Рәсәй Хөкүмәте өс йәшкә тиклемге зәғиф һәм һүлпән үҫешеүсе балаларға ярҙам итеү буйынса 2020 йылға тиклем иҫәпләнгән концепция проектын хупланы. Ғаиләләргә медик, социаль һәм методик булышлыҡ сараларын билдәләгән был документ ҡайһы бер сирҙәрҙең эҙемтәләрен еңеләйтеүгә, шул иҫәптән сабыйҙарҙы инвалидҡа әйләнеүҙән һаҡлауға, ата-әсәләрҙең һаулығы насар булған балаларынан баш тартыуы осраҡтарын кәметеүгә йүнәлтелгән, ти белгестәр.


– Кескәйҙәрҙең тәүге аҙымдары өлкәндәрҙең күңелендә шатлыҡ ҡына тыуҙырһын ине, – тине ил Хөкүмәте Рәйесе Дмитрий Медведев. – Дәүләт яғынан да, йәмғиәт тарафынан да яҡлау булырға тейеш. Кешегә бәләкәй саҡтан уҡ медицина ярҙамы күрһәтеү бик яҡшы һөҙөмтәгә өлгәштерә, күп кенә проблемаларҙан аралай, ауырыуҙарҙы еңеүҙән тыш, башҡа социаль мәсьәләләрҙе хәл итергә лә мөмкинлек тыуҙыра.
“Росстат” мәғлүмәттәренә ҡарағанда, илебеҙҙә балаларҙың 2 проценты инвалид, улар араһында психик ауырыуҙар – 22,8, тән ағзалары тыумыштан зәғиф булғандар – 20,6, нервы системаһы сирҙәренән яфаланыусылар 20 процент тәшкил итә. Хеҙмәт һәм социаль яҡлау министры Максим Топилиндың әйтеүенсә, яңы тыуған сабыйҙың һаулығында ниндәй проблемалар барлығын асыҡлап, дауалау сараларын билдәләгәнсе бик күп ваҡыт уҙа, сөнки был йүнәлештәге эште көйләүсе система, берҙәм ҡараш юҡ. Концепция проектында шуға ла “медицина, мәғариф һәм халыҡты социаль яҡлау өлкәләре белгестәре балала ниндәйҙер хәүефле сирҙең эҙҙәрен күргәс тә иртә ярҙам хеҙмәткәрҙәренә хәбәр итергә тейеш” тиелгән. Ундай тәғәйенләнештәге бүлексәләр тиҙҙән төбәк ведомстволары ҡарамағында барлыҡҡа киләсәк.
Һәр инвалид балаға айырым ҡараш булдырып, уларҙың сәләмәтлеген генә түгел, төрлө яҡлап үҫешен тәьмин итеүҙе күҙ уңында тотҡан программа өс йәшкә тиклемгеләрҙе хәстәрләү менән сикләнмә­йәсәк. Максим Топилин киләсәктә иртә ярҙам системаһын камиллаштырып, әгәр кәрәк икән, физик мөмкинлектәре ҡайтыш булғандар менән эште ете-һигеҙ йәшкәсә алып барыу мөһимлеген билдәләне.
Концепцияны тормошҡа ашырыу өсөн аҡса “Уңайлы мөхит”, “Һаулыҡ һаҡлауҙы үҫтереү”, “Белем биреүҙе үҫтереү” һымаҡ дәүләт программаларына ярашлы бүленәсәк. Өҫтәмә финанс сығымдары ла талап ителеүе мөмкин, әлбиттә. Әлегә Рәсәй Премьер-министрының тейешле бойороҡҡа ҡул ҡуйыуы, Хеҙмәт һәм социаль яҡлау министрлығының башҡа ведомстволар менән берлектә аныҡ саралар планын төҙөүе көтөлә.