Моданың үҙгәрмәй торғаны юҡ. Ул йыл һайын айырыуса ҡатын-ҡыҙҙы яңыса тегелгән, зауыҡлы төҫтәге, билдәле фасондағы кейем-һалым һәм башҡа кәрәк-яраҡ эҙләтеп, магазиндар буйлап йүгертә. Быныһы – бер, әммә үҙ стилеңде эҙләп, күңел торошоңа, эске донъяңа тап килгән әйбер табып кейеү, онотолған күлдәк-салбарға яңы һулыш өрөү кеүек үҙенсәлекле тәжрибәләр яһау – ҙур кинәнес, нескә заттың үҫеше өсөн ҡулай аҙым да. 2015-2016 йылдарҙа көҙгө-ҡышҡы мода тап ошондай асыштар, шәхси ҡараш, ижад өсөн киң мөмкинлектәр аса. Бында ҡәтғи талап, ҡанундар юҡ – бер нисә кәңәшкә ҡолаҡ һалыу ҙа етә.

Богема ҡупшылығы. Бохо стиле менән танышһығыҙҙыр? Төрлө-төрлө элементтарҙың тәбиғи, әммә затлы, һөҙөмтәле рәүештә бер-береһенә тап килеүе. Күп ҡатлы аксессуарҙар, үҙенсәлекле итәк, еңел күлдәк һәм киң блузаларҙан барлыҡҡа килә ул. Көҙгө, ҡышҡы мода өсөн ошо стилдән дә ҡулайырағы юҡ, сөнки унда ҡәтғи талап, сик ҡаралмаған. Сағыу итәк менән тиренән тегелгән оҙон жилет, төҫлө салбар менән пэчворк тибындағы пальто, суҡлы кардиган менән күлдәк кейеп сыҡһағыҙ ҙа, отолмаҫһығыҙ. Бары тик этник стилдәге аксессуар өҫтәргә онотмағыҙ.
Япмалар. Киң, еңһеҙ, пончо стилендә тегелгән был өҫ кейеме модалы ғына түгел, уңайлы ла буласаҡ. Уның тығыҙ, йөндән йә еңел, плащ туҡыманан тегелеүе мөмкин. Бындай пальто-япманы киң салбар, ҡәләм, трапеция, годе һәм башҡа формалы итәк менән кейергә була. Барыһы ла өҫкө кейемдең оҙонлоғонан сығып һайлана.
Салбар. Көҙгө, ҡышҡы модала ошо кейемгә лә өҫтөнлөк бирелә. Бигерәк тә уның формаһы, фактураһы, ғөмүмән, ниндәй материалдан тегелеүе мөһим. Салбар менән өҫ кейемен һайлағанда, береһе сағыу, икенсеһе ябайыраҡ булһын.
Суҡлы кейем. Бохо, хиппи стилдәрен был үҙенсәлекһеҙ күҙ алдына килтереүе ҡыйын. Мода өҫкө кейемдә, аксессуарҙарҙа суҡтың булыуын талап итә.
Ялтырауыҡ, пайетка, алтын ялатылған туҡыма – былар һәммәһе лә 2015 – 2016 йылғы модала төплө урын алды, әммә әлегә страздар хупланмай, булһа ла – аяҡ кейемендә йә сумкаларҙа ғына.
Шаҡмаҡ. Көтөлгән көҙ, ҡыш миҙгелендә кейем өйҙәге ҡалын япмалар кеүек йылы һәм уңайлы булмаҡсы. Шуға күрә драплы пальтола эре шаҡмаҡлы биҙәк күреп аптырамағыҙ. Бәләкәйерәктәре салбар һәм жакеттарҙа, күлдәктәрҙә, аксессуарҙарҙа урын алған.

P.S. Мода ниндәй генә өлгөләр күрһәтһә лә, һәр гүзәл заттың үҙ стиле, кәүҙәһенә ярашлы кейем һайлау ҡағиҙәләре булырға тейеш. Бындай осраҡта йөҙ-ҡиәфәтегеҙ ипле, зауыҡлы һәм нәзәкәтле төҫ алыр.