Водителдең юлда имен-һау йөрөүе нимәгә бәйле? Тәжрибәгә, йәшкә? Эйе, барыһына ла. Йәнә бығаса әллә ни иғтибарға алынмаған бер нәмә мөһим икән: астрология. Автомобиль йөрөтөүсенең юл хәрәкәтен боҙоуы ла, шулай уҡ транспорт бәлә-ҡазаһынан ҡотолоу мөмкинлеге лә уның ниндәй йондоҙлоҡҡа ҡарауына бәйле, ти. Шуныһы ғәжәп: быны астрологтар түгел, ә Американың страховкалау компанияһы хеҙмәткәрҙәре асыҡлаған.
Улар юлдағы уңышһыҙлыҡ бу­йынса тәүге урында Үл­сәүҙе билдәләгән, икенсе – Һыуғояр, имеш. Был йон­доҙлоҡ аҫтында тыуғандар руль артында үҙҙәрен башҡаларға ҡарағанда үтә насар тота, шуға йыш ҡына бәхет­һеҙ­леккә дусар була.
Өсөнсө урында – ҡуҙы­лар. Уларҙың ҡыҙыу, сабыр­һыҙ булыуы иҫбатланған. Руль артында бындай сифаттар яҡшыға алып бармай.
Балыҡтар – дүртенсе баҫ­ҡыста. Тикшереүселәр улар­ҙы үтә хисле, уйға бирелеүсән тип һанай. Трассала шәп тиҙлек ме­нән китеп барғанда ла балыҡтар нимәлер уйлана, йыш ҡына мө­хәббәт хаҡында хыялланып, “күктә йөҙә” һәм хәүефле урын­дарҙы һиҙмәй ҡала.
Исемлек уртаһында – саяндар. Дөйөм алғанда, улар насар водитель түгел – иғтибарлылар, үҙҙәренә ышаналар. Әммә төп проблема – башҡаларға юл би­рергә теләмәйҙәр. Әгәр бүтән машиналағылар уҙып китә икән, был уның асыуын килтерә, һәм ике арала уҙыш башлана. Билдәле, хәл йыш ҡына күңелһеҙ тамамлана.
Алтынсы урынға буға­ларҙы ҡуйғандар. Уларҙың төп бәләһе – үҙһүҙлелек, теләһә нисек үҙең­декенә өлгәшергә ынтылыу. Ысын Буға бер ҡасан башҡаға юл бирмәҫ – был йыш ҡына бәлә-ҡазаға алып килә. Све­то­форҙы ла һанлап бармайҙар.
Етенсе баҫҡысты уҡсы­лар биләй. Улар бүтәндәрҙән иркенлек һәм мажара яратыуы менән айырылһа ла, руль артында тәртип һаҡлай, пассажир менән аралашып бармай, телефондан һөйләшергә лә әүәҫ түгел. Тик­шереү һө­ҙөм­тәһе күрһәтеүенсә, бары башҡаларҙың уны тынғы­һыҙлауы ғына юл фажиғәһенә килтереүе мөмкин.
Тотанаҡлы һәм ныҡыш Кә­зә­мөгөҙ исемлектең һиге­ҙенсе урынын биләй. Әммә уларҙы эгоизм харап итеүсән. Кәзәмөгөҙҙәр бары ныҡ ҡабаланғанда, башҡа­ларҙың уға юл биреүен мотлаҡ тип иҫәпләп, хәрәкәт ҡағиҙәләрен иҫенән сығарғанда ғына фажиғәгә тарый.
Ҡыҙҙар – туғыҙынсы урында. Тотанаҡлылар, тәртип­ле­ләр, йыйнаҡтар, барлыҡ ҡа­ғиҙәләрҙе теүәл үтәүе менән иғтибарға лайыҡтар. Башҡа­ларға йыш юл бирәләр, шуға ла кәрәк урынға бүтәндәргә ҡарағанда оҙағыраҡ барырға тура килә уларға.
Унынсы баҫҡысты биләгән ҡыҫалалар, уйға бирелергә ярат­һа ла, һаҡлана белә, шулай ҙа уңайы килгән һайын сигнал биреп, башҡаларҙы борсорға ярата.
Игеҙәктәр машинала йөрөүҙән ғәләмәт ләззәт ала. Был йондоҙ­лоҡ аҫтында тыуғандар ғүмер буйы руль артында йөрөргә риза. Ун икенсе урынға сыҡҡан арыҫландар — юлда иң тынысы, үҙенә ышанған ке­шеләр. Шуға күрә улар фажиғәләрҙән алыҫ тора.