Зөһрә менән Кәбир Бай­мыр­ҙиндарҙы Хәйбулла райо­нында сәләмәт тормош алып барған, спорт менән дуҫ ғаилә булараҡ яҡшы белә­ләр. Биш бала үҫтергән ғаиләлә бәләкәй саҡтан спортҡа ҡарата һөйөү тәр­биәләнә: һәр береһе үҙенә оҡшаған күнекмәләр яһай, кемдер йүгерә, икенселәре көрәш менән шөғөлләнә. Быларҙың барыһын да ғаилә башлығы Кәбир Баймырҙа улы шәхсән күҙә­теп бара, кәңәштәрен бирә.

Әйткәндәй, ул үҙе оҙаҡ йылдар Байғусҡар ауылында физкультура уҡытыусыһы булып эшләй, көрәш түңәрәген алып бара. Мәктәп башланғыс класҡа ҡалыу сәбәпле, әле күрше Татыр-Үҙәк урта мәктәбенә йөрөп эшләргә мәжбүр. Йортонда спорт күнекмәләре өсөн махсус урын йыһазландырылған, унда әлегә күберәк бәләкәс Таһир шөғөлләнә, Шәйнур менән Ғәлинур Сибай интернат-гимназияһында белем ала, өлкән ҡыҙҙарының үҙ ғаиләһе бар, уртансылары Фаягөл иһә медицина институтында уҡый.
Быйылғы йыл Баймырҙиндар өсөн ҡыуаныслы булды. Көрәшсе Шәйнур, Ҡазан ҡалаһында Бөтә Рәсәй беренселегендә ҡатнашып, Рәсәй чемпионы булды. Иң йәш чемпион – Хәйбулланан тәүгеләр­ҙән булып милли көрәш буйынса Башҡортостан йыйылма команда­һына эләккән Рәсәй кимәлендә еңеү яулаған батыр. Ағаһының юлын ҡустыһы Ғәлинур ҙа дауам итә, киләсәктә ул да чемпион булмаҫ тимә.
– Спортта ялҡауланырға урын юҡ, – ти тренер Кәрим Баймырҙа улы. – Бер-ике көн үҙеңә бер аҙ һәлкәүләнергә мөмкинлек бирһәң, юғалтҡанды ҡыуып етер өсөн аҙна буйы шөғөлләнеү талап ителә. Ана, күрәһегеҙ бит, өйҙә лә, урамда ла турниктар, төрлө күнекмәләр өсөн уңайлы шарттар булдырылған. Малайҙарым ингәндә лә, сыҡҡанда ла турникта әйләнә, һикерә, ырғый. Тәү ҡарашҡа ябай күренгән әйбер­ҙәрҙән спортҡа тәүге ынтылыш, еңеүгә нигеҙ һалына. Күптәр махсус спорт залында төрлө заманса тренажер ярҙамында шөғөлләнгәндә генә оло еңеүҙәр яуларға була тип тәрән яңылыша. Иң мөһиме – маҡ­сат ҡуя бел. Шул сағында еңеүҙәр ҙә, миҙалдар ҙа булыр.
Зөһрә Ғәлиән ҡыҙы сығышы ме­нән Шишмә районынан. Дала яҡта­рына килен булып төшөүенә һис тә үкенмәй. Йәшелсә үҫтереп, ҡош-ҡорт аҫрап, ишле һыйыр һауып, уның ағын һатып, ғаилә ҡаҙнаһын тулыландыра. “Спорт менән шөғөл­ләнгән батырҙарыма туҡлыҡлы, файҙалы ризыҡтар әҙерләргә тырышам, уларҙың һаулығын ҡай­ғыртам”, – тип йылмая бәхетле әсә.
Бына шундай матур һәм сәләмәт тормош алып барған ғаилә йәшәй Хәйбулла тарафтарында. Ағала­рының үксәһенә баҫып килгән Таһир ҙа “көрәштә еңәсәкмен, һабантуйҙарҙа һарыҡ аласаҡмын” ти. Кем белә, Рәсәй чемпионы тәрбиәләнгән ғаилә менән йәнә осрашырға тура килер әле, тигән өмөт менән ҡайтыр юлға сыҡтыҡ.