Профессиональ боксерыбыҙ Денис Шафиҡов IBF версияһы буйынса еңел ауырлыҡ үлсәмендә донъя чемпионы исеме өсөн алышасаҡ. Бөгөн АҠШ рингында Силәбе өлкәһенең Мейәс ҡалаһында тыуып үҫкән башҡорт егете әлегә тиклем еңелеү белмәгән Куба спортсыһы Рансес Бартелемиға ҡаршы сыға.

Һуңғы айҙарҙа Денис Шафиҡов көрәшкә Америкалағы Биг Бэр тауында әҙерләнде, ғәйәт ҙур эш башҡарҙы. “Сыңғыҙхан”дың физик әҙерлегенә планеталағы иң көслө боксерҙар ҙа көнләшерлек.
Бартелеми иһә күптән түгел генә был алышҡа бик етди ҡарауы хаҡында бел­дергәйне. Ҡаршы яҡтың өҫтөнлөктәренә һәм букмекерҙарҙың биштән дүрт өлөшө Куба өсөн ставка яһауына ҡарамаҫтан, Денистың командаһында рух күтәрен­келеге тантана итә.
– Денис әлегә тиклем берәү ҙә күрмәгәнсә алышыр тип уйлайым, – ти уның менеджеры Леонид Королинский.
– Куба спортсыһы, һис шикһеҙ, көслө. Бартелеми үҙен һәүәҫкәрҙәр араһында ла күрһәтеп өлгөрҙө, еңелерәк ауырлыҡ категорияһындағы профессионалдар араһында донъя чемпионы исемен дә яуланы, – тип белдерҙе “Урал Бокс Промоушен” компанияһы президенты, бокс буйынса Рәсәйҙең атҡаҙанған тренеры Евгений Вайнштейн. – Еңеү өсөн Шафи­ҡовҡа ҙур тырышлыҡ һалырға тура киләсәк. Шулай ҙа беҙ чемпион исеме менән әйләнеп ҡайтырға иҫәп тотабыҙ.
Шафиҡовтың тренеры Абель Санчес Куба спортсыһының Денистан 15 сан­тиметрға бейегерәк булыуында әллә ни проблема күрмәй (Шафиҡовтың буйы – 165, Бартелемиҙыҡы – 180 см).
– Боксерҙарымды төрлө кәүҙәлеләргә ҡаршы сығырға әҙерләйем. Бартелемиға һәм уның командаһына ғына уңайһыҙ тура килер, – ти Санчес. – Әҙерлек барышында Денис буйы 183 сантиметрлыҡ Дорис Хукерға, башҡа оҙон буйлы егеттәргә ҡаршы сыҡты. Уның чемпион исемен алырына ҙур өмөт бағлайым.
Әйткәндәй, Шафиҡов еңел ауырлыҡ үлсәмендә IBF чемпионы титулын яуларға үҙ карьераһында икенсе тапҡыр ниәтләй. Былтыр февралдә ул Мексика спортсыһы Мигель Васкес менән алышып, еңелгәйне.
– Шул уңышһыҙлыҡтан һуң киләһе алышта барыһына ла яңы ҡаҙаныш­тарымды күрһәтмәксемен, – ти Денис. – Донъя чемпионы исеме өсөн миңә ҡаршы сығасаҡ спортсы, уның уңыштары хаҡында нимә генә һөйләмәһендәр, йома көндө рингта барыһы ла асыҡланасаҡ.
Лас-Вегастан тура тапшырыуҙы “Матч ТВ” каналында 19 декабрҙә Өфө ваҡыты буйынса иртәнге сәғәт 9-ҙа ҡарарға мөм­кин. Алышты иғтибарһыҙ ҡалдыр­майыҡ һәм үҙебеҙҙең егеткә еңеү теләйек!