Республикала йорттарға газ үткәреү, социаль объекттарҙы автономлы “зәңгәр яғыулыҡ”ҡа күсереү дауам итә. Сибай ҡалаһында урынлашҡан “Универсал” яуаплылығы сикләнгән йәмғиәт төбәктәге бер нисә районда газ үткәреүҙә ҙур өлөш индерә. 2006 йылда ойошторолған предприятиела бөгөн 50 кеше эшләй. Уның етәксеһе Ишкилде Ғафаров юғары һөнәри оҫталыҡҡа эйә ҙур, татыу коллектив туплай алған.

Бөгөн бында дөйөм эшкә тоғро, тәжрибәле һөнәрмәндәр хеҙмәт итә. “Баш инженер Игорь Лямцев, мастерҙар Сәлимйән Мортазин, Самат Төхвәтуллин, келәт мөдире Кинйәбикә Баянова, слесарҙар Илнур Сөләймәнов, Йосоп Буранбаев, иретеп йәбештереүсе Михаил Юрин фиҙакәр хеҙмәте менән ҙур абруй яуланы”, – тип телгә алды етәксе. Әйткәндәй, уның улы менән ҡыҙы ла, атай һөнәрен дауам итеп, ошо ойошмала эшләй.
Баймаҡ районының Йәнйегет ауылында тыуып үҫкән ябай ауыл малайына тормош аҡ балаҫтар ғына йәйеп ҡуймай. Бары тик үҙенең тырышлығы, зиһене менән юл яра. Сибай педагогия училищеһын тамамлап, хәрби хеҙмәттә бурысын үтәгәндән һуң, Сибайҙа төҙөлөш ойошмаһында мастер булып эш башлай. Үҙен эшлекле, белемле итеп таныта. Газ үткәреү, төҙөлөш өлкәһендә байтаҡ тәжрибә туплаған егет үҙенең эшен асыуға өлгөрөп еткәнен аңлай һәм отолмай.
Бына ун йыл инде предприятие ҙур күләмдә заказдар башҡара, йылдан-йыл эшмәкәрлек даирәһе киңәйә. Инженер селтәрҙәрен, йылылыҡ системаһын, газ ҡаҙанлыҡтарын проектлау, төҙөү һәм артабан хеҙмәт­лән­дереү менән бергә һуңғы йылдар­ҙа торлаҡ йорттарҙы, социаль әһәмиәтле объекттарҙы ремонтлауҙы ла үҙ өҫтәренә алғандар. Быйыл Сибай ҡалаһында биш ҡатлы йорттоң ҡыйығын яңырталар, Баймаҡ районының Богачевка, Күлтабан, Бикеш, Байыш ауылдарында йорттарҙа газ үткәреү менән шөғөлләнәләр.
Халыҡ та урындағы белгестәрҙең сифатлы эшенән ҡәнәғәт. Заказдарҙы ваҡытында үтәү өсөн предприятие­ның техник мөмкинлектәре етерлек. Мәктәптәрҙең автономлы газ ҡаҙанлыҡтарын хеҙмәтләндереү һәр саҡ юғары кимәлдә ҡала, БР-ҙың Төҙөлөш һәм архитектура буйынса дәүләт комитетының, Сибай ҡалаһы, Баймаҡ, Йылайыр, Хәйбулла райондары хакимиәттәре етәкселегенең рәхмәт хаттары, Маҡтау ҡағыҙҙары тапшырыу, “Баймаҡ районының почетлы гражданы” тигән маҡтаулы исем биреү тап ошоно дәлилләй ҙә инде.
...Рухлы милләттәшебеҙ шәфҡәт­лелек күрһәтеү өлгөһө булараҡ та киң билдәле. Шәжәрә байрамдары, “Һаумыһығыҙ, ауылдаштар!” булһын­мы – бағыусылыҡ ярҙамы күрһәтеп тора. Бына әле лә Баймаҡ ҡала­һының “Труд” стадионына газ үткә­рергә вәғәҙә биргәндәр. Тыуған ауылы халҡы күптән инде “зәңгәр яғыулыҡ” рәхәтен күрә, улар Ишкилде Фазулла улына рәхмәтле. Йәнйегет ауылына быйыл 200 йыл тулыу хөрмәтенә мәсет сафҡа инде, урамдар төҙөкләндерелде. Ҡәҙерле улының изгелекле ғәмәлдәренә һөйөнөп, уның ҡәҙер-хөрмәтендә әсәһе Сәхипьямал инәй 93 йәшкә тиклем йәшәне.
Ысынлап та, төбәктең иҡтисадына ҙур өлөш индергән, социаль тормошонда әүҙем ҡатнашҡан Ишкилде Ғафаровтың фиҙакәр һәм илһамлы эшмәкәрлеге юғары баһаға лайыҡ.