Яҙылмаған ҡанун инде ул: йәше лә, ҡарты ла ап-аҡ, сихри ҡышты түҙемһеҙләнеп көтә. Ниһайәт, тап шундай миҙгелгә аяҡ баҫабыҙ ҙа шикелле. Тирә-яҡтың хозурлығы, камиллығы һүрәткә төшөрөүҙе генә үҙһенмәй, күңелдәргә инеп ҡуна, илһамландыра, хистәрҙе байыта, аңлатып та ғына булмаҫлыҡ һоҡланғыс, матур кәйеф тыуҙыра. Редакцияға килгән хаттар араһында ла ошо ҡышҡы ихласлыҡ, изгелек менән һуғарылғандар байтаҡ. Рәхмәт тә, шатлыҡ та, көйөнөс тә бар уларҙа. Сираттағы тупланмала ошо хаттарҙың тос-тос өлөштәрен тәҡдим итәбеҙ
* * *

Гөлфирә ҒӘСКӘРОВА,
Дәүләкән ҡалаһы:
“...“Башҡортостан”дың һәр һанын уҡып, республика, ил, донъя яңылыҡтары менән танышып барабыҙ. Тормош-йәшәйешебеҙ, эшҡыуарлыҡ менән шөғөлләнгән йүнселдәр тураһындағы мәҡәләләр, яҡшы кешеләр хаҡындағы һүрәтләмәләр, тарихҡа, әҙәбиәткә һәм мәҙәниәткә арналған яҙмалар бик оҡшай”.

* * *
Рәйлә ИШБУЛДИНА, Өфө ҡалаһы:
“... М. Ғафури исемендәге Башҡорт даүләт академия драма театрында Әхмәтзәки Вәлиди Туғандың тыуыуына 125 йыл тулыуға арналған X Рәсәй шәрҡиәтселәр съезы үтте. Беҙ унда бөйөк шәхестең балалары Иҫәнбикә, Субидәй Туғандар менән осрашып, атайымды һәм ҡартатайымды иҫкә алдыҡ. Атайым Әхмәтғәли Ишбулдин 1896 йылда Бүздәк районының Ҡаңны-Төркәй ауылында тыуған. Мәҙрәсәлә Әхмәтзәки Вәлиди менән бергә уҡыған, дуҫ булғандар”.

* * *
Хәмит ЙӘҒӘФӘРОВ, Ҡырмыҫҡалы ра­йоны:
“...Иҫке Шәрәй ауылының Телеграф урамында халыҡты эсәр һыу менән тәьмин итәсәк скважина асылды. Был изге эште тормошҡа ашырыу – Өфө ҡалаһындағы Киров районының “Ишбулды” мәхәлләһе ағзаларының тырыш, күркәм хеҙмәте. Хәҙер халыҡ таҙа, хәүефһеҙ һыу эсеү мөмкинлегенә эйә”.

* * *
Сәйҙә СӘЙӘХОВА,
Бөрйән районы:
“...Ғәзиз Башҡортостанын, халҡын яратҡан, туған телебеҙҙең тоғро һаҡсыһы булған олуғ ғалимәнең бар булмышы халыҡ хәстәре менән һуғарылыуы – һоҡланғыс күренеш. Беҙҙең райондағы белем усаҡтарының матди-техник базаһын нығытыуға ҙур көс һалды Фирҙәүес Ғилметдин ҡыҙы. Мәһәҙей мәктәбенә өр-яңы трактор алып бирҙе, ул әле һаман ҡулланыла – балалар мәнфәғәтендә файҙаланыла. Китапханаларҙы байытыуҙа ҙур ярҙам күрһәтте. Фирҙәүес Хисамитдинова райондағы һәр мәктәпкә инеп, хәл-әхүәлен һорашып, техник базаһы менән танышып сығырға ла ваҡыт тапты. Белем усағына килеп ингәндә үк һәр кем менән яғымлы, ихлас һаулыҡ һорашып, иғтибар бүлеп, һөйләшеп үтә ине. Эшен бик яратып башҡарҙы. Бөрйән халҡы исеменән Фирҙәүес Ғилметдин ҡыҙына оло рәхмәтебеҙҙе еткерәбеҙ, сәләмәтлек, яңы ҡаҙаныштар теләйбеҙ!”

* * *

Вараҡа Ғәләүетдинова, Ишембай районы:
“...Бына тағы гәзиткә яҙылыу ваҡыты етте. Ҡыуанып барып яҙылдым. Райондаштарымдың подписка буйынса 3-сө урынды алыуҙарына һөйөндөм, ә насар һөҙөмтә биргән төбәктәр өсөн көйөндөм.
Эргәлә генә – Торатау. Уның хозурлығына һоҡланып туя алмайым. Халыҡ көслө, ошо ғорур тауҙы һаҡлап ҡалырлыҡ ғәйрәтебеҙ бар. Йәшәһен “Башҡортостан”! Рух һүнмәһә, илебеҙ йәшәр”.