Рөстәм Хәмитов эш сәфәре барышында Тәтешле, Балтас һәм Борай райондарында булды. Республика Башлығы ураҡ барышы менән танышты, агросәнәғәт комплексы предприятиеларын, етештереү, инфраструктура һәм социаль объекттарҙы ҡарап сыҡты, шулай уҡ район активы менән биләмәләрҙе социаль-иҡтисади йәһәттән үҫтереү мөмкинлеген тикшерҙе.

Тәтешле районының Вязовка ауылында төбәк Башлығы 2013 йылда шәхси эшҡыуар Динар Биктимеров асҡан “Косая степь” ял базаһының эшмәкәрлеге менән танышты. Әле бында ашханаһы, ял бүлмәләре булған үҙәк, йәшәү һәм ял итеү өсөн биш комплекс, саңғы базаһы төҙөлгән, балалар өсөн уйын майҙансыҡтары, пейнтбол зонаһы ойошторолған. Ҡышын ял итергә теләгәндәргә саңғы юлы, тюбинг, ҡаргиҙәрҙәр бар.
База етәксеһе әйтеүенсә, бында республиканан, күрше төбәктәрҙән – Пермь крайынан, Свердловск өлкәһенән күпләп киләләр.
Сәфәр барышында Рөстәм Хәмитов Вязовка ауылындағы быуа ярында урынлашҡан Комаров исемендәге балалар һауыҡтырыу лагерында булды. Ул лагерҙағы йәшәү һәм туҡланыу шарттары, медицина хеҙмәтенең ойошторолоуы менән ҡыҙыҡһынды, хеҙмәткәрҙәр менән аралашты. Лагерь директоры Ринат Дәүләтов капиталь ремонт өсөн республика Башлығына рәхмәт әйтте.
Бәҙрәш ауылында Рөстәм Хәмитов малсылыҡ һәм ағас эшкәртеү менән шөғөлләнгән Илмират Балағутдиновтың крәҫтиән (фермер) хужалығы эшмәкәрлеге менән танышты. Ул шулай уҡ бер гектар майҙанды биләгән йылҡы ихатаһында ла булды. Бында 200-гә яҡын йылҡы аҫрала, 972 квадрат метрлыҡ ат аҙбары, 3 мең квадрат метрлыҡ ялан кәртә бар. Илмират Балағутдинов әйтеүенсә, хужалыҡта йылҡы итенән аҙыҡ-түлек, шул иҫәптән ҡаҙылыҡ етештерелә. Продукцияны һатыу өсөн ит кибете асыу күҙаллана.
Район йүнселдәре эшҡыуарлыҡҡа ярҙам күрһәткән өсөн төбәк Башлығына ихлас рәхмәт әйтте.
– Был – беҙҙең эшебеҙ. Һеҙ байыһағыҙ, беҙгә лә һәйбәт: эш урындары барлыҡҡа килә, һалым күберәк түләнә, – тине Рөстәм Хәмитов.
Район үҙәге Үрге Тәтешлелә республика етәксеһе “МегаБит” яуаплылығы сикләнгән йәмғиәтенең етештереү комплексында булды. Предприятие ер мәсьәләһе, төҙөлөш материалдары етештереү һәм һатыу, йорт һалыу менән шөғөлләнә, транспорт хеҙмәте күрһәтә. Етештереүгә йәлеп ителгән техника өлгөләрен төбәк Башлығына күрһәтте улар.
Эш сәфәрендә Рөстәм Хәмитов Балтас районының Иҫке Балтас ауылында былтыр көҙ сафҡа индерелгән 139 урынлыҡ “Миләшкәй” балалар баҡсаһын ҡарап сыҡты, “Йәшлек” физкультура-һауыҡтырыу комплексында булды. Комплекста йөҙөү, гимнастика, бокс, армреслинг, пауэрлифтинг һәм ауыр атлетика, волейбол, баскетбол, футбол һәм теннис буйынса түңәрәктәр эшләй, спорт һәм тренажер, фитнес залдары, бассейн бар.
Республика Башлығы комплексты файҙаланыуға һәм уны тәртиптә тотоуға сарыф ителгән сығымдар менән ҡыҙыҡһынды. Директор Фәрит Ғәлимов әйтеүенсә, йыллыҡ сығым 6 миллион һумдан ашыу тәшкил итә. Уның ҙур өлөшө муниципаль бюджеттан бүленә. Төбәк етәксеһе физкультура-һауыҡтырыу комплексының һөҙөмтәлелеген арттырыу, балаларҙы һәм өлкәндәрҙе спортҡа күпләп йәлеп итеү зарурлығын билдәләне.
Башҡортостан Башлығы Һәйтәк ауылында Балтас дәүләт сорт һынау участкаһындағы ураҡ барышын ҡараны. Улар ауыл хужалығы культуралары сорттарын һынау, районлаштырыу һәм аграрийҙарға һатыу менән шөғөлләнә. Рөстәм Хәмитов участкала матди-техник базаны яңыртыу, перспективалы мал аҙығы культуралары орлоғон етештереү йәһәтенән эште көсәйтеү кәрәклеген билдәләне, башҡа райондарҙағы орлоҡсолоҡ хужалыҡтары менән тәжрибә уртаҡлашырға кәңәш итте.
Борай районында республика етәксеһе һабантуй үткәрелгән майҙанда булды. Биләмә байрамдан һуң бушап ҡалмаған: бында мәҙәни саралар даими уҙғарыла, асыҡ һауала спорт менән шөғөлләнеү майҙансығы ойошторолған.
– Фольклориадаға ошонда әҙерләнәһе­геҙме? Урыны бик матур, – тине Рөстәм Хәмитов.
Башҡортостанда Бөтә донъя фольк­лориадаһы үткәреләсәк урындарға талаптар ғәмәлгә инәсәк. Ошондай һабантуй майҙансыҡтары – бының өсөн иң ҡулай урындарҙың береһе, тигән фекерҙә төбәк етәксеһе.
Район үҙәгендә Рөстәм Хәмитов былтыр файҙаланыуға тапшырылған Борай үҙәк район дауаханаһының яңы корпусын ҡараны. 50 урынлыҡ бинаның дөйөм майҙаны – 5 мең квадрат метр. Объекттың хаҡы иһә – 247 миллион һум, шуның 97 миллион һумы ҡорамалдар һатып алыуға тотонолған.