Языков ауылынан Миләүшә һәм Фәнис Абзаловтарҙың үҙ-ара мөнәсәбәтенә, бәхетле йылмайыуҙарына ҡараһаң, был кешеләр шул тиклем рәхәт, бер ҡайғы күрмәй йәшәй, донъялары имен, уларға муллыҡ күктән яуа икән, тип уйларға ла була. Бәлки, бәрәкәт, ысынлап та, күктән яуа торғандыр, сөнки икеһе лә ишле ғаиләлә үҫкәс, уларҙың туғандарына, яҡындарына, таныштарына ныҡлы терәк, ышаныслы ҡалҡан икәненә бына инде бик күп йылдар шаһитмын.

Кешеләрҙең рәхмәте, ҡыс­ҡырып әйтмәһәләр ҙә, риза булып ҡалыуы барыбер эҙһеҙ үтмәй бит ул. Абзаловтар ҙа ҙур ҡайғылар кисерһә лә, иң тәү сиратта, бер-береһенә ҡеүәт бирә белде. Башта Фәнистең ата-әсәһе бер-бер артлы яҡты донъя менән хушлашты. Ул ваҡытта Благовар районының Яныш ауылында йәшәй ине әле йәштәр. Миләүшәнең атаһының да һис көтмәгәндә баҡыйлыҡҡа китеп барыуына бына хәҙер тиҫтә йыл булып килә. Тормош булғас, төрлө хәлдәр була: әле был эш килеп сыҡмай, әле тегенеһендә ҡаршылыҡтар тыуа. Әммә ғаиләнең ныҡлығы ла тап аңлашып, бер-береңә таяныс була белеүҙәлер, күрәһең. Бер үк телдә һөйләшеп тә, аңлаша алмаған шундай саҡтарыбыҙ аҙмы ни? Ә уларҙың мөнәсәбәте хатта күҙ ҡарашынан аңлашыуға ҡайтып ҡала. Ниндәй эш башҡарһалар ҙа, нимәгә генә тотонһалар ҙа, бергәләп, кәңәшләшеп башҡара улар.
Балаларын да шулай өйрәткәндәр. Беҙ барып төшкәндә VII һәм II класта уҡыған улдары Денис менән Ислам мәктәптән ҡайтып, өйгә эштәрен теүәлләй ине. Өлкән ҡыҙҙары Эльвина, атаһы юлын һайлап, бөгөн Өфөнөң сауҙа-иҡтисад колледжында ер-мөлкәт мөнәсәбәттәре буйынса белем ала. Атаһы юлын һайлап тигәндән, Фәнис Фәрит улы ла Яныш урта мәктәбен тамамлағандан һуң, Өфөлә 52-се һөнәрселек училищеһында, Кушнаренко ауыл хужалығы техникумында уҡыған. Төрлө өлкәлә үҙен һынап ҡараған. Бөгөн юғары уҡыу йортонда белемен камиллаштыра.
Ә бит шәхси эшҡыуар булып киткәнсе, уға байтаҡ ҡаршы­лыҡтар аша үтергә тура килә. Беҙҙә бик күп яңы документтарға ҡул ҡуйылһа ла, уларҙы ҡулланып эшләй белеүселәр һирәгерәк шул. Аллаға шөкөр, Фәнис Абзалов төбәктә тәүге­ләрҙән булып тәүәккәлләп ер мәсьәләләре буйынса шәхси эшҡыуарлыҡты башлап ебәрә. Рәсәйҙә, Башҡортостанда ҡабул ителгән закондарҙы, тап бәләкәй эшҡыуарлыҡҡа бәйле ҡанун­дарҙы, башҡаларҙың тәжрибәһен ныҡлы өйрәнгәндән һуң, ул ҡыйыу аҙымдар менән үҙенең шәхси эшен асырға ҡарар итә. Район поликлиникаһында шәф­ҡәт туташы булып эшләгән ҡатыны Миләүшә лә уның ниәтен хуплап ҡаршы ала. Ер, күсемһеҙ милеккә бәйле мәсьәләләр, документтар әҙерләү, хатта ябай ғына кәңәш менән дә яҡташтары уларға мөрәжәғәт итә.
Әлбиттә, һәр эштең үҙенсәлектәре булған кеүек, шәхси эшҡыуарлыҡта килем алыу менән бергә һалым түләү, тейешле органдарға ваҡытында отчет биреү кеүек талаптар ҙа бар. Уныһына ла төшөнөргә әллә ни күп ваҡыт кәрәкмәгән ғаилә башлығына. “Кеше башҡара алмаҫлыҡ эш юҡ ул донъяла”, – тип ҡабатларға ярата ул.
Йәнә лә был ғаиләлә кире, тиҫкәре хәбәр һөйләмәйҙәр. Уларҙың һәр эше башында, һәр аҙымдары алдынан доға менән бергә “Беҙ булдырабыҙ!” тигән һүҙҙәр ята. Баҡтиһәң, бәхет сере ябай ғына икән дә: ул һинең донъя­ны ҡабул итеүеңә, яҡын­дарың менән бергә булыуыңдан шатлыҡ кисереүгә бәйле. Бындай ғаиләләр менән аралашҡандан һуң күңелдә уларҙың бәхетенең бер өлөшө менән һуғарылғандай тояһың үҙеңде. Ҡалай дөрөҫ әйтелгән киң билдәле һүҙҙәрҙә: бәхетле ғаиләләр бер-береһенә оҡшаш. Эйе, уларҙа именлек, хеҙмәт тәрбиәһе хөкөм һөрә, бер-береһенең кисерештәренә ихтирам ярылып ята!