Федераль суд приставтары хеҙмәте – суд эшмәкәрлегендә билдәләнгән тәртипте тәьмин итеү, суд акттарын, башҡа органдарҙың һәм вазифалы кешеләрҙең акттарын үтәү буйынса, шулай уҡ хоҡуҡ ҡулланыу функцияларын башҡарған федераль башҡарма власть
органы. Уның Башҡортостан Республикаһы буйынса идаралығында билдәләүҙәренсә, быуат ярым ваҡыт эсендә хеҙмәттең үҙ тарихы,
йолалары барлыҡҡа килгән. Идаралыҡтың шәхси составы ғорурланырлыҡ геройҙары ла байтаҡ.
Суд приставтары көнө айҡанлы, идаралыҡҡа яңы эшкә ҡабул ителгән 100-гә яҡын хеҙмәткәр дәүләт һәм хеҙмәт алдында тоғролоҡҡа ант бирҙе. Матур йолаға әүерелгән тантанала ветерандар ҙа ҡатнашты.
Республика буйынса баш пристав вазифаһын ваҡыт­лыса башҡарған Луиза Колошеина, тантанаға йыйыл­ған­дарҙы тәбрикләп, эшкә яңы ҡабул ителгәндәрҙе намыҫлы хеҙмәт итергә саҡырҙы, һөнәри бурысҡа яуаплы ҡарарға өндәне. Башҡортостандың төрлө райондарында хеҙмәт иткән суд приставтарына был юлы юғары наградалар тапшыр­ҙылар. Бүләккә лайыҡ бул­ған һәр хеҙмәткәрҙән йәштәр өлгө алып эшләрлек.
Әйткәндәй, идаралыҡта яңыраҡ эш башлаған суд приставтары араһында әҙер­лекле белгестәр байтаҡ. Әлегә тәжрибә етерлек туп­ланмағас, уларҙы наградаға тәҡдим итеү мөмкин түгел. Ә бына тантаналы сараға ата-әсәләрен саҡырып тәб­рикләү – идаралыҡтың тағы бер матур йолаларының береһе. Был юлы Альбина Кугубаева менән Регина Әхмәҙуллиналарҙың әсәлә­ре Асия Малик ҡыҙына һәм Лидия Әҙип ҡыҙына Рәсәй­ҙең баш суд приставы Артур Парфенчиков исеменән рәх­мәт хаттары тапшырылды.
Тантанала ант биргән йәштәрҙең береһе олпат­лығы менән айырылып тор­ғанға, саранан һуң эргәһенә бар­ҙым. Рафаил Рафиҡов идаралыҡтың Мәләүез ҡалаһы һәм районы буйынса бүлегендә өлкән суд приставы булып ҡайтанан тәғәйенләнгән икән. Хеҙмәт юлын 2002 йылда башлаған егетте икен­се урынға етәксе вазифаға саҡы­ралар. Ун йылдан иһә Рафаил Рәйес улы ҡайтанан суд приставтары хеҙмәтенә килергә була.
– Әлбиттә, бынан тиҫтә йылдан ашыу элек биргән ант менән бөгөнгө аманат һүҙҙәре араһында айырма ҙур. Анттың һүҙҙәре үҙгәр­мәгән, ә олпат­лан­ғас әйтел­гәндең мәғәнәһе шаҡтай айырыла, – ти ул.
Суд приставтарының эш күләме йылдан-йыл арта. Федераль суд приставтары хеҙмәтенең Башҡортостан Республикаһы буйынса идаралығы – бюджеттың килем өлөшөн тулылан­дырған субъект. Йыл башынан рес­публиканың суд приставтары тарафынан бөтәһе һигеҙ миллиард һум аҡса йыйыл­ған, ҡаҙна иҫәбенә иһә ике миллиард туғыҙ миллион һум аҡса күсерелгән. Әлеге мәлдә суд приставтарында яҡынса 1,8 миллион баш­ҡарыу ҡағыҙы бар. 609 мең дәғүәсенең мөрәжәғәтен тулы кимәлдә үтәгәндәр. Алимент түләү мәсьәләһенә айырыуса иғтибарлылар, сөнки һәр эш артында – бала, ғаилә яҙмышы. Һуңғы туғыҙ айҙа ошондай “кәкүк” ата-әсәләргә ҡарата 1 148 енәйәт эше ҡуҙғатылған. Шуны ла билдәләп үтке килә: суд приставтарының алимент мәсьәләһен тәүге урынға ҡуйып эш итеүе һөҙөмтә бирә.