Республикабыҙҙың бишенсе саҡырылыш парламентының егерме дүртенсе ултырышы Башҡортостан Башлығы Рөстәм Хәмитовтың Дәүләт Йыйылышы – Ҡоролтайға быйылғы Мөрәжәғәтнамәһе менән башланып китте. Бынан тыш, депутаттар Хөкүмәт Премьер-министрын тәғәйенләү мәсьәләһен хәл итте, алдағы йылдарға бюджет тураһындағы һәм башҡа закон проекттарын, социаль-иҡтисади үҫеш прогнозын ҡараны.
– Биш йыл элек ошо трибунанан депутаттар алдында сығыш яһағанда мин яңы Хөкүмәттең төп эш йүнәлештәрен, атап әйткәндә, кешеләр мәнфәғәтендә эшләү, властың асыҡлығы һәм ғәҙеллеге, республика граждандарының тормош сифатын яҡшыртыу буйынса маҡсаттарҙы билдәләгәйнем, – тине Рөстәм Зәки улы. – Уҙған йылдарҙа бик күп эш башҡара алдыҡ. Йоғонтоло социаль сәйәсәтте тормошҡа ашырыу, башҡа төбәктәрҙән һәм илдәрҙән инвестиция йәлеп итеү өсөн иҡтисади һәм финанс нигеҙебеҙҙе нығытыу буйынса системалы саралар күрелде.
Башҡортостан етәксеһе 2010 йылдан алып республикабыҙ сәнәғәтенең 40 процентҡа үҫеүен, инвестицияларҙың ике тапҡырға артыуын һәм башҡа ҡаҙаныштарҙы әйтеп үтте. Социаль мәсьәләләрҙе хәл итеүҙә лә етди аҙымдар яһалған. Уртаса эш хаҡы һәм халыҡтың килеме ошо һуңғы биш йылда бер ярым тапҡырға күтәрелгән, тыуым – 5,5 процентҡа, ә тәбиғи үҫеш 2,6 тапҡырға артҡан. Өс йәштән ете йәшкә тиклемгеләр өсөн балалар баҡсаһына сират мәсьәләһен хәл итеү тамамланып килә.
– Хәҙер беҙгә артабанғы аҙымдар тураһында уйларға кәрәк, – тине республика етәксеһе. – Башҡортостандың 2030 йылға тиклемге үҫеш стратегияһы яңыртыу йүнәлешен дауам итәсәк, ул хәҙерге иҡтисади хәлдең ҡатмарлыраҡ булыуын да иҫәпкә ала.
Яҡын киләсәктәге был эш ҡатмарлы проблемаларҙы хәл итеүҙе лә күҙ уңында тота. Уларҙың иң мөһимдәренән Рөстәм Зәки улы демография мәсьәләһенә айырым туҡталып китте. Башҡортостан Хөкүмәтенә медицина ойошмаларының эшен яҡшыртыу, халыҡты сәләмәт тормош ҡанундарына күнектереү һәм башҡа саралар буйынса аныҡ тәҡдимдәр әҙерләргә ҡушылды.
Депутаттар республика Башлығына Хөкүмәт Премьер-министрын тәғәйенләүгә ризалыҡ бирҙе.
– Рөстәм Хәбиб улы етәкселе­гендә беҙҙең Хөкүмәттә көрсөккә ҡаршы саралар күреү, ҡаҙна сығымдарын һаҡсыл тотоноу, дәүләт идараһын камилыраҡ итеү буйынса эҙмә-эҙлекле эш алып барыла, – тине Башлыҡ, яңы Премьер-министрҙы вазифаһы менән ҡотлап.
Ҡануниәтте байытыуға депутаттар ҡабул иткән ике тиҫтәнән ашыу закон проекты ла үҙ өлөшөн индерәсәк. Улар, нигеҙҙә, социаль йүнәлешле. Мәҫәлән, дәүләттең күп балалы ғаиләләрҙе яҡлауы тураһындағы закон ауыл ерендә йәшәгән ошондай ғаиләләр айлыҡ пособие алғанда, коммуналь хеҙмәттәргә түләү буйынса аҡсалата ташлама юллағанда был ярҙамды адреслы итеү маҡсатын ҡуя.
2016 һәм 2018 йылға тиклемге осорға социаль-иҡтисади үҫеш прогнозы, тәбиғи, тотош илдең иҡтисади хәленән айырым була алмай. Был күҙаллауҙың нигеҙ варианты яҡын киләсәктә нефттең донъя баҙарындағы уртаса хаҡы – бер баррелгә 60-70 доллар, ә милли валютаның курсы 2018 йылға саҡлы бер долларға 60 һум булыр тип иҫәпләп эшләнгән.