Мәктәпте тамамлағанда киләсәктә ниндәй һөнәр эйәһе булыуын аныҡ күҙ алдына килтергән үҫмер һирәктер. Әлбиттә, балаға күпселек осраҡта был мәсьәләлә ата-әсәһе булышлыҡ итә. Ә ярҙам ҡулы һуҙырҙай яҡындарың булмаһа...

Киләсәк тормошоңда һайланған һөнәр­ҙең әһәмиәте баһалап бөткөһөҙ ҙур. Яңылышманың икән, тимәк, иртән ҡәнәғәт­лек тойғоһо кисереп эшкә киләһең, ай һайын алған эш хаҡыңдан ризаһың икән, күңел дә көр, ғаиләңде лә тейешле кимәлдә ҡарай алаһың.
Тормошта киреһенсә лә булыуы ихтимал. Һөнәр һайлауҙа яңылышҡандар, тормошта үҙ урынын таба алмағандар аҙашып ҡалыуы ла ихтимал. Үҫмер­ҙәр­ҙе был юлдан нисек йолоп алып ҡалырға? Әлбиттә, үҙ ваҡытында һәләт­тәрен үҫтерергә, кәрәк­ле йүнәлеш бирергә, кәңәштән өҙмәҫкә.
Өфө ҡалаһындағы республика социаль приютында был йәһәттән эш киң йәйел­дерелгән: билдәле кешеләр менән осрашыуҙар йыш үткәрелә, балаларҙың һәләттәрен асыу өсөн төрлө түңәрәктәргә йөрөтәләр, башҡа алымдар ҙа ҡулланалар. Мәҫәлән, күптән түгел бында “Генетик тест” компанияһы вәкилдәре Аида Галиванова менән Гөлсинә Ҡунаҡҡужина булды. Белгестәр бармаҡ эҙҙәре ярҙамында баланың ниндәй өлкәлә һәләте барлығын, киләсәктә ниндәй һөнәр һайлаһа, уңышҡа өлгәшәсәген һөйләне, хатта кемгә ниндәй спорт төрө тура килгәнен әйтте.
Был приютта 16 йәшкә тиклемге балалар артабанғы яҙмыштарының хәл ителеүен көтә. Мәктәптә белем алалар, төрлө түңәрәктәрҙә шөғөлләнәләр. Кеше килгәнде ярата улар. Шунда уҡ уратып алып, төрлө һорау яуҙырҙылар.
Һөнәр тураһында һүҙ сыҡҡас, аралашыу тағы ла йәнләнде. Ҡыҙҙарҙың күбеһе киләсәктә табип йә ашнаҡсы итеп күрә үҙҙәрен. Араларында бейеүсе, тәрбиәсе булырға теләүселәр ҙә бар. Малайҙар, әлбиттә, ҡыҙҙар кеүек оҙон-оҙаҡ һүҙ сурытмай, ерҙән сабыр ғына атлап йөрөй. Һөнәрҙе лә күптән һайлап ҡуйғандар: шофер, электрик, полицейский.
Балалар араһында иң бәләкәсе – Богдан. Зәңгәр күҙле, иркә генә малай. Өлкәнерәк ҡыҙҙарҙың алдынан төшмәй, йә береһенә, йә икенсеһенә һырыла. Уның киләсәккә яҡты өмөттәре күҙҙәрендә сағыла. Бәләкәс кенә килеш иңендә ниндәй ауыр һынау – атай-әсәйһеҙ үҫеү, аяҡҡа баҫыу – ятҡанын ул әле аңлап етмәй. Шулай ҙа телсән малайҙың яуабы хайран ҡалдырҙы: “Минең һәйбәт кеше булғым килә... ”