Тиҙ үҙгәреүсән заманда йәшәйбеҙ. Һәр яңы тыуған көн йәмғиәт, милләт һәм айырым кеше алдында яңы талап ҡуя. Һәр талап оло һынауға бәрәбәр. Йә заман менән бергә атларға, йә шым ғына юл ситенә сығып, башҡаларҙың хәрәкәтен күҙәтергә. Киләһе йылдарға көслө, белемле, берҙәм һәм татыу милләтме, әллә телен юғалта, һанын кәметә барған этник берәмек булырбыҙмы? Уйландыра...
Беҙ ҙә, “Башҡортостан”дар ҙа, уйланабыҙ... Ваҡыты менән шөкөр итәбеҙ, ҡайһы саҡта фекер йөрөтәбеҙ. Шатланабыҙ, борсолабыҙ, өмөтләнәбеҙ һәм... киләсәккә табан халҡыбыҙ барыр юлды күҙаллайбыҙ. Глобализация, интеграция, либерализация шарттарында башҡа ҡәүемдәр араһында конкурентлыҡҡа һәләтле, ихтирамға һәм хөрмәткә лайыҡ милләтебеҙҙе күрергә тырышабыҙ.
Бер быуатлыҡ тарихы булған баш баҫмабыҙҙың йөҙөнөң дә, йөкмәткеһенең дә үҙгәреүе тап шул заман ҡуйған талап­тарҙан сығып эшләнә. Гәзит өсөн тик бер генә “хужа” бар, ул – уҡыусы. Хәләл аҡсаһына үҙенең көнитмешен киләһе ярты йылға “Башҡортостан” менән бәйләгән икән, тимәк, ул затлы, зауыҡлы баҫмаға дәғүә итә. Беҙ быны асыҡ аңлайбыҙ һәм көндәлек хеҙмәтебеҙҙә шуға ынтылабыҙ. Иҡтисади көрсөк, тиҙәр. Үтер быныһы ла, үтмәй тормаҫ. Иң мөһиме – баштарҙа, күңелдәрҙә көрсөк булмаһын...
Бөйөк Мостай Кәрим әйткәнсә:

Йөҙәтмәһен әжәл юраусылар,
Беҙ булғанбыҙ, барбыҙ, буласаҡбыҙ.
Үҙебеҙҙең генә йырыбыҙҙы йырлап,
Ваҡыт арбаһында барасаҡбыҙ.

“Башҡортостан” менән бергә барайыҡ!






1386 һум 84 тингә йәки ярты йылға “Башҡортостан”ға яҙылыу хаҡына нимә һатып алып була?

* ҡаҙ түшкәһе
* өс литр банка бал
* килограмм “Кит-кат” кәнфите
* 3,5 килограмм “Рәсәй” сыры
* 4-5 килограмм һыйыр ите
* 20 ҡап тәмәке
* 40 литр 92-се маркалы бензин
* 4 әсмүхә сәй (200 грамлыҡ)
* 3 килограмм колбаса





“Башҡортостан”ға яҙылыу өсөн УН сәбәп:

1 Заман һулышын тойорға, ағым ыңғайын самаларға ярҙам итә.
2 Ваҡиғаларҙың айышына төшөндөрә, ни булғанын һәм буласағын ентекләп аңлата.
3 Йәмғиәттәге көнүҙәк мәсьәләләргә “күҙҙе аса”, иҫкәртә, һабаҡ бирә.
4 Ҡатмарлы хәлдәрҙе яйға һалыу юлдарын күрһәтә.
5 Файҙалы кәңәштәр, фәһемле фекерҙәр еткерә, уйландыра.
6 Төрлө өлкәлә ҡараштар берҙәмлеген булдыра.
7 Тарих буйынса белем даирәһен киңәйтә.
8 Өлгөлө кешеләр, алдынғы тәжрибәләр менән таныштыра.
9 Мәҙәни ҡиммәттәрҙе, матди ҡомартҡыларҙы ҡәҙерләргә өйрәтә.
10 Сәмләндерә, ғәмде уята, рухи яҡтан байыта.