Теләгән бер кеше уҡытыусы була алмай. Һәр саҡ йәш быуын мәнфәғәтендә хеҙмәт итеү, киләсәкте ҡайғыртыу, камиллыҡҡа ынтылыу, ныҡышмалылыҡ, үҙ-үҙеңә, башҡаларға талапсанлыҡ... Остаздарыбыҙға хас ошо сифаттар – тормошобоҙҙоң төп терәге.

Баш ҡалабыҙҙағы башҡорт гимназиялары эшмәкәрлеген байҡағанда, был белем усаҡтарын күпселек осраҡ­та республикабыҙҙың алыҫ ауылдарынан сыҡҡан милләттәштәребеҙ тотоп торғанына инанабыҙ. Остаздарҙы ту­ған телгә сикһеҙ һөйөү, уның киләсәге өсөн янып көйөү берләштерә. Араларында 140-сы башҡорт гимназияһы­нан Миләүшә Мәжитова ла бар. Әбйәлил районы ҡыҙы бында 20 йылға яҡын башҡорт теле һәм әҙәбиәтен уҡыта.
– Ишле ғаиләлә өлкән бала булғас, бәләкәйҙән туғандарым өсөн ҙур яуап­лылыҡ тойоп үҫтем, – ти педагог. – Шул саҡта уҡ етдилегем, талапсан­лығым күренгәндер инде, “Уҡытыусы булырһың һин”, – ти торғайны өлкән­дәр. Әйткәндәре раҫ килде.
Миләүшә ауыл мәктәбенән һуң Баш­ҡорт дәүләт педагогия университетында белем ала. Уҡыған сағында уҡ төҙөгән дәрес программалары педагогтар тарафынан юғары баһалана, ҡайһы бер хеҙмәттәре ил кимәлендәге конкурстарҙа тәүге урынға лайыҡ була. Уңған, булдыҡлы студентты остазда­ры үҙ янында ҡалдырырға тырышһа ла, Миләүшә Рафиҡ ҡыҙының мәктәп­тә уҡытыу теләге еңеп сыға. Шул мәл­дән алып бөгөнгә ҡәҙәр гимназияла арымай-талмай хеҙмәт күрһәтә ул. Намыҫлы эше өсөн бихисап маҡтау ҡағыҙына, грамоталарға лайыҡ уҡы­тыу­сы һәр саҡ баҫалҡылыҡ, ҙур тырышлыҡ менән изге бурысын үтәүҙе дауам итә.
– Заман балалары башҡараҡ, күп нәмәгә битараф, тип зарланыуҙы өл­кән быуын вәкилдәренән, хатта ҡайһы бер педагогтарҙан ишетергә тура килә, – ти Миләүшә Рафиҡ ҡыҙы. – Был фе­кер менән килешә алмайым. Бөгөнгө балалар бит ҡайҙандыр ситтән килмә­гән, ә үҙебеҙҙеке. Уларҙың күңел тө­бөн­дә нимә ятҡанын аңларға ты­ры­шырға, йышыраҡ һөйләшергә, иң мөһиме – яратыуыбыҙҙы белдереп, раҫлап торорға тейешбеҙ. Бала үтә һиҙгер: ихлас хәстәрлекте тиҙ тоя һәм ата-әсәһенә, уҡытыусыһына, йәм­ғиәт­кә шундай уҡ мөнәсәбәт менән яуап бирә.
Минеңсә, алған ғилеме уҡыусыға файҙа килтерергә тейеш. Ә беҙ­ҙең эшмәкәрлек республикала баш­ҡорт теленең ҡулланылыу даирәһенә туранан-тура бәйле. Әлегә хеҙмәтебеҙ күп осраҡта мәктәп менән генә сикләнә кеүек. Башҡорт телен дәүләт ста­тусын­да уҡытыу колледждар, юғары уҡыу йорттары программаларына ла индерелһә, уҡыусыларыбыҙ дәресте ихласыраҡ өйрәнер, ҡаҙаныштарыбыҙ артыр ине.

.