Совет заманында машина “баранка”һын тотҡан ҡатын-ҡыҙ һирәк булғандыр, моғайын. Ә бына һуғыш осорон сағылдырған кинофильмдарҙа йоҡоло күҙҙәрен ыуалай-ыуалай һәр саҡ юлда йөрөгән шофер ҡатын-ҡыҙҙарҙы ғына күрә инек. Геройым Әбйәлил районы һылыуы Сулпан Зәйнетдинова ла совет дәүерендә сыныҡҡан.

2015 йылда ташҡа баҫылған Әбйәлил районының энциклопедияһында уның тураһында бай мәғлүмәт бирелгән. 1976 йылда – “Социалистик ярышта еңеүсе” билдәһе, 1977 йылда – “Хеҙмәттәге батырлығы өсөн” миҙалы, 1982 йылда өсөнсө дәрәжә “Хеҙмәт даны” ордены менән наградланыуы шуны дәлилләй. Был – бик ҙур баһа, ул йыл әйләнәһенә ирҙәр генә күтәрә торған ауыр хеҙмәтте башҡарған ҡатын-ҡыҙҙың тырышлығы, намыҫлылығы, фиҙакәрлеге тураһында һөйләй. Кем һуң ул нескә күңелле, мазут-майға буялырмын тип ирҙәр эшенән ҡурҡмаған шофер ҡатын-ҡыҙ?
35 йыл хеҙмәт стажлы, дүрт ҡыҙға ҡәҙерле әсәй, иренә хөрмәтле тормош юлдашы, эшендә лә, өйөндә лә уңған ҡатын-ҡыҙ Сулпан Зәйнетдинова сығышы менән Асҡар ауылынан. 1966 йылда урта мәктәпте тамамлай. 1968 йылдың көҙөндә иһә Өфө ҡалаһы янында Яңы Александровка ҡасабаһына шоферҙар әҙерләү курсына уҡырға китә. Унан һуң уны “Башкирстройтранс” тресының 8-се автобазаһына водитель итеп алалар, артабан Учалы районына эшкә ебәрәләр.
— Апрель айында үҙебеҙҙең район хакимиәтенең йәштәр бүлеген етәкләгән Рафиҡ ағай Ғибәҙәтовҡа килдем. Мине шунда уҡ “Сельхозтехника” йәмғиәтенә эшкә алдылар. Ул осорҙа илдә ҡалдау ерҙәрҙе үҙләштереү әүҙем бара ине. Будкалы машинала район үҙәгенән эшселәрҙе Әбйәлил районы буйлап ташыным, — ти ул.
Сулпан йондоҙо менән бергә тороп ул ваҡыттағы соҡорло-батҡаҡлы юлдарҙа йөк машинаһында игенен дә, ағасын да, ҡыр­сынташын да ташый, барыһына ла өлгөрә. Ниндәй генә транспорт төрҙәрен ауыҙлыҡла­май ул: үҙбушатҡысмы, бензовозмы, бортлы­һымы, будкалыһымы — һәммәһен дә үҙләш­терә. Ремонтлау эшен дә үҙе башҡара.
– Көнөн-төнөн юлда булғанһығыҙ. Мажараға тарыманығыҙмы? Ауырлыҡты нисек еңдегеҙ? – тип ҡыҙыҡһындым.
– Әлбиттә, еңел булманы. Төрлө хәлдәргә тарыным. Бер мәл өс йәшлек ҡыҙымды Магнитогорск ҡалаһынан барып алдым да, яныма ултыртып, Буранғол ауылына яғыулыҡ алып киттем. Артымдан ике машина ла эйәргән. Тәғәйен ергә барып етһәм, иптәштәремдән елдәр иҫкән. Ҡыҙымды бер апайға индерҙем дә кире киттем. Ул ваҡытта телефон-фәлән юҡ. Улар Амангилде – Үтәгән юлында икән, машинаның радиаторы тишелгән булған. Баҡтиһәң, алдағыһы ике уҡыусы ҡыҙҙы ултыртырға булып туҡтаған арала, ҡапыл арттан икенсеһе килеп сыҡҡан, уларҙы тапатыуҙан ҡурҡып, икенсе машинаға бәрелгән, – тине ул.