Ошо көндәрҙә Рөстәм Хәмитов эш сәфәре менән Октябрьский ҡалаһында, Йәрмәкәй һәм Туймазы райондарында булды. Республика Башлығы Октябрьскийҙа өр-яңы һыу тәьминәте системаһын ғәмәлгә индереүҙә ҡатнашты, етештереү һәм инфраструктура объекттарын ҡарап сыҡты.

Йәрмәкәй районының Иҫке Шах ауылы эргәһендә төбәк етәк­сеһе Стәвәнжи йылғаһындағы һыу һаҡлағыстың насос станцияһын эшкә ҡушты. Объект Октябрьский ҡалаһының һыу тәьминәте системаһына инә.
“Октябрьсккоммунводоканал” муниципаль унитар предприя­тиеһы етәксеһе Айҙар Иманғолов әйтеүенсә, әлегә тиклем халыҡты һыу ме­нән тәьмин итеүҙә йыш ҡына өҙөклөктәр булған. Һөҙөмтәлә Стәвәнжи йылғаһында һыу һаҡлағыс төҙөргә ҡарар ителгән. Уның күләме – 19 миллион кубометр, ә һыу өҫтө майҙаны 272 гектар тәшкил итә.
Эште тамамлау һәм һыу тәьминәте системаһын проект ҡеүә­тенә сығарыу өсөн һыу бүлгестең икенсе тармағын һалырға һәм таҙа һыу өсөн йәнә бер резервуар төҙөргә кәрәк.
Рөстәм Хәмитов насос станцияһын ҡарап сыҡҡандан һуң Спутник ҡасабаһындағы баҫымлы резервуар майҙансығында булды. Бында ул лабораторияның, һыуҙы таҙартыу ҡулайлама­ларының эше менән танышты.

Ижади көстәр нығына

Ошо көндәрҙә Дәүләт Йыйылышы – Ҡоролтай йортонда уҡыусыларҙың “Минең республикам” тигән республика конкурсы еңеүселәрен бүләкләү тантанаһы уҙҙы.

Конкурсҡа бөтәһе 300 уҡыусынан шиғырҙар, хикәйәләр, әки­әт­тәр килгән. Ҡатнашыусылар үҙ хеҙмәттәрен башҡорт, урыҫ, та­тар, сыуаш телдәрендә башҡарған. Башҡортостандың Яҙыу­сы­лар союзы ағзаларынан торған жюри шуларҙың иң яҡшыларын билдәләне.
Туғыҙ лауреат республиканың “Йәйләү” лагерына юллама менән бүләкләнде. Ә ике еңеүсегә “Башҡортостан” концерт залында ижади коллективтарҙа бер йыл бушлай шөғөлләнеү мөмкинлеге тейҙе. Иң яҡшы тип танылған эштәрҙең авторҙарына бүләктәрҙе парламент рәйесе урынбаҫары Йомабикә Ильясова тапшырҙы.

Ҡышҡыһын да —
яңы өлгөргән йәшелсә

Башҡортостанда 2020 йылға тиклем теплицаларҙа үҫтерелгән йәшелсәнең тулайым йыйымын
1,5 тапҡырға арттырып, 78 мең тоннаға еткереү күҙаллана. Ошо маҡсатта ҡышҡы теплицалар майҙанын икеләтә киңәйтеү ҡарала.

Асыҡ һауала үҫтерелгән йәшелсәне иҫәпкә алғанда, йыллыҡ уңышты 450 мең тоннаға еткереү мөмкинлеге бар. Һөҙөмтәлә рес­публика халҡы үҙебеҙҙең ризыҡ менән тулыһынса тәьмин ителәсәк.
Башҡортостандың Ауыл хужалығы министрлығына теплицалар төҙөүгә ете ғариза тапшырылған. Ведомствола әйтеүҙә­рен­сә, халыҡты йәшелсә менән тотороҡло тәьмин итеү генә аҙ, продукцияны һаҡлау һәм эшкәртеү системаһын да яйға һалыу шарт. Әле республикала йыйылған уңышты һаҡларлыҡ келәт майҙандары етешмәй.
Былтыр йәшелсә уңышы 366 мең тонна булған. Был элгәре йыл менән сағыштырғанда 17 мең тоннаға күберәк. Ауыл хужалығы предприятиелары, фермер хужалыҡтары йәшелсә етештереүҙе ике тапҡырға тиерлек арттырған.