Һүҙебеҙ — юлсылар хаҡында. Уларҙың хеҙмәте лә нәҡ табиптарҙыҡы һымаҡ – оло яуаплылыҡ һәм теүәллек талап итә. Әгәр ошо сифаттарға эйә түгелһең икән, был тармаҡта оҙаҡҡа ҡаласағыңа ышаныс юҡ. Шуныһы ҡыуаныслы: республикабыҙҙың ҡайһы тарафына сәфәр сыҡһаң да, көҙгөләй ялтырап ятҡан юлдарҙан елдерәһең. Баш ҡаланан әллә нисәмә саҡрымдағы теге йәки был төбәккә һис ниндәй мәшәҡәтһеҙ барып етеүгә күнегеп тә барабыҙ. Хәҙер соҡор-саҡырлы юлға зарланыу һүҙҙәрен йышыраҡ ҙур ҡалаларҙа ишетергә тура килә.
Күгәрсен яҡтарына юлланғанда ла, тыныс күңел менән сығаһың. Был төбәктең гүзәл тәбиғи ҡомартҡылары ла үҙенә йәлеп итә, шуға күрә сит тарафтарҙан килеүселәр йылдан-йыл күбәйә. Һәр кем юлдарҙың төҙөклөгөн, заман талаптарына яраҡлаштырылыуын күреп, юғары баһа бирә. Башҡаса булыуы мөмкин дә түгел, сөнки был яҡтарға юлы төшкәндәр теләгән еренә ваҡытында, бәлә-ҡазаһыҙ барып етһен өсөн тырыша ла инде Күгәрсен юл ремонтлау-төҙөү идаралығы хеҙмәткәрҙәре. Ә йөкмәтелгән бурыстары яуаплы, эш күләме ҙур. Мәҫәлән, улар ҡарамағына тапшырылған юлдарҙың оҙонлоғо 650 километрҙан ашыу тәшкил итә. Уның 400 саҡрымдан күберәге республика әһәмиәтендәге булһа, ҡалғаны – район ҡарамағында. Күгәрсен юл ремонтлау-төҙөү идаралығы хеҙмәтләндергән юлдарҙың оҙонлоғо буйынса республикала өсөнсө урынды биләүен иҫәпкә алһаң, эш күләменең ни ҡәҙәр ҙур булыуы күҙ алдына яҡшыраҡ баҫыр, моғайын. Магнитогорск – Ира маршруты буйлап сәфәр ҡылыусылар ҙа күгәрсендәрҙең хеҙмәтенән файҙалана. Әйткәндәй, 100 километрҙан ашыулыҡ был ара – уларҙың яуаплылығындағы иң оҙон юл.
Өр-яңы технологиялар буйынса асфальт һалырға ҡыйыу ынтылған һәм соҡор-саҡырлы урындарҙы ла заманға ярашлы итеүселәрҙең тырышлығы бушҡа түгел. Ҡар-буран, томан һәм яҙғы ташҡын тимәй, тәүлек әйләнәһенә эш урындарында булыуҙарының, үҙҙәренә беркетелгән биләмәне талапҡа ярашлы хеҙмәтләндереүҙәренең һөҙөмтәһе ыңғай. Мәҫәлән, быйыл туғыҙ айҙа 121,7 миллион һумлыҡ эш күләме атҡарылған, шуның 117 миллион һумын үҙ көстәре менән башҡарғандар. Йыл аҙағына тиклем был күрһәткесте 148 миллион һумға еткермәкселәр. Былтырғы кимәлгә өлгәшелмәһә лә, быйылғы йылдың үҙенсәлеген, йәғни көрсөктө иҫәпкә алғанда, ярайһы уҡ яҡшы күрһәткес. Бынан тыш, үҙ продукцияһын һатыуҙың һәм хеҙмәт күрһәтеүҙең йыллыҡ күләме 14 миллион һумдан ашыу тәшкил итәсәк. Ярай әле, ҡеүәтле техника ярҙамға килә. Уны ла әленән-әле яңыртып торорға кәрәк. Быйыл бер экскаватор алып ҡыуанғандар, ике “КамАЗ” автомашинаһына һәм бер тракторға капиталь ремонт яһалған. Ҡеүәтле техника эштең ырамлы барыуына булышлыҡ итә. Шуға ҡатмарлы участкаларҙа ла һынатмайҙар.
Коллектив иһә үҙ эшен яратып атҡарған һәм оло яуаплылыҡ тоя белгән 100-ҙән ашыу хеҙмәткәрҙән тупланған. Тағы шуныһы һөйөнөслө: барыһын да уртаҡ маҡсат берләштерә. Табышлы эшләгәс, юлсыларға иғтибар ҙур. Хаҡлы ялдағылар ҙа онотолмай, йәштәр ҙә ситтә ҡалмай, коллектив килешеүендә ҡаралған барлыҡ төр ярҙам да күрһәтелә. Байрамдар үтә, спорт сараларында әүҙем ҡатнашалар. Әйткәндәй, эшселәрҙең үҙҙәре хаҡында күрелгән хәстәрлеккә тырыш хеҙмәт менән яуап биреүенә күптән инанған идаралыҡ начальнигы Ринат Йәнбәтов.
Хәйер, Ринат Фәрих улына ябай хеҙмәт кешеһенең һөйөнөстәре лә, көйөнөстәре лә яҡшы таныш. Яҙмышын ошо предприятие менән бәйләүенә – 40 йылға яҡын. Шуға ла юлсыларҙың ауыр хеҙмәте һәм оҫталығы үҙ ваҡытында баһаланырға тейешлеген һәйбәт аңлай. Һөҙөмтәлә араларында Почет грамоталары һәм Маҡтау ҡағыҙҙары менән бүләкләнеүселәр байтаҡ. Атҡаҙанған төҙөүсе исемен йөрөтөүселәр ҙә бар. Мәҫәлән, Ю. Загородиев “Башҡортостандың атҡаҙанған транспорт хеҙмәткәре” тигән маҡтаулы исемде йөрөтә. Ринат Фәрих улы — атҡаҙанған төҙөүсе булыу менән бергә Салауат Юлаев ордены кавалеры ла. М. Ғиззәтуллин – Рәсәй кимәлендәге маҡтаулы водитель. Шулай уҡ Э. Кинйәбулатовтың хеҙмәте лә Башҡортостандың транспорт тармағында юғары баһаланған. Предприятиеның уңышлы эшләүе тап ошондай хеҙмәт оҫталарына бәйле. “Башкиравтодор” асыҡ акционерҙар йәмғиәтендә күгәрсендәрҙең һәр ваҡыт алдынғылар рәтендә булыуы шуны раҫлай ҙа.
Күгәрсен юл ремонтлау-төҙөү идаралығының табышлы эшләүе “Башкиравтодор” йәмғиәте һәм үҙҙәре өсөн генә файҙа түгел. Улар үҙ ваҡытында һәм тейешле күләмдә һалым күсереп барып, республика һәм район ҡаҙнаһын да тулыландырып торалар.
Һөнәри байрамдарын да, нигеҙҙә, эш урындарында ҡаршылай Күгәрсен оҫталары. Таҫмалай һуҙылып ятҡан, үҙенә саҡырып торған күҙ күреме етмәҫ юлдарҙа.