*Бөтә донъя башҡорттары ҡоролтайының Башҡарма комитеты Өфө аэропортына ике тапҡыр Советтар Союзы Геройы Муса Гәрәевтең исемен биреү тәҡдиме менән сыҡты. Ҡоролтайҙағы “Башҡорт халҡының тарихы” ултырышында ҡатнашҡан тарихсылар һәм ғалимдар ҙа был фекерҙе ҡеүәтләй. Башҡортостанда ике тапҡыр Герой исемен алғандар башҡаса юҡ. Муса Гәрәев, штурмлаусы булараҡ, 200-ҙән ашыу осош яһаған һәм дошмандың ерҙәге хәрби көстәрен ҡыйратҡан. Әле аэропортҡа башҡорт геройының исемен биреүҙе һораған мөрәжәғәт әҙерләнә.

* 78 Советтар Союзы Геройын биргән уникаль хәрби берләшмәнең – легендар 112-се Башкавдивизияның — 75 йыллығына ҡарата Өфөлә һәйкәл ҡуйылыуы ихтимал.
112-се Башҡорт кавалерия дивизияһы музейы директоры Илүзә Ғәйнуллина фекеренсә, ғәскәрҙең Өфөнөң Дим биҫтәһендә тупланыуын иҫәпкә алғанда, мемориал Дим районы хакимиәте алдында урынлаштырылһа, урынлы буласаҡ. Бынан тыш, һәйкәл өсөн баш ҡаланың Еңеү һәм Башҡортостан урмансылары парктарын, Совет майҙанын тәҡдим итеүселәр ҙә бар. Ә һеҙ нисек уйлайһығыҙ, йәмәғәт?

* Салауат Юлаев тоҡомонан булыуын молекуляр-генетик йәһәттән тикшереү һөҙөмтәһендә иҫбат иткән Виктор Хәкимов һәм уның арҡаҙаштары – “Салауат вариҫтары” йәмәғәт ойошмаһы ағзалары – 1773 – 1775 йылдарҙағы Крәҫтиәндәр һуғышынан һуң яндырылған Тәкәй, Аҙналы, Мрат, Юлай, Ыҫмайыл, Бикбулат, Яҡуп, Ҡасай ауылдары иҫтәлегенә һәйкәл ҡуйыу эшен башлаған.
Әле буласаҡ монументтың эскизы әҙер, әммә эште тамамлау өсөн аҡса йыйылып бөтмәгән. “Салауат вариҫтары” быйыл йәй уның нигеҙен әҙерләргә ниәтләй. Йәмәғәт ойошмаһының тағы бер тәҡдиме – 26 октябрҙе Башҡортостанда Салауат Юлаевтың хәтер көнө тип билдәләү.

* Ырымбур өлкәһенең Төйлөгән районы халҡы Аллабирҙе урта мәктәбенең 20 йыллығын билдәләне, шулай уҡ ошо ауылдан сыҡҡан ғалим, Башҡортостандың атҡаҙанған уҡытыусыһы, Рәсәйҙең атҡаҙанған фән эшмәкәре, Халыҡтар Дуҫлығы ордены кавалеры Кәрим Ғайса улы Ишбаевтың хөрмәтенә иҫтәлекле таҡтаташ асылды.
Район хакимиәте мәктәпкә компьютер ҡорамалдары комплекты бүләк итте. Сығарылыш класс уҡыусылары спорт залын йыһазлан­дырыуға аҡсалата ярҙам күрһәтте. Көйөргәҙе районының “Юшатыр” гәзите редакцияһы хеҙмәткәрҙәре уҡыу йортоноң китапханаһына баҫмалар тапшырҙы.
Аллабирҙе ауылы халҡы арҙаҡлы шәхестәрен онотмай, иҫәндәре менән дә осрашыуҙар үткәреп торорға кәрәклеген билдәләй. Боронғо башҡорт нәҫеленән булған аллабирҙеләр бығаса бер ҙә ойошторолмаған Шәжәрә байрамын да үткәрергә әҙерләнә.

* Төньяҡ Осетия башҡорттары Салауат Юлаев исемендәге башҡорт милли-мәҙәни йәмғиәтенең 15 йыллығын билдәләне. Кавказ ҡуйынындағы республикала 300 самаһы башҡорт йәшәй. Милли-мәҙәни ойошманың эшендә ҡатнашыу уларға туған телдә һөйләшергә, ата-бабаларыбыҙҙың ғөрөф-ғәҙәттәрен, йолаларын онотмаҫҡа мөмкинлек бирә.
Владикавказ ҡалаһының Милли китапхана­һында үткән юбилей кисәһендә башҡорт халҡының көнкүреш әйберҙәре, биҙәү-ҡулланма сәнғәт өлгөләре һәм милли кейем, Башҡортостан тураһында һәм XVIII – XIX быуаттарҙағы уникаль баҫмаларҙан тупланған “Башҡорт әҙәбиәте ынйы­лары” исемле китап күргәҙмәләре эшләне. Ҡунаҡтар республикабыҙ, халҡыбыҙ, бай тарихыбыҙ, мәҙәниәтебеҙ тураһында фильм, йыр-бейеү аша таныша алды, байрам һуңында башҡорт бәлешенән ауыҙ итте.

* Сыктывкарҙа ”Коми Республикаһы халыҡтары караокеһы” музыкаль дискы сыҡты. Музыкаль тупланмаға Ухта ҡалаһының “Дуҫлыҡ” йыр ансамбле солисы Зөһрә Ғәлимова башҡарыуында башҡорт телендәге “Ауыл ҡапҡаһы” йыры ла ингән.
Проект Коми Республикаһының Милли сәйәсәт министрлығы тарафынан тормошҡа ашырылған. Төрлө халыҡтарҙың 20 йырынан торған диск һатыуға сығарылмай, Коми китапханаларына һәм милли-мәҙәни үҙәктәргә генә таратыласаҡ. Билдәле булыуынса, Комиҙа башҡорт һәм татар халҡы вәкилдәрен берләштергән “Берҙәмлек” милли-мәҙәни автономияһы эшләй.