Дәүләт статистикаһы федераль хеҙмәтенең Башҡортостан буйынса территориаль органы республика балалары араһында инша конкурсы иғлан итте. Ул “Ауыл хужалығы иҫәбен алыу балалар күҙлегенән” тип атала.

Яҙмаларҙа ил иҡтисадының аграр тармағына тос өлөш индергән ауыл эшсәндәренең хеҙмәт ҡаҙаныштары сағылыш табырға, шулай уҡ сараның дәүләт кимәлендәге әһәмиәте билдәләнергә тейеш. Конкурста барлыҡ мәктәп уҡыусылары ҡатнаша ала. Башланғыс, урта һәм өлкән кластар өсөн айырым номинациялар ҡаралған. Еңеүселәрҙе дипломдар, иҫтәлекле бүләктәр көтә.
Конкурс эштәре 4 июнгәсә ҡабул ителә. Уларҙы “Ауыл хужалығы иҫәбен алыу балалар күҙлегенән” тигән билдә менән ошо адресҡа ебәрергә кәрәк: 450077, Өфө ҡалаһы, Цюрупа урамы, 17-се йорт, Башҡортостанстат, 1202 к. Телефон – 8(347)273-79-00. Электрон адрес – shperepis@bashstat.ru. Унда инеп, конкурста ҡатнашыу өсөн заявканы тултырырға кәрәк (конкурс положениеһына 1-се ҡушымта).
Конкурс тураһында тулы мәғлүмәт менән http://bashstat.gks.ru сайтында танышырға мөмкин.


Рәсәй балалары ниҙәр сағылдырыр?


“Бөтә Рәсәй ауыл хужалығы иҫәбен алыу-2016” сараһының матбуғат үҙәге иһә һүрәттәр конкурсы иғлан итте.

Унда Рәсәйҙең 7 – 12 йәшлек балалары ҡатнаша ала. Сюжеттарҙа төрлө күренеште – иҫәп алыусы менән осрашыу, ҡағыҙ тултырыу мәле һ.б. – һынландырырға мөмкин. Шулай уҡ ауыл кешеһен, уның хеҙмәт һөҙөмтәләрен, йәнлек-ҡоштарҙы һүрәтләргә була. Конкурсҡа эштәр 31 майға тиклем ҡабул ителә. Премия фонды – 35 мең һум. Алты еңеүсе билдәләнәсәк.
Конкурста ҡатнашыу шарттары, эштәргә техник талаптар хаҡында мәғлүмәт менән “Бөтә Рәсәй ауыл хужалығы иҫәбен алыу-2016” сараһының мәғлүмәт үҙәге сайтындағы (www.vshp2016.ru) “Балалар һүрәте конкурсы” бүлегендә танышырға мөмкин. Электрон почта адресы – risunok@vshp2016.ru.