“Башҡортостан” дәүләт телерадиокомпанияһы иғлан иткән “Алһыу сәскә” әҙәби акцияһы тамамланды. Яҙыусы Сергей Аксаковтың тыуыуына 225 йыл тулыуға бағышланған проекттың йомғаҡлау сараһы Башҡорт дәүләт опера һәм балет театрында уҙҙы.

Акция тамамланыу йәһәтенән төп ҡунаҡтар итеп балалар йорттарынан кескәйҙәр саҡырылғайны. Театр бинаһында улар өсөн үҫмерҙәрҙең ҡул эштәренән һәм рәсемдәренән әҙерләнгән күргәҙмә эшләне. Шулай уҡ ҡунаҡтарға классиктарҙың 600-ләп китабы менән дискка яҙҙырылған “Алһыу сәскә” әкиәте бүләк ителде. “Том Сойер” исемле балет та нәҡ улар өсөн ҡуйылды.
Балаларҙы тәбрикләргә Мәскәүҙән “Рәсәй” каналының “Хәбәрҙәр” программаһын алып барыусы Инга Юмашева ла килгәйне. Ул йәш быуын вәкилдәрен әүҙем фекерләргә, азат рухлы булырға саҡырҙы, бының өсөн әҙәби китаптар уҡырға кәрәклеген белдерҙе. “Йәнә “Ғаилә уҡыуҙары” тигән йоланы тергеҙергә ине” тигән теләген дә еткерҙе.
Был әҙәби акцияға байтаҡ ҡына белем биреү үҙәктәре, ойошмалары ҡушылған. Ошо йәһәттән нәфис гимнастика буйынса ярыш, рәссамдар бәйгеһе үткәрелгән. Сараны ойоштороуҙы “Берҙәм Рәсәй” партияһының төбәк бүлексәһе, шулай уҡ Константин Толкачев, Лилиә Ғүмәрова, Әминә Шафиҡова, Олег Газманов, Иосиф Кобзон, Юрий Стоянов кеүек сәйәсәт, мәҙәниәт эшмәкәрҙәре хуплаған.