Бында иген үҫтерергә була, тип тигеҙ-тигеҙ яландарҙы байҡап һоҡланып торғанда, эргәгә “Субару” килеп туҡтаны. Рулдәге үткер ҡарашлы, киң яурынлы ағайҙы күптән беләм. Ошо ерҙең ысын хужаһы, уның киләсәк яҙмышын ҡайғыртыусы Ҡасим Ишембаев ул. Көйлө генә барған бизнесын онотобораҡ тороп, тыуған Мәҡсүтендә ер эшенә тотоноп китте бер нисә йыл элек.

Әлбиттә, был эштә етеҙлек тә талап ителә. Мәсьәләләрҙе мәлендә хәл итеү, ваҡытында өлгөрөп ҡалыуҙан да күп нәмә тора. Уйҙарымды дәлилләгәндәй, хәбәрселәр менән һөйләшкән арала, Ҡасим ағай ҡый үләндәренә ҡаршы препарат тейәлгән “ЗиЛ” машинаһы арбаһына үрмәләп менеп тә китте. Йәһәт кенә мискәләрҙе байҡап сыҡҡас, баҫыу буйлап килгән “МТЗ”-ға нимәлер ишараланы. Шунан сәғәтенә ҡарап алды ла:
— Бына шулай, ҡустылар, ҡышты туйҙырырлыҡ йәйҙең көнө минуттарҙан тора, — тип һүҙ башланы. – Ә ваҡытты әрәм итмәй, ҡулланып ҡалырға кәрәк. Көн шулай матур икән, эҫетмәҫ борон уҡ был “умыртҡалыҡты” тамамлая­саҡбыҙ.
“Умыртҡалыҡ” тигәне шунан ғибәрәт: Ишембаев крәҫтиән (фермер) хужа­лығының төп таянысы булған 200 гек­тарлыҡ ялан ул. Төп табыш нәҡ ошонан килә. Хужа йәмғеһе меңдән ашыу гектар майҙанда сәсә икән. Бойҙай, мәҫәлән, 400 гектарға яҡын ерҙә, ҡалғаны — һоло, арпа, көнбағыш һәм үлән.
…Ағыулағыс ҡоролма таҡҡан трактор эргәнән ҡуҙғалып киткәс, инде хужаның баяғы текә “тимер ат”ында еләбеҙ. Был сәфәрҙең дә үҙ маҡсаты бар, әлбиттә – егеттәргә өйҙә бешергән төшкө аш артынан бара йүнсел.
Юл ыңғай уңыш алыу серҙәрен белеү маҡсатында Ҡасим ағайҙың ҡылын тартабыҙ.
— Эшләһәң, барыһы ла була. Мәҫә­лән, бөгөн мин иртәнге сәғәт биштә торҙом. Ауыл хужалығы бер көн эсендә табыш килтерә торған тармаҡ түгел. Зыянды ҡаплай-ҡаплай күтәреләһең. Бынан тыш, уңыш алыу бер, уны һата белеү ҙә кәрәк. Башта “тишек-тошоҡто” ямарға ҡалалағы тирмән һәм көнбағыш майы һыҡтырыу цехы ярҙам итте, артабан ер эше аҡлана башланы. Әммә бер урында тапанырға ярамай. Бөгөн дүрт тракторыбыҙ бар, ошо көндәрҙә генә өс комбайнлы булырға торабыҙ, ғөмүмән, техника етерлек. Гектарҙар менән бер рәттән транспорт мәсьәләһен дә даими хәл итеү, техника паркын әленән-әле яңыртыу талап ителә. Тик хужалыҡты әлегә күп тармаҡлы итеп үҫтерергә, мал-фәлән алырға ашыҡ­майым, — ти ул.
Техника – техника менән, әммә эшсе ҡулдарҙың да әһәмиәте ҙур шул. Мә­лен­дә сәсеп, мәлендә урып алыу зарур.
— Механизаторҙар Илнур Байдәү­ләтов, Рәмил Иралин, Иван Мачарин, Валерий Гудков, Филүс Ғәйетов, Рәмил Ямасипов – алыштырғыһыҙ бөркөттәр, — тип маҡтай Ҡасим Ғәбделмәжит улы эшсәндәрен. – Хәйер, маҡтарлыҡ итеп тә эшләмәгәс ни, шундай шарттар булғанда: айына 20 мең һум эш хаҡы түләйбеҙ, төшкө һәм киске аш менән тәьмин итәбеҙ, бесән, иген һәм быҙау сүрәтендә премия бирәбеҙ, — ти Ҡасим Ишембаев.
Әйткәндәй, ҡайһы бер хужалыҡтарҙан айырмалы рәүештә, ҡуртымға ерҙәрен биргән пайсыларҙы ла күҙ уңынан ысҡындырмай йүнсел, хаҡты ваҡытында тейешенсә түләп бара.
…Кисә генә һуйылған һыйыр итенә ҡушып бешерелгән картуф килеп етеүгә баҫыу батырҙары эштәрен ослап та ҡуйғайны инде. Шуны ғына көткәндәй, ҡояш тағы нығыраҡ ҡыҙҙыра башланы. Әммә хәҙер эҫелек ҡурҡыныс түгел: ағыу һауаға парланып осмаясаҡ, маҡсатына ярашлы ҡыйҙарға ҡунып бөттө. Эш сәғәтендә, минутында башҡа­рылғас ни, игендең уңырын ғына көтөргә ҡала.