27 сентябрҙә республикала “Театр төнө” үтәсәк. Яңы ижад миҙгеле алдынан изге йолаға әүерелгән осрашыу был юлы ла мәҙәни сараларға бай булмаҡсы.

Тамашасылар өсөн театрлаш­ты­рыл­ған күренештәр, оҫталыҡ дәрестәре ҡаралған. Теләге булған һәр кем Рәсәй киноһы йылының “ҡыҙыл келәм”дәренә, урам театрҙары уйындарына баһа биреп, клип төшөрөүҙә ҡатнаша ала. Театр һөйгән кескәйҙәрҙе әкиәттәр һәм анимация программалары көтә.
Акцияға Өфө, Стәрлетамаҡ, Салауат, Сибай һәм Туймазы ҡала­ларынан 20-нән ашыу коллектив йәлеп ителгән. Быйыл ойоштороусылар бер нисә тематик маршрут тәҡдим итә. Улар бер кистә бер нисә майҙансыҡта булырға мөмкинлек бирә. Тама­шасылар иғтибарына шулай уҡ “Яратҡан үҙәк” (йәйәүле маршрут), “Балалар ҡалаһы” (кескәйҙәр өсөн), “Ҙур ҡала” (Рус дра­ма театрынан Башҡорт драма театрына тиклем), “Колорит” (башҡорт һәм татар телдәрендәге спектаклдәр) маршруттары ҡаралған.
“Яратҡан үҙәк” тип аталған йәйәүле экскурсиянан тыш, бөтә маршруттарҙа ла бушлай автобустар йөрөйәсәк. Тулыраҡ мәғлүмәт thnight.ru сайтында бирелгән.