Республикабыҙҙың көньяғында урынлашҡан Көйөргәҙе районы баҫыуҙарында яҙғы сәсеү эштәре тамамлана. Бар хужалыҡтарҙа ла эштәр көйлө ойошторолған, яғыулыҡ-майлау материалдарына, орлоҡҡа ҡытлыҡ юҡ – барыһы ла алдан хәстәрләнгән.


Төбәктә генә түгел, республика кимәлендә билдәле “Искра” ауыл хужалығы кооперативы эшсәндәренең кәйефе көр: ашлама ла, яғыулыҡ та етерлек. Хужалыҡтың һөрөнтө ерҙәре генә лә 16713 гектар тәшкил итә, яҙғы баҫыу эштәре 14800 гектарҙа атҡарылған. Хужалыҡ етәксеһе – Башҡортостандың атҡаҙанған ауыл хужалығы хеҙмәткәре Рәмил Мостафин – быйыл ерҙең дымға мул туйыныуына һөйөнөүен йәшермәй. Сирек быуат тыуған еренең ҡотон һаҡлап етәкселек иткән игенсенең күңеле, өмөтө – бураҙнаға ятҡан ошо орлоҡтарҙа. Өмөт, йәшәү орлоҡтары ул.
– Сәсеү эштәре алты бригадала үҙ ваҡытында бара. Егеттәр һынатмай. Ә иң мөһиме – хужалыҡ яҙғы сәсеү эштәренә етди әҙерлек менән килде. Быйыл 50 миллион һумлыҡ яңы техника алыуға өлгәшеү үҙе үк эштәрҙе бермә-бер еңеләйтте, – тине Рәмил Ғиниәт улы.
Ришат Аҙнабаев етәкләгән 1-се кооперативта өр-яңы “Барго” исемле Канада сәскесе эшкә ҡушылған. Уның киңлеге – 15,2 метр, хаҡы ла бар – 13 миллион һум. Бер юлы 7,5 тонна орлоҡ, 2,5 тонна ашлама һалынып, тәүлек әйләнәһенә сәсеү һәләтенә эйә икән.
Кондиционеры, автопилоты, музыкаһы, йылытыу ҡоролмаһы булған аҡыллы машинаны кем йөрөтә тиһегеҙме?
– Илфаҡ Боҫҡонов менән Румил Аҡсаров – беҙҙең хужалыҡтың тәжрибәле механизаторҙары, – тип таныштырҙы Ҡотлоюл бригадаһы бригадиры Урал Ибраһимов. – Компьютер менән идара ителгән “ҡорос ат”тарҙы тиҙ арала ауыҙлыҡлай алдылар. Көндө төнгә ялғап эшләгәнгә сәсеү ырамлы бара. Былтыр иһә һигеҙ рәтле ике “Kinze” сәскесен, “MacDon” үҙйөрөшлө сапҡысын, “Аргент” ағыулаусы ҡоролмаһын алып ҡыуанғайнылар. Әйткәндәй, 980 гектарҙа арпа, 330 гектарҙа һоло, 1016 гектарҙа фураж өсөн кукуруз, 4035 гектарҙа көнбағыш сәселгән дә инде.
Хужалыҡ һәр саҡ яңылыҡҡа ынтыла. Көҙҙән “рыжик” исемле яңы культура сәселгән. Тиҙҙән ҡатнаш аҙыҡ заводы сафҡа инәсәк. Малдарға балансланған аҙыҡ ашатыу һауымды ике тапҡырға арттырған да инде, йәғни һәр һыйырҙан тәүлегенә 22 литр һөт алына. Былтыр көнөнә йәмғеһе 8 мең литр һауылған булһа, быйыл 16 мең литр “аҡ” оҙаталар һөт заводына. Түбәнге Бабалар бригадаһы продукция етештереүҙә алдынғылыҡты бирмәй икән.
Бар ғүмерен ауыл хужалығына бағышлаған, йәне-тәне менән тыуған төбәгенә ғашиҡ Рәмил Мостафин хаҡында үҙ еренең улы тип хаҡлы әйтергә була. Иҡтисади көрсөк заманында һөт-ит етештереү ҡеүәтен арттырып, баҫыуҙарҙы сифатлы эшкәртеп килгән “Искра”ның уңған, тырыш хеҙмәтсәндәре көҙҙө тулы келәттәр менән ҡаршылар.