Быйылғы ҡышта һауа торошоноң тотороҡһоҙлоғо шаҡ ҡатыра: йә ҡапыл һыуытып, икенсе көнөнә йылытып ебәрә, йә буран сыға,
саманан тыш шашып ҡар яуып ебәрә. Һуңғы өс көндә һауа шарттары насар булыу сәбәпле Өфө – Ырымбур юлына сыҡмау хәйерлерәк, тип иҫкәртә Рәсәй Ғәҙәттән тыш хәлдәр министрлығының Башҡортостан буйынса идаралығы.
Ошо көндәрҙә Мәләүез, Күгәрсен, Ейәнсура, Көйөргәҙе райондарында ҡар ҡатыш ямғыр яуған. Шуға күрә юл насар. Алдағы көндәрҙә һауа торошо әллә ни үҙгәрмәйәсәк, буран сығыуы, ҡар яуыуы көтөлә.
Һауа шарттары арҡаһында юл ҡатламында боҙлауыҡ барлыҡҡа килеүе тураһында ЮХХДИ идаралығы етәксеһе Динар Ғилметдинов та иҫкәртә.
Кисә Көйөргәҙе районында дүрт машинаның бәрелешеүе сәбәбе – водителдең машинаға идара итеү һәләтен юғалтыуы. Аварияла дүрт кеше төрлө тән йәрәхәттәре алған.
Ярҙам кәрәк саҡта 01 һәм 112 телефондарына шылтыратығыҙ. Рәсәй Ғәҙәттән тыш хәлдәр министрлығының Башҡортостан идаралығы телефондары: 233-99-99, 8-800-100-11-20.