Ауыл малайҙары бәләкәйҙән ат ялына йәбешеп үҫә. Әммә бик һирәктәре генә быға тоғро ҡалып, ғүмерлек яҙмышын ат менән бәйләй. Мәҫәлән, Әхмәр ауылында йәшәгән Альберт Ғафаров – тап шундайҙарҙың береһе. Бала саҡтан йылҡы малы ҡураһынан алыҫ йөрөмәй ул: ҡолондарҙы иркәләү, уларҙы ашатыу, эйәргә атланыу өсөн йәнен дә бирергә әҙер малайҙы ат ҡараусылар ситкә типмәй. Атаһы Баймөхәмәт Ғафаровтың да оҙаҡ йылдар ошо йүнәлештә эшләүе егет өсөн бигерәк ҡулай була. Бала сағы ошолай үтһә, бөгөн ул үҙе йылҡы үрсетә, ауыл халҡының һауын бейәләрен көтә, иң мөһиме – халҡыбыҙҙың онотола барған кәсебен тергеҙеп, ҡамыт-дуға эшләү менән шөғөлләнә.
– Элек совхозда йылҡы малы күп ине. Атайым йүгә­нен, дилбегәһен, ҡамыт-дуғаһын, арба-санаһын үҙе эшләй торғайны, заказдар ҙа ҡабул итте. Һуңғараҡ хужалыҡтарҙа ат һаны аҙайҙы, шуға күрә ихтыяж да кәмене. Әле ҡайтанан йылҡысылыҡ менән шөғөл­ләнеүселәр арта, ҡамыт-дуға бик кәрәк. Ошоға тиклем атайым яһаған әй­бер­ҙәрҙе ҡулланһам, улар­ҙың күптәре туҙып, эш­лектән сыҡты. “Ниңә үҙемә булышып ҡара­маҫҡа?” – тип уйлап, йүгән, ышлыя, дил­бегә эшләп ҡарарға булдым. Килеп сыҡ­ты! Кәрәкле әйберҙәрҙе Баймаҡтағы быйма баҫыу цехынан алдым, тик улар үтә ҡыйбат. Әлегә һатыуға сығарыу үҙ-үҙен аҡламай, – ти оҫта.
Йылҡы үрсеткән һәр ху­жалыҡта тиерлек ҡулла­нылған был кәрәк-яраҡты яһау өсөн оҫталыҡ ҡына түгел, етеҙлек, түҙемлек, оһоллоҡ һәм ваҡыт та талап ителә. Бауырлыҡ, йүгән, дилбегә, арҡалыҡ, ауыҙлыҡ, ышлыя... Ә бына дуға өсөн ағасты (муйылдан) кипте­реүгә генә ярты йыл самаһы ваҡыт үтә. Һәр нәмәнең үҙ сере, үҙ мәшәҡәте, әммә бала саҡтан мал йәнле геройым һәр эште күңел биреп башҡара. “Аттарҙы барыһынан да яҡыныраҡ күрәм мин”, – тине уйынлы-ысынлы Альберт Ғафаров.
Әйткәндәй, күптән түгел Баймаҡ районында үткән “Башҡорт аты” этнофес­тивалендә Альберт Ғафа­ров үҙе эшләгән әйберҙәрен күргәҙмәгә ҡуйҙы. Тап ул яһаған сбруйҙар менән ҡыҙыҡ­һыныусылар күп бул­ды, заказ биреүселәр ҙә табылды. Кем белә, бәлки, килә­сәктә электән ҡалған кәсеп-шөғөлдәрҙе тер­геҙеү­селәргә ниндәйҙер кимәлдә дәүләт ярҙамы булдырылып, улар яратҡан эшенә ныҡлап тотонор. Юғиһә Әхмәр уҙаманы кеүек оҫ­таларға тәжрибәһе менән уртаҡлашырлыҡ кеше та­былмаҫ.