Ҡала хакимиәтендә террорсылыҡҡа ҡаршы көрәш, оборона һәм янғын хәүефһеҙлеге, башҡа ғәҙәттән тыш хәлдәр буйынса комиссияның сираттағы ултырышы үтте. Тәү ҡарашҡа “эш мәле” булараҡ ҡына тойолған был сарала бөтә ил кимәлендәге мөһим мәсьәләләр тикшерелде.

…Беҙ – уҡытыусы, журналист, һатыусы, водитель. Был йә­һәт­тән төп бу­ры­сыбыҙ, әлбиттә, уҡытыуға, гәзит-журнал сыға­рыу­ға, йөк йәки ке­ше­ләр­ҙе йөрөтөүгә ҡайтып ҡала. Шул уҡ ваҡытта эшебеҙ менән йәнәш торған башҡа бурыстар ҙа бар бит әле – хәүефһеҙлекте ҡай­ғыр­тыу, мәҫә­лән. Тик, үкенескә ҡаршы, һуңғыһына иғтибар бирергә яратмайбыҙ, икенсе планға күсерәбеҙ. Йәнәһе, уның өсөн “икмәк ашаған” тейешле хеҙмәттәр бар. Бик тә булмаһа, Хоҙай һаҡлар, тип өмөт итәбеҙ. Әммә Хоҙай, һаҡланғанды һаҡлармын, тигән бит.
– Бөгөн халыҡ күпләп йыйылған урындарҙағы хәүефһеҙлек хаҡында һөйләшәсәкбеҙ, “хәүефһеҙлек паспортын” әҙерләү кимә­лен тикшерә­сәк­беҙ, – тип эш тәртибе менән таныштырҙы ҡала хакимиәтенең беренсе урынбаҫары Марат Мусин, кәңәшмәне асып.
Асыҡлыҡ индереп үткәндә, халыҡ күпләп йыйылған урын тип 50-нән ашыу кеше бер тирәгә тупланған урын билдәләнә. Башлыса был хәл төрлө саралар үткәндә күҙәтелә.
“Хәүефһеҙлек паспорты”на килгәндә иһә, был документтың маҡсаты – учреждениела террор акты, тәртип боҙоу, ғәҙәттән тыш хәлдәр булған осраҡта эҙемтәне кәметеү йә иһә бөтөнләй ундай хәлдәрҙе булдырмау. Документ махсус хеҙмәттәр менән бергәләшеп эшләнә.
Был тәңгәлдә ҡалала эш, үкенескә ҡаршы, һүлпән бара икән. Улай ғы­на түгел, янғын хәүефһеҙлеген ҡайғыртыуға ҡайһы бер учреждениелар бө­төнләй яуапһыҙ ҡарай. 60-тан ашыу етешһеҙлек осрағы асыҡланған: кешеләргә запас сығыу урыны, тейешле билдәләр, янғын һүндереү ҡо­ра­малдары юҡ һ.б. Был хаҡта Ғәҙәттән тыш хәлдәр министрлығының ҡа­лалағы күҙәтеү эшмәкәрлеге һәм иҫкәртеү эше бүлеге начальнигы урын­баҫары Ирек Ибраһимов еткерҙе. Белгес фекеренсә, ошо йәһәттән яуаплылыҡты көсәйтеү маҡсатында пландан тыш тикшереү эштәре йәйелдереләсәк.
Өлгө алырҙай учреждениелар ҙа юҡ түгел. Мәҫәлән, ҡала мә­ға­риф бүлеге шундайҙар рәтендә. Әлбиттә, балаларыбыҙҙың хә­үефһеҙлеге иң тәү сиратта иғтибар үҙәгендә булырға тейештер.
Террорсылыҡҡа ҡаршы көрәш буйынса ҡалала хәл тотороҡло, тип бил­дәләнде сарала. Донъяла мөнәсәбәттәр ҡатмарлашҡан мәлдә бын­дай һүҙҙәр, әлбиттә, күңелгә май булып яғылды. Әммә уяу булыу бер ҡасан да артыҡ түгел. Хәйер, тотороҡлоҡтоң да нигеҙендә нәҡ тейешле хеҙмәттәрҙең эш һөҙөмтәһе, һиҙгерлек ята түгелме ни?
– Бигерәк тә йәштәр менән ныҡлы эшләргә кәрәк. Исем өсөн генә үт­кә­релгән сараларҙа сағылырға тейеш түгел был. Егет-ҡыҙҙарҙа уяу­лыҡ­ты көсәйтер өсөн класс сәғәттәрендә, “түңәрәк өҫтәл”дәрҙә беҙҙең хеҙмәт вәкилдәре менән осрашыуҙар ойоштороу ҡиммәт, – тип билдә­ләне был йәһәттән Федераль хәүеф­һеҙлек хеҙмәтенең Стәрлетамаҡтағы бүлек на­чальнигы Рушан Ҡотлояров. Рушан Наил улы йәнә бер етеш­һеҙ­лек ха­ҡында әй­теп үтте. – Биналарҙағы элекке вахтерҙар, яңы за­кон талаптарына ярашлы, шәхси һаҡ предприятиеһы хеҙмәткәрҙәренә әйләнде. Әммә улар һаман да башлыса документ тикшереү менән генә мәшғүл. Атап әйткәндә, күпләп халыҡ йыйылған урындарҙа хәүефһеҙлек тейешле кимәлдә булырға тейеш.
Докладсыларҙың төрлө йүнәлештәге сығыштарында бер уртаҡ фекер бар: иҡтисади хәлдең тотороҡһоҙлоғона һылтанып, хәүефһеҙлеккә ҡул һелтәп ҡарарға ярамай. Кәрәкле ҡорамалдар, өйрәтелгән кешеләр булырға, халыҡты иҫкәртеү тейешле кимәлдә ойошторолорға тейеш.