Хеҙмәт баҙарында Бөрө медицина-фармацевтика колледжы әҙерләп сығарған белгестәргә ихтыяж ҙур, шуға ла уларҙың 90 процентҡа яҡыны һөнәре буйынса урынлаша. Бында ҡабул итеп, уҡытып, ҡулдарына диплом тапшырып сығарыу менән генә сикләнеп ҡалмайҙар, эшле итеү яғын да хәстәрләйҙәр. Ә быға, нигеҙҙә, медицина-иҫкәртеү учреждениелары менән килешеү нигеҙендә өлгәшәләр. “Башфармация” дәүләт унитар предприятиеһы, үҙәк район дауаханалары белгес кәрәклеге хаҡында алдан заявка бирә. Шулай уҡ коммерция дарыуханаларында ла студенттарға ихтыяж бар. Липецк, Пермь, Ҡазан ҡалаларынан да саҡырыу алғандар.

– Беҙҙә уҡып һөнәр алырға теләгәндәр иф­рат күп. XI класты тамамлағас та, IX клас­тан һуң да ҡабул итәбеҙ. Көндөҙгө бүлектә лә (әле мең самаһы студент иҫәпләнә, уларҙың яртыһынан күберәге – бюджет нигеҙендә), ситтән тороп та уҡырға мөмкин. Хатта үҙҙәрендә ошондай уҡ колледж булған төбәктәрҙән дә киләләр. Сәбәбен беҙҙә төплө белем бирелеү менән аңлаталар. Уныһы дөрөҫтөр, сөнки барлыҡ уҡытыусылар ҙа үҙ эшен яҡшы белә, ижади ҡарашлы, заман талаптарын аңлай. Береһен дә айырып телгә алғым килмәй, шуны ғына әйтәм: һәр ҡайһыһы үҙ урынында.
Колледждың матди-техник базаһының ныҡлығы ла ылыҡтыра торғандыр, әлбиттә. 360 урынға иҫәпләнгән дөйөм ятаҡ бар, ике уҡыу бинаһында ете йүнәлеш буйынса белем бирелә. Уҡыу-тәжрибә майҙансы­ғында дарыу үләндәренең төрлөһөн үҫтерәбеҙ. Йыйып, төнәтмәләр, дарыуҙар яһайбыҙ, ҡулланырға өйрәтәбеҙ. Студенттар белемде бик теләп үҙләштерә, ҡыҙыҡһыныуҙары көслө. Юғиһә араларында бығаса хатта юл япрағын белмә­гәндәр ҙә осрай. Шулай уҡ һары мәтрүшкәне, ҡара миләште, әнисте, етенде һәм башҡа ҡайһы бер шифалы үләндәрҙе ҡулына алып та ҡарамаған үҫмерҙәр була, – тип колледж менән таныштырҙы уның директоры, Башҡортостандың атҡаҙанған һаулыҡ һаҡлау хеҙмәткәре Татьяна Красильникова.
Әйткәндәй, Татьяна Михайловнаның ғаилә династияһы ошо өлкәлә мәшғүл. Әсәһе ҡасандыр ошонда уҡытыусы була, әле ҡыҙы ла фармацевт һөнәрен һайлаған. Татьяна Красильникова 25 йыл етәкселек итә уҡыу йортона. Ошо осорҙа ул уҡыу йортон Рәсәйҙә алдынғы урынға сығара. Әйтәйек, республика кимәлендәге һөнәри конкурстарҙа колледж гел тәүге урындарҙы яулай. 2008, 2009 йылдарҙа ул “Рәсәйҙең иң яҡшы 100 урта махсус уҡыу йорто” иҫәбенә инә. Волга буйы федераль округы буйынса класс етәкселәре бәйгеһендә уҡытыусы Рөстәм Солтанов беренсе урынды яулай.
Фармацевтика бүлеге мөдире Айгөл Сураева Мәсетле районының Дыуан-Мәсетле ауылында тыуып үҫә. Пермь фармацевтика институтын тамамлағандан һуң эшкә йүнәлтмә буйынса килә. Күптән түгел Бөтә Рәсәй һөнәри оҫталыҡ бәйгеһендә студенттары Гөлназ Әхәтова менән Ксения Беспалова икенсе урынды яулаған.
Уҡыу йортоноң тарихына арналған музейҙа республикала дарыуханаларҙың үҫеш осорон сағылдырған бай йөкмәткеле экспозиция менән танышырға була. Йәнә колледждың ғорурлығы – дауалау-иҫкәртеү һәм фармацевтика учреждениелары эшмә­кәрлеген сағылдырған ҡеүәтле техник база. Кластарҙа күп һандағы муляждар, башҡа заманса ҡорамалдар ярҙамында студенттар практик тәжрибә туплай.
Бөрөләге был уҡыу йортон элек-электән яҡшы беләләр тиһәк, яңылыш булмаҫ. 1934 йылда барлыҡҡа килгән, бай тарихлы ул. Заман, әлбиттә, үҙ үҙгәрештәрен индерә тора. Мәҫәлән, 2005 йылда, медицина һәм фармацевтика колледждары берләштере­леп, яңы урта һөнәри белем биреү колледжы барлыҡҡа килә. Ә 2010 йылда Башҡортостан Хөкүмәте ҡарары менән колледж автономиялы белем биреү учреждениеһы статусын ала.
Әле бында яҡын-тирәләге райондарҙан ғына түгел, ә тотош республиканан, мәҫәлән, Октябрьский, Стәрлетамаҡ, Йылайыр, Бай­маҡ кеүек алыҫ төбәктәрҙән дә килеп уҡыйҙар.
Ҡабул итеү, һөнәри белем биргән башҡа колледждарҙағы кеүек үк, конкурс нигеҙендә үткәрелә. Йәштәр дауалау, шәфҡәт туташы эше, лаборатор диагностика, фармация, акушерлыҡ, ауырыуҙарҙы тәрбиәләү буйынса кесе медицина хеҙмәткәрҙәре әҙерләгән бүлектәрҙә ҙур теләк менән уҡый. Инеү шарттары дөйөм, бары тик егет һәм ҡыҙҙарҙың һөнәрен яратып һайлауы ғына кәрәк.