Башҡортостандың көньяҡ-көнсығыш төбәге райондары өсөн ауыл хужалығы белгестәрен әҙерләүгә ҙур өлөш индергән Урал аръяғы агросәнәғәт колледжы 40 йыллыҡ юбилейын билдәләй. Был байрамды ниндәй ҡаҙаныштар менән ҡаршы алыуҙары хаҡында белешер өсөн уҡыу йорто директоры Илнур МЫРҘАГИЛДИНға мөрәжәғәт иттек.
– Илнур Марат улы, кол­ледждың тарихына туҡтал­мау яҙыҡ булыр, эйеме?..
– Әлбиттә, сөнки уҡыу йор­тоноң элеккеһе лә, бөгөнгөһө лә иғтибарға лайыҡ. Тарихы 1975 йылда Баймаҡта асылған 29-сы һөнәрселек училище­һынан башланған, һуңынан ул ошондай уҡ 105-се училище булып киткән. Исеме бынан өс йыл элек – Баймаҡ ауыл хужа­лығы колледжы, бөгөн иһә Урал аръяғы агросәнәғәт колледжы тип үҙгәртелде.
Әйтергә кәрәк, ошо йылдарҙа учреждение үҫә, матди-техник базаһы нығына, төбәк өсөн квалификациялы белгестәр әҙер­ләүҙә ҙур ҡаҙаныштарға өл­гәшелә. Бында, әлбиттә, төрлө йылдарҙа эшләгән етәксе­ләр­ҙең, уҡытыусыларҙың, мастер­ҙарҙың һәм башҡа хеҙмәт­кәр­ҙәрҙең өлөшө баһалап бөткө­һөҙ. Бөгөн беҙҙең учреждение Әбйәлилдәге 93-сө, Иҫке Соб­ханғолдағы 132-се һөнәрселек училищеларын, Урғаҙалағы Баймаҡ ауыл хужалығы техникумын берләштерә, үҙәк булып һанала.
– Уҡырға килеүселәр күп­ме? Коллектив нисек туп­ланған?
– Әле беҙҙә 1200 студент уҡый, улар менән ижади ҡа­раш­лы, бай тәжрибәле остаздар эшләй. Колледждың Бай­маҡтағы үҙәк учреждениеһында 23 уҡытыусы, дүрт тәрбиәсе, 13 про­изводствоға өйрәтеү мас­теры һәм 40 административ идара итеү, хужалыҡ хеҙмәт­кәрҙәре эшләй.
– Ниндәй һөнәр йә йүнә­леш буйынса белем бирелә?
– Уҡыу йорто “В”, “С”, “Д”, “Е”, “Ғ” категориялы тракторсы-машинист, йорт хужабикәһе, иретеп йәбештереүсе, ағастан художестволы әйберҙәр эш­ләүсе, автомеханик, тегенселек операторы, ашнаҡсы-кондитер, һатыусы, контролер-кассир һөнәр­ҙәре буйынса белгестәр әҙерләй. Бынан тыш уҡыу­сы­ларҙың “В”, “С” категориялары буйынса водитель, ашнаҡсы, токарь, малдарҙы яһалма ҡа­сырыу буйынса оператор, ауыл хужалығы машиналары һәм ҡоролмаларын ремонтлаусы слесарь һәм ЭВМ операторы һөнәрҙәрен үҙләштереү мөм­кинлеге бар.
Колледждың матди базаһы барлыҡ талаптарға яуап бирә: дүрт уҡыу корпусы, ятаҡ, ашхана, спорт залы, китапхана, медпункт, тамаша залы, йылы­тылған гараждары булған машина ихатаһы, оҫтаханалар бар. Машина-трактор паркында дүрт еңел, алты йөк автомоби­ле, 12 трак­тор, өс комбайн бар, 262 гектар еребеҙҙә ауыл ху­жа­лығы культуралары үҫте­ре­лә, мал аҙығы әҙерләнә. Уҡыу хужа­лы­ғында 17 баш һыйыр ма­лы аҫ­рала, ете бал ҡорто күсе иҫәп­лә­нә. Һуңғы йылдарҙа авто­трак­тородромға асфальт тү­шәл­де, уҡыу ҡоролмалары, стендтар һатып алынды. Һы­йыр малын аҫрау өсөн тәғәйен производство базаһы ремонтланды. Урғаҙа, Әбйәлил фи­лиал­дарын­да ла ҙур эштәр башҡарылды.
Колледж шулай уҡ социаль партнерлыҡ мөнәсәбәттәрен үҫтереүгә етди иғтибар бүлә – республиканың, райондың ауыл хужалығы предприятиелары, крәҫтиән (фермер) хужа­лыҡ­тары, ойошмалар менән тығыҙ бәйләнеш булдырыла. Ленин исемендәге, “Баймаҡ тәжрибә хужалығы”, “Рассвет” хужа­лыҡ­тары, “Толпар” йәмғиәте, “Урал аръяғы – Агро” МТС-ы, Күлта­бандағы мегаферма, Баймаҡ ме­ханиза­цияланған күсмә ко­лон­наһы, район ветеринария станцияһы, Өфө ра­йонының “Алексеевка” совхозы, Яр Саллы ҡалаһының “КамАЗ” йәм­ғиә­те, Учалы районының “Бай­рамғол” агрофирмаһы һәм баш­ҡалар менән килешеүҙәр төҙөл­гән. Улар нигеҙендә сту­дент­та­рыбыҙ производство прак­ти­каһы үтә, аҡса эшләү мөмкин­леге лә бирелә.
– Колледжда мәҙәни эш­мәкәрлек ниндәй кимәлдә ойошторолған?
– Уҡыу йортоноң коллективы ҡаланың һәм райондың йәмәғәт тормошонда әүҙем ҡатнаша. Бөйөк Еңеүҙең 70 йыллығына ар­налған конкурста лайыҡлы сығыш яһанылар, “Студент яҙы” төбәк конкурсында, фольклор коллективтары араһында иң көслөһө тип танылдылар. “Баш­ҡортостан ынйылары” республика фестивалендә лә кол­ледждыҡыларға етеүсе булманы. Ҡала, район буйынса үт­кә­релгән спорт ярыштарында ла уҡыу йорто хеҙмәткәрҙәре, уҡыусылар әүҙем ҡатнаша, ҙур еңеүҙәр яулай.
Урал аръяғы агросәнәғәт колледжы заман һынауҙарына бирешмәҫ, артабан да үҫер, төбәк өсөн кәрәкле белгестәр әҙерләүҙе лайыҡлы дауам итер – быға иманыбыҙ камил.