Башҡортостан Башлығы Рөстәм Хәмитов Өфө күҙ ауырыуҙары ғилми-тикшеренеү институтының 90 йыллығына арнап баш ҡалабыҙҙа офтальмология буйынса үткәрелгән «Көнсығыш – Көнбайыш-2016» халыҡ-ара конференцияһының йомғаҡлау ултырышында сығыш яһаны. Республика етәксеһе, медицина учреждениеһы хеҙмәткәрҙәрен ошо әһәмиәтле дата менән ҡотлағас, хеҙмәт алдынғыларына дәүләт наградалары ла тапшырҙы.

Сара башланыр алдынан Рөстәм Хәмитов Өфө күҙ ауырыуҙары ғилми-тикшеренеү институтында ҡулланылған офтальмология ҡорамалдары күргәҙмәһе менән танышып өлгөрҙө.
– Һаулыҡ темаһы һәр кеше, дәүләт, йәмғиәт өсөн бик мөһим. Демографик хәл — власть органдары, һаулыҡ һаҡлау тармағы эшенең төп күрһәткесе. Әгәр был йәһәттән күрһәткестәр һәйбәт икән, власть та һәйбәт эшләй тигән һүҙ, – тине Рөстәм Зәки улы. – Шуға күрә бөгөн тыуымды арттырыу, үлем осраҡтарын кәметеү өсөн бөтә көсөбөҙҙө һалырға тырышабыҙ. Бурыс бик мөһим һәм уны тормошҡа ашырыу ярайһы уҡ ҡатмарлы, сөнки халыҡтың менталитетын, табиптар берләшмәһенең эшенә ҡарашын үҙгәртергә кәрәк. Әммә мәсьәләне бергәләп хәл итә алабыҙ. Власть, һаулыҡ һаҡлау учреждениелары үҙҙәре генә бер ни ҙә эшләй алмай.
Башҡортостан етәксеһе билдәләүенсә, оҙаҡ йылдар эсендә тәүге тапҡыр республикала уртаса ғүмер оҙайлығы 70 йәштән уҙҙы. Был беҙҙең өсөн һәйбәт күрһәткес, шулай ҙа, Рөстәм Хәмитовтың әйтеүенсә, әле башҡараһы эш күп.
Ил буйынса уртаса алғанда, беҙҙә йөрәк-ҡан тамырҙары сирҙәренән һәм яман шештән үлеү осраҡтары аҙыраҡ икән. Рөстәм Зәки улы ошоға бәйле һуңғы ике йылда юғары технологиялы медицина ярҙамы күләменең 80 процент тәшкил итеүенә, Республика кардиология үҙәге һәм онкология диспансеры үҙ профиле буйынса илдең иң яҡшы ун учреждениеһы иҫәбенә инеүенә иғтибар йүнәлтте.
“Заман технологиялары күҙ ауырыуҙарына дусар булыусылар һанын арттыра” тигән фекер нығынған. Әммә офтальмология ла бер урында тормай: яңынан-яңы дауалау алымдары үҙләштерелә, ҡеүәтле ҡорамалдар уйлап табыла. Был йәһәттән Өфө күҙ ауырыуҙары ғилми-тикшеренеү институтының эшмәкәрлеген айырым билдәләп үтергә кәрәк. “Былтыр унда 46 мең кешенең күҙенә операция яһалған. Биш йыл элек кенә беҙ ундай күрһәткес хаҡында хыяллана ла алмай инек”, – тип билдәләне Республика Башлығы.
Офтальмологтар фекеренсә, ниндәй юғары бейеклектәргә өлгәшелеүенә ҡарамаҫтан, камиллыҡтың сиге юҡ. Үҫеш йәһәтенән халыҡ-ара конференциялар ҙур әһәмиәткә эйә, сөнки уларҙа яңы дауалау саралары үҙләштерелә, алдынғы эш алымдары өйрәнелә. Мәҫәлән, элек тома һуҡыр кешеләргә күреү һәләтен ҡайтарыу мөмкинлеге булмаһа, әле уларҙың күҙе эсенә чиптар ҡуйып, яҡтылыҡты тойорға ярҙам итергә мөмкин.
Һуңғы осорҙағы асыштарҙың береһе яңы тыуған сабыйҙарға ҡағыла. Ошоғаса ретинобластома сире менән тыуған балалар үлемгә дусар тип иҫәпләнһә, хәҙер яңы технологиялар ярҙамында уларҙы ҡотҡарыу мөмкинлеге бермә-бер арта.



Дәүләт комитетында –
яңы етәксе

Республика Башлығы Рөстәм Хәмитовтың Указына ярашлы Башҡортостандың Сауҙа һәм ҡулланыусыларҙың хоҡуҡтарын яҡлау буйынса дәүләт комитеты рәйесе вазифаһын ваҡытлыса башҡарыусы итеп Гүзәл Аҫылова тәғәйенләнде.

Башҡортостан Башлығының икенсе Указы менән Сауҙа һәм ҡулланыусыларҙың хоҡуҡтарын яҡлау буйынса дәүләт комитетына ошоғаса етәкселек иткән Рөстәм Камалетдинов, икенсе эшкә күсеү сәбәпле, вазифаһынан бушатылды.