Республикала һуңғы йылдарҙа юл төҙөлөшөнә етди иғтибар бирелә. Төбәктең юл төҙөлөшө комплексын үҫтереүгә Бөрө юл төҙөү-ремонтлау идаралығы ла лайыҡлы өлөш индерә. Шуны ла әйтәйек: район республиканың төньяҡ һәм төньяҡ-көнсығыш төбәген баш ҡала менән тоташтыра. Шуға ла биләмә аша үткән юлдарға талаптар айырыуса юғары.

Юл төҙөү-ремонтлау идаралы­ғы хеҙ­мәткәрҙәре үҙҙәренә йөкмә­тел­гән бурысты ҙур яуаплылыҡ менән башҡара. Коллектив оҙаҡ йылдар дауамында “Башкиравтодор” асыҡ акционерҙар йәмғиә­тендә алдынғы филиалдарҙың береһе һанала. Предприятие эш­сән­дәре үҙҙәре ҡарамағындағы дөйөм файҙаланылыш­тағы 322,2 километр, шул иҫәптән 46,5 километр республика әһәмиәтендәге юл­дар­ҙы йыл әйләнәһендә ҡарау­лы тота, ремонт эштәре һәм яңы төҙөлөш башҡара.
Идаралыҡты башҡаларҙан айыр­малы иткән бер үҙенсәлекте билдәләп китеү урынлы. Респуб­ликаның юл хужалығы өсөн әһәмиәтле яңы башланғыстар, ал­дынғы технологиялар йыш ҡына ошонда тыуа. Әйтәйек, Бөрө ида­ралығы 2007 йылда республикала беренсе булып “Уралдортранс” проектлаусылары һәм Өфө дәүләт нефть техник университеты ғалимдары менән берлектә Бөрө — Яңы Биктимер автомобиль юлында, заманса конструкциялар ҡулланып, аркалы күпер төҙөп файҙаланыуға тапшырҙы. Артабан Өфө — Бөрө — Яңауыл автомобиль юлы төҙөлөшөндә тәүге­ләрҙән булып “стеклонит” заманса геотекстиль материалын уңышлы ҡулланыуға ирештеләр. Иртә яҙҙан ремонт эштәрендә һалҡын асфальт-бетон ҡатнашма­һы ҡулланыу технологияһы ла Бө­рө юлдарында баш­лан­ғыс алды. Бер нисә йыл элек Өфө — Бөрө — Яңауыл трассаһының Мишкә районы биләмәһе аша үткән өлөшөн­дә йәнә бер яңылыҡ уңышлы һы­налды: асфальт-бетон ҡатнаш­ма­һы составында яңы материал — махсус “ПАН сүсе” ҡулланып, тәжрибә үткәрҙеләр. 2012 йылда Борай — Иҫке Балтас — Ҡуйыҙа автомобиль юлында ла ремонт эштәрен яңы технология буйынса башҡарҙылар. Йәғни япма­ның тулы киңлегенә “техпол” туҡыл­ма­ған синтетик материалын файҙа­ландылар. Бөрө идаралығы тәү­ге­ләрҙән булып һынаған яңы технологик алымдар юлдар­ҙың сифатын яҡшыртыуға, уларҙың хеҙ­мәт итеү ваҡытын оҙайтырға булышлыҡ итә, иҡтисади яҡтан отошло.
Идаралыҡ хеҙмәткәрҙәре һәр заказды ҙур яуаплылыҡ менән ҡа­бул итеп, еренә еткереп башҡара. Улар рәтендә тиҫтәләр­сә кило­метр­ға һуҙылған яңы юлдар иҫәп­ләнә. Ағиҙел йылғаһы аша Бөрө районы менән ҡалаһын тоташтыр­ған күпергә кереү юлдарын да улар һалды. Был ҡала менән район араһында өҙлөкһөҙ юл хәрә­кәтен тәьмин итә.
Идаралыҡ тораҡ пункттарында юлдар төҙөү һәм ремонтлау буйынса ҡоласлы эш алып бара. Был йәһәттән һуңғы ваҡытта Иҫке Бурны, Иҫке Баҙан, Питяков, Калинники, Ҡуҙы ауылдарында байтаҡ юл яңыртылған. Булдыҡлы коллектив яҡын-тирәләге Тәтеш­ле, Асҡын, Борай, Мишкә, Нуриман, Ҡариҙел райондарында һәм баш ҡалабыҙ Өфөлә лә юл төҙө­лөшөндә күләмле эштәр башҡара.
Ағымдағы йылдың туғыҙ айын­да идаралыҡ 139,4 миллион һумлыҡ төҙөлөш-монтаж эштәре башҡарған. Өфө — Бөрө — Яңауыл трассаһында күләмле ремонт эштәре ғәмәлгә ашырылған.
Әлбиттә, коллективтың төп ғорурлығы — ауыр ҙа, маҡтаулы ла һөнәрҙе үҙ иткән булдыҡлы эшсәндәре. Предприятие үҙенең абруйлы хеҙмәт династиялары менән дан тота. Улар иҫәбендә — Абдуллиндар, Айдыбаевтар, Власовтар, Клоиминдар, Якимовтар, Хәтмуллиндар, Ря­бовтар, Стариковтар... Водитель Баш­ҡортостан­дың атҡаҙанған транспорт хеҙ­мәт­- кәре Александр Климин, машинист Александр Самойлов, Рәсәйҙең транспорт министрының Рәхмәт хатына лайыҡ Сергей Стариков, Башҡортостандың Маҡтау грамо­таһы менән бүләкләнгән Сергей Айдыбаев, баш хисапсы Фәнисә Ғилфанова, производство-техник бүлеге етәксеһе Светлана Дойникова күптәргә үрнәк булып тора.
Етәкселәрҙән дә уңған коллектив. Идаралыҡҡа байтаҡ йылдар идара иткән, уны “Башкиравтодор” системаһында әй­ҙәүселәр иҫәбенә сығарған Фаат Хәлитов ике йыл элек етәкселек вазифаһын Данис Шакировҡа тапшырған. Данис Ға­риф улы был коллективта 36 йыл эшләп, мас­тер­ҙан етәксе дәрәжә­һенә күтәрелгән. Хеҙмәт уңыш­тары өсөн Башҡортостан Респуб­­ликаһының Почет гра­мо­таһы менән бүләкләнгән. Ул коллективтың күркәм традицияларын ышаныслы дауам итә.