IV Бөтә донъя башҡорттары ҡоролтайына әҙерлек уңайынан Сибайҙа ҡала башҡорттарының ҡоролтайы үтте. Уның эшендә Бөтә донъя башҡорттары ҡоролтайының Башҡарма комитеты ағзалары — Рәсәйҙең Дәүләт Думаһы депутаты, Башҡортостан халыҡтары ассамблеяһы рәйесе Зөһрә Рәхмәтуллина, Башҡорт дәүләт университетының Сибай институты директоры Зиннур Йәрмөхәмәтов, Сибай ҡалаһы башҡорттары ҡоролтайының башҡарма комитеты рәйесе Ирек Бикмәтов һәм башҡалар — ҡатнашты.


Сибай башҡорттары ҡоролтайы төбәктә халҡыбыҙҙың үҙаңын нығытыу, телде, мәҙәниәтте, ғөрөф-ғәҙәттәрҙе һаҡлау һәм үҫтереү буйынса ғәйәт ҙур эш башҡара. “Башҡортостан халыҡтары телдәре тураһында”ғы Законды бойомға ашырыу йәһәтенән ҡала хакимиәте ҡарамағында ойошторолған комиссия эшендә лә ҡоролтай ағзалары әүҙем ҡатнаша. Ойошмаларҙың, магазиндарҙың алтаҡтаһын башҡортса яҙыуға, яңы барлыҡҡа килгән урам, биҫтәләргә арҙаҡлы шәхестәребеҙҙең исемен биреүҙе юллауҙа уларҙың тырышлығы баһалап бөткөһөҙ ҙур. Тап ҡоролтайҙың хәстәрлеге менән ҡала биләмәһенә ҡараған Төйәләҫ ауылы “Айыҡ ауыл” республика конкурсында ыңғай һөҙөмтәгә өлгәште.
— 2011 йылда, был вазифаны үтәй башлағанда, ауылда эшһеҙлек, эскелек хөкөм һөрә, ни бары өс-дүрт кеше үҙ эшен асҡан ине. Хәҙер уларҙың һаны утыҙҙан ашты, халыҡ сәләмәт тормошҡа яңынан йөҙ борҙо, эскелектең ни тиклем яман эҙемтәләргә килтереүен аңланы. Бында аҡһаҡалдар ҡорон ойошторҙоҡ, ветерандар советының эше йәнләнде. Бигерәк тә мәктәп директоры Фуат Бикбаевтың, имам, йәш быуынды сәләмәт тормошҡа йәлеп итеүсе физкультура уҡытыусыһы, үҙидара рәйесе Ислам Исламбаевтың тырышлығын билдәләмәү мөмкин түгел, — тине башҡарма комитет рәйесе Ирек Бикмәтов.
Республикала тәүгеләрҙән булып Сибайҙа башҡорт йәштәре ҡоролтайы ойошторолғайны. Уларға ла бар яҡлап ярҙам итте өлкән ҡоролтай ағзалары. Әйткәндәй, йәштәр ойошмаһының етәксеһе итеп был юлы БДУ-ның Сибай институтында декан урынбаҫары вазифаһында эшләгән Алик Алтыншин һайланды.
Рәсәйҙең Дәүләт Думаһы депутаты Зөһрә Рәхмәтуллина ҡаланың ағинәйҙәр ҡоро әүҙем эшләүен билдәләп үтте, улар тарафынан ойошторолған мөнәжәтселәр конкурсын республика кимәлендә лә үткәреү кәрәклеген билдәләне. Зөһрә Йыһанур ҡыҙы Бөтә донъя башҡорттары ҡоролтайының “Ал да нур сәс халҡыңа” миҙалын Сибай ҡалаһы хакимиәте башлығының социаль мәсьәләләр буйынса урынбаҫары Илгиз Хәйруллинға, ҡала башҡорттары ҡоролтайының башҡарма комитеты ағзаһы Зифа Сөләймәноваға тапшырҙы. Бөтә донъя башҡорттары ҡоролтайы Башҡарма комитетының маҡтау ҡағыҙы менән “Оптима-С” төҙөлөш ойошмаһы директоры Урал Йәнғазин, “РемСтрой-Центр” төҙөлөш ойошмаһы директоры Рафаил Исмәғилев, Арыҫлан Мөбәрәков исемендәге Сибай драма театрының художество етәксеһе Дамир Ғәлимов һәм башҡалар бүләкләнде.
Сығыштарҙан һуң ҡунаҡтар халыҡты ҡыҙыҡһындырған һорауҙарға яуап бирҙе. Мәҫәлән, Алтын ҡасабаһында мәктәптең булмауы, Төйәләҫтә юлдарҙың насарлығы, ҡайһы бер мәктәптәрҙә башҡорт кластары асылмауы һәм башҡа көнүҙәк мәсьәләләр күтәрелде.
Йыйындағы телмәрҙәрҙе, фекерҙәрҙе, тәҡдимдәрҙе иҫәпкә алып, заманында башҡорт милли үҙәгенең тырышлығы менән ойошторолған “Йәншишмә”не ҡайтанан үҙаллы гәзит итеүҙе һорап, республика етәксеһе Рөстәм Хәмитовҡа мөрәжәғәт ҡабул ителде. Шулай уҡ төбәктә берҙән-бер юғары уҡыу йорто булған Сибай институтына иғтибарҙы көсәйтергә, тарих, музыка, башҡорт теле, сит телдәр буйынса белгестәр әҙерләүҙе республика ҡаҙнаһы һәм башҡа фондтар аша финанслауҙы һорарға тигән тәҡдимдәр ҙә булды.
Халҡыбыҙ элек-электән хәл ителер мәсьәләләрҙе бергә туплап, ҙур йыйын үткәрер булған. Тап ошо ҡорҙа милләтебеҙ яҙмышы, халҡыбыҙҙың бөгөнгө көнитмеше, киләсәгебеҙ хәл ителгән. Ҡоролтайҙа ҡатнашыусылар тиҙҙән Өфөлә үтәсәк IV Бөтә донъя башҡорттары ҡоролтайы эшенә ҙур өмөттәр бағлап, делегаттар һайланы.