Ғинуар, февраль айҙары – һәр белем усағы өсөн бик мөһим һәм үҙенсәлекле мәл. Ни өсөн тиһегеҙме? Сөнки тап ошо арауыҡта төрлө йылдарҙағы сығарылыш уҡыусылары туған “йортҡа” осрашыуға йыйыла. Һағыныу-күрешеүҙәр, хәтирә-иҫтәлектәр... Эх, ҡыңғыраулы мәктәп йылдары!

Рәми Ғарипов исемендәге 1-се башҡорт республика гимназия-интернаты уҡыусылары ла был күркәм йоланы дәррәү башҡара. Уны тамамлағандарҙың быйылғы осрашыуы концерт-дискотека рәүешендә “А кафе” клубында үтәсәк, тип белдерҙеләр сараны ойоштороусылар.
“БРГИ”лар тигән һүҙ генә лә күҙ алдында рухлы, илһөйәр, ғилемле ҡыҙ һәм малайҙарҙы пәйҙә итә. Республика йәшәйешенең төрлө тармаҡтарында намыҫлы хеҙмәт үтәй милләтебеҙҙең йөҙөк ҡашына тиң был гимназияла уҡып сыҡҡандар. Йәштәр белем усағын тамамлағас та бер-береһенә ярҙамлашып, дәртләндереп, татыу аралашып, ҡатнашып ғүмер итә. Күпме йылдар дауамында бер интернатта йәшәү, бер класта уҡыу, йәғни тормоштоң билдәле бер һикәлтәһен үтеүгә тиң мәлдең һәр “ҡошсоҡ”тоң йөрәгендә онотолмаҫлыҡ хәтирәләр, ҡыҙыҡлы ваҡиғалар, фәһемле күренештәр рәүешендә уйылып ҡалыуына шик юҡ. Ошо йылы иҫтәлектәр менән уртаҡлашыу, күрешеү маҡсатында ойошторолған осрашыу 22 ғинуарға тәғәйенләнгән. Әйтергә кәрәк, “А кафе”лағы сараны Рөстәм Ғиззәтуллин, “Ант” төркөмө, Айгөл Әминева башҡарыуында һәм башҡа дәртле йыр-моң биҙәйәсәк, тамашасылар араһында мауыҡтырғыс уйындар, бәйгеләр үткәреләсәк. Республиканың абруйлы белем усағында уҡып сыҡҡан һәр гимназисты күңелле, күркәм осрашыуҙа көтөп ҡалалар. Бәйләнеш өсөн телефон: 8-909-351-66-35. Сара киске сәғәт 10-да башлана.