Балаларҙың хәүефһеҙлеге хаҡына

Башҡортостандың Мәғариф министрлығы ауыл мәктәптәрен автобус менән тәьмин итеү йәһәтенән ентекле эш алып бара. Уҡыусыларҙы база мәктәптәренә йөрөтөү, иҫкергән автопаркты яңыртыу өсөн йыл һайын районға бер нисә автобус бүленә, сөнки юлда балаларҙың хәүефһеҙлеген тәьмин итеү – иң мөһим бурыстарҙың береһе.
Әле райондың белем усаҡтары 24 автобусҡа эйә. Уларҙың күбеһе федераль һәм республика ҡаҙнаһынан һуңғы биш йылда бүленһә, араларында яңыртыуҙы талап иткәндәре лә бар. Район мәктәптәрендә бөтәһе 2 825 бала белем ала. Күрше ауылдарға йөрөп уҡыусылар ҙа байтаҡ. Былтыр Шәбағыш, Зәк-Ишмәт мәктәптәре яңы автобус алып ҡыуанғайны, быйыл районға тағы ике “ПАЗик” автобусы бүленергә тейеш.


Сибай ҡарттары “йәшәрәсәк”

“2012 – 2016 йылдарҙа Сибай ҡалаһында күсмә һәм эске туризмды үҫтереү” программаһына ярашлы ойошторолған социаль турҙа хаҡлы ялда булған 27 кеше ҡатнашасаҡ.
Оло йәштәгеләр “Сибай” профилакторийында ял итәсәк. Һаулығын нығытыу менән бер рәттән улар төрлө мәҙәни сарала ҡатнашасаҡ, театр һәм филармонияға йөрөйәсәк. Был тур өсөн аҡса ҡала ҡаҙнаһынан бүленгән.


Һалдаттарға тыуған яҡ сәләме

Бөрйән районы хакимиәте “Мәсем” йәштәр һәм үҫмерҙәр клубы, Белорет ҡалаһы, Белорет һәм Бөрйән райондары буйынса хәрби комиссариат менән берлектә “Башҡортостан йәштәре – яҡташ хәрбиҙәргә” тигән акция үткәрә.
Хәрби хеҙмәткә саҡырылған егеттәргә адреслы социаль, әхлаҡи-психологик ярҙам күрһәтеү маҡсатында хәрби комиссариатта бүләктәр, посылкалар йыйыу ойошторола. Акцияның ике аҙна элек кенә башланыуына ҡарамаҫтан, халыҡ ихлас ҡушылған. Аҡсалата ярҙам итеүселәр ҙә, йылы кейем алып килеүселәр ҙә байтаҡ. Айырыуса оло йәштәге инәйҙәр өлгө күрһәтә – һалдаттар өшөмәһен тип йөн ойоҡ, бейәләй бәйләп килтерә.


Ишембайҙар ташҡынға әҙерләнә

Ағиҙел һәм Урал йылғалары һыу объекттарын мониторинглау буйынса Федераль дәүләт учреждениеһы хәбәр итеүенсә, Стәрлетамаҡҡа тиклем Ағиҙел йылғаһы бассейнында тупраҡтың көҙгө дымланыуы норманан 60 процентҡа юғарыраҡ булған. Уртаса алғанда, дөйөм бассейн буйынса дымланыу нормаға яҡын.
Ағиҙел йылғаһы бассейны буйынса ҡар ҡатламындағы һыу запасы әлеге декадала күп йылдар буйы һаҡланған уртаса кимәлдән 50 – 60 процентҡа кәмерәк. Бөгөнгө көндә ҡар ҡатламының бейеклеге — 20 – 40 сантиметр, был үткән йылдар күрһәткесенән 30 – 50 процентҡа кәм. Ағиҙел бассейнындағы йылғаларҙа боҙ ҡалынлығы — 40 – 65 сантиметр тирәһе. Быйыл ҡар аҙ яуҙы. Былтыр март башында ҡарҙың ҡалынлығы 1 метрҙан ашыу булһа, быйыл 45 – 50 сантиметрҙан артмай. Шуға ташҡын көслө булмаясаҡ тип фаразларға була. Сәсеү эштәрен мөмкин тиклем тиҙерәк, ерҙә дым бар саҡта тамамлап өлгөрөргә кәрәк.


Белоретта – “Хамматов һабаҡтары”

Белорет ҡалаһының 22-се башҡорт гимназияһына 2006 йылда Яныбай Хамматов исеме бирелгәндән алып, бында йыл һайын “Хамматов һабаҡтары”н үткәреү матур йолаға әүерелгән.
Быйылғы сараға район һәм ҡала мәктәптәренән уҡыусылар һәм уҡытыусылар йыйылды. Яҙыусының “Ҡара яу” романы буйынса режиссер Айгиз Ғәбдинов төшөргән “Мораҙым хан” фильмынан өҙөк күрһәтелде. Сараның икенсе өлөшөндә асыҡ дәрестәр үтте, Яныбай Хамматовтың тормошо һәм ижады буйынса викторина, тасуири уҡыу бәйгеһе, һүрәт, инсценировка конкурстары булды. Еңеүселәргә дипломдар һәм бүләктәр тапшырылды.


Уҡыусылар көтөп алды

Дүртөйлө ҡалаһының 5-се мәктәбендә 17-се тапҡыр “Беби-шлягер” фестивале үтте. Был сараны уҡыусылар түҙемһеҙлек менән көтөп алды.
Быйыл уҡыусылар 40 концерт номеры әҙерләгән. 7 “Г” класы уҡыусыһы Руфина Юнысова, француз телендә йырлап, гран-при яулаған.


Күсейҙәр батырҙарын онотмай

Баймаҡ районының Күсей ауылы арҙаҡлы шәхестәре менән дан тота. Тиҙҙән күсейҙәр батыр улдарының береһе – Советтар Союзы Геройы Тәфтизан Миңлеғоловтың тыуыуына 90 йыл тулыуын билдәләргә йыйына.
Герой уҡыған мәктәптә уның ҡаһарманлығына бағышланған стенд ҡуйылған, махсус мөйөш тә бар. Батырға арналған спорт ярыштары, туғандары менән осрашыуҙар, төрлө тематик кисәләр, шиғыр конкурстары үтәсәк.