Башҡортостан мосолмандарының Диниә назараты рәйесе, мөфтөй Нурмөхәмәт хәҙрәт Ниғмәтуллин:

— Бисмилләһир-рахмәнир-рахим, әлхәмдү-лилләһи раббүл-ғәләмин, үәс-саләтү үәс-сәләмү ғәлә мөхәммәдин, үә ғәлә әлиһи, үә әсхәбиһи әджмәғин.
Әлхәмдү-лилләһ, Аллаһ ­раббүл-ғәләмин ҡөҙрәттәре үҙ рәхмәте менән Әҙәм балаһын яралтҡан. Һәм Аллаһ Тәғәлә “Ер йөҙөндә үҙемә урынбаҫар ҡуям” тигән. Йәғни, әгәр ҙә Әҙәм балаһы иман ҡанундары менән йәшәһә, дөрөҫ юлда булһа, ислам ғәмәл­дәрен атҡарһа, ул Аллаһ Тәғә­ләнең урынбаҫары була ла Ер йөҙөн матурлай, унда күркәмлек урынлаштыра, бәрәкәт һәм изгелек орлоғо сәсә. Ләкин Аллаһ раббүл-ғәләмин шайтанды ла ҡиәмәт көнөнә хәтлем ҡалдырған, һәм ул да Әҙәм балаһы янында йөрөй, иман юлынан яҙҙырыр өсөн. Әгәр инде кешенең ышанысы көсһөҙ булһа, уны аҙаш­тырыу еңел буласаҡ.
Шайтандың аҙаштырыу юлдары бик күп төрлө. Иң беренсеһе – хәрәм ризыҡтар, бында спиртлы эсемлек тә, дуңғыҙ ите лә, “бисмилла”һыҙ һуйылған малдың итен ашау ҙа, наркотик та, ҡомарлы уйындар ҙа керә. Нимә аҡылға зыян килтерә – шулар барыһы ла иблистең ҡоралынан һанала.
Аллаһ Тәғәлә кешегә ҙур ниғмәт итеп аҡыл биргән. Хәҙерге тел менән, компьютер, тиергә лә була. Шулай итеп, әгәр беҙ компьютер һатып алһаҡ, уға үҙебеҙгә кәрәкле программалар ҡуябыҙ. Документтармы унда, уйындармы йә башҡа нәмәләр булһынмы. Ләкин уның ауырыуҙары ла килеп сыға – вирус. Һәм компьютерға антивирус ҡуйырға кәрәк була. Был йәһәттән кешелә аҡыл тигәне бар, һәм ул саф булырға, яҡшы менән яманды айырырға тейеш. Әгәр инде аңға зыян килһә, кеше аҡ менән ҡараны төҫмөрләү түгел, үҙенең йәшәгәнен дә белмәүе бар. Уның өҫтәүенә наркотиктар, эскелек арҡаһында әллә күпме зарар күрелә: ғүмерҙәр өҙөлә, ғаиләләр емерелә... Барыһы ла хәрәм ризыҡтар нәтижәһендә. Ошо уҡ яҙыҡ алымдар илдең дәүләтселеген дә ҡаҡшата. Быға дин ҡаршы тора.
Пәйғәмбәр (салаллаһ-ғәләйһи-үә-сәлләм) бер хәҙисендә: “Кем дә кем хәрәм ризыҡтар ҡуллана, шунан Аллаһ Тәғәләнең рәхмәте ситтә буласаҡ. Һәм унан ҡырҡ көнгә иманы сыға”, – тигән. Ябайыраҡ итеп әйткәндә, эскән спиртты бауыр ҡырҡ көн буйына таҙалай, әммә табиптар белде­реүенсә, унан һуң да тәьҫире бөтмәй ҡала. Мөхәммәт пәйғәм­бәребеҙ йәнә әйткән: “Хәрәм нәмәне әҙерләгән дә, илтеп биргән дә, ҡулланған да гонаһлы була”. Тимәк, иҫерек тә, уға спиртты һатҡан кеше лә, етештереүселәре лә имандан алыҫ тора тиергә мөмкин. Хәрәм менән һатыу итеүҙән килгән аҡсаның да бәрә­кәте булмай, унан килгән зарар ҙа башҡаларға ҡағыла бит инде. Шул уҡ юл һәләкәттәрендә бер эскән кеше арҡаһында күпме кеше һәләк була. Өйҙә лә күпме ғауға тыуа.
Эскән кешенең йәмғиәткә килтергән зыяны ла байтаҡ, хатта уның башҡарған эше лә йүнле булмай. Иҫерткес матдә ҡуллан­ған әсәнең балаһы ла һау-сәләмәт түгел. Ә бала – нәҫелдең, теле­беҙҙең, милләтебеҙҙең, илебеҙҙең киләсәге, дәүләтебеҙҙең терәге. Шуның өсөн дә Аллаһ раббүл-ғәләмин беҙгә хәләл ризыҡтарын асыҡ ҡылһын. Халҡыбыҙ ҙа хәрәм тигән ризыҡта һәләкәт барлығын аҡыл, зиһен менән аңлап, унан алыҫ торһон ине. Алла биргән аҡылды һаҡлайыҡ, матур ғаилә ҡорайыҡ, һау балалар үҫтерәйек, ватаныбыҙҙы ҡурсыйыҡ, сөнки, мөхтәрәм ҡәрҙәштәр, илде һөйөү – ул имандың бер өлөшө.