* Әгәр балыҡ тота башларға ниәтләп кенә тораһығыҙ икән, ҡыйбатлы кәрәк-яраҡ алмағыҙ. Күл буйына йыйынһағыҙ, еңел генә ике ҡармаҡ сыбығы ла етә. Ептең 0,2; 0,3; 0,5 миллиметрлыҡтарын алырға кәрәк. Тәүгеһе — ваҡ балыҡ, икенсеһе — ике-өс килограмлыҡтар, өсөнсөһө тере селбәрә кейҙереп, суртан тотоу өсөн.
* Юлда йөрөгәндә уңайлы булһын өсөн ҡармаҡ сыбығының йыйыла торғанын һайлау отошло.
* Ҡалҡыуыстарҙың үҙегеҙ эшләгәне ҡәҙерлерәк булыр.
* Бер нисә төрлө ырғаҡ алығыҙ.
* Ниндәй балыҡҡа барырға йыйынаһығыҙ, шуның яратҡан аҙығын алығыҙ. Мәҫәлән, һаҙандар ғаиләһенә ҡарағандар икмәк валсығы, борсаҡ, кукуруз, селәүсен, ҡарышлауыҡтарға өҫтөнлөк бирә. Суртанға, алабуғаға һәм һылаға иһә ваҡ балыҡтар оҡшай.
* Ағын урында ырғаҡҡа селәүсен, себен ҡорто, ҡыҙыл ҡорт кейҙерәләр, сөнки улар ысҡынмай.
* Балыҡтың ҡайҙалығын һыуға ҡарап белергә була. Мәҫәлән, ҡорман уйнағанда тәүҙә – ауыҙын, унан арҡа йөҙгөсөн өҫкә сығара. Аҙаҡ, ҡойроғон болғап, тәрәнгә сума. Табан һыу өҫтөндә түңәрәктәр барлыҡҡа килтерә, бағыр менән ағарсаҡ иһә өҫкә һикерә. Сабаҡ, ҡыҙылғанат, табан, ҡорман ҡамыш, үлән йолҡоп ашаусан.
* Балыҡҡа барғанда артыҡ йөк алмағыҙ: үҙегеҙҙе йонсоторһоғоҙ ғына.
* Кәмәлә йөҙһәгеҙ, уға ишкәкте тейҙерергә тырышмағыҙ: балыҡ ҡаса.
* Үҫә торған балыҡтарҙың вағын һыуға кире ебәрегеҙ.
* Яр буйында итәғәтле булырға, иптәштәреңде хөрмәт итергә кәрәк.
* Эргәңдәге кешенең мул табыш эләктергәнен күреп, ҡармағыңды уның яғына күсереү килешмәй.
* Балыҡсыларҙың үтенесенә ҡолаҡ һалып өйрән. Кемдер ырғаҡ, батырғыс, еп, ҡалҡыуыс, селәүсен һәм башҡа кәрәк-яраҡ һорай икән, ярҙам ит. Үҙеңдең дә шундай хәлгә тарыуың бар бит.
* Кәрәк-ярағыңды таҙа, теүәл тот.
* Ҡармаҡтың ағасҡа йә ташҡа эләгеүе хәүефле: ҡоралһыҙ ҡалыуың йә табышыңдан ҡолаҡ ҡағыуың ихтимал. Һыу һай икән, кисеп барып, эләккәнде ысҡындырып була. Тәрән ерҙә иһә, әгәр еп ныҡ булһа, ҡыуалды ырғаҡ яҙылғансы тартырға мөмкин.
Әгәр ҙә инде ҡармаҡ һыу аҫтындағы ҡыуаҡ, ағас тамырына эләкһә, уны еңел генә ысҡындырырмын тимә. Ҡаршы ярға сығырға йәки ҡолға ҡулланырға тура килер. Был ҡоралдың осон уртаға ярып, ҡармаҡ ебенең йүнәлеше буйынса тоҫҡап эш итергә кәрәк.