. Сабыйҙарының һау­лығы, рухи үҫеше хаҡында даими хәстәрлек күргән әсәләр ихтирамға һәм данлы исемдәргә лайыҡ. Ил-йорт именлеген ҡайғыртҡан ир-егеттәр­гә иңдәш булыр оло йөрәк­ле, бала йәнле әсәләр, бәхетле сабыйҙар тауышынан нурға тулған ҡотло ғаиләләр барында илебеҙ ырыҫлы булыр.