Бөгөнгө йәшәйешебеҙҙе энергетика хеҙмәтенән башҡа күҙ алдына килтереү мөмкин түгел. Тармаҡ хеҙмәткәрҙәре алдына энергетика селтәрен тағы ла киңәйтеү, ошо өлкәләге хеҙмәттәрҙе тотороҡло һәм хәүефһеҙ итеү бурысы билдәләнгән. Нефтекама район-ара электр селтәрҙәре предприятиеһы уларҙы уңышлы тормошҡа ашырыуға лайыҡлы өлөш индерә.


Ул бынан ярты быуат самаһы элек төньяҡ райондарҙы хеҙмәтлән­дереү­се электр селтәрҙәре предприятиеһы булараҡ төҙөлә. Тиҫтә йыл эсендә ул төр­лө үҙгәрештәр кисерә. 2005 йылдан башлап Нефтекама райо­нын­дағы электр селтәрҙәре пред­прия­тиеһы итеп үҙгәртелә. Шулай ҙа уның тәғәйенләнеше бер үк булып ҡала. Предприятие ҡулла­ныусыларға электр энергияһы тапшырыу өсөн яуаплы. Ул электр энер­гияһын һатып алыу һәм һатыу өлкәһендә төбәк селтәр ойошмаһы булараҡ сығыш яһай. Энергия менән тәьмин итеүсе ойошма (ул һатып алған йә иһә үҙе етештергән энергияны бирә) һәм физик, юридик бе­рәмектәр араһында аралашсы булып тора. Ҡулланыусыларға иң яҡын торғанға, уларҙың хеҙмәтенә талаптар айырыуса юғары.
Предприятиеның төп заказсылары — Нефтекама хакимиәте, коммуналь комплекс һәм сәнәғәт предприятиелары. Предприятиеның производство базаһы 22 мең квадрат метрҙан күберәк майҙанды биләй. Уның ҡарамағында барлығы 87,9 километр оҙонлоҡтағы һауа һәм кабель электр тап­шырыу линиялары, ғөмүмән, ҡеүәте 115790 кВФ булған 2013 транс­форматорҙар ярҙамсы стан­ция­һы иҫәпләнә. Бынан тыш, килешеүҙәр буйынса ун биш километрҙан ашыу электр тапшырыу линияларын һәм 76 трансформатор ярҙамсы станцияһын хеҙмәтләндерәләр. Әлеге һандарҙан сығып, коллективтың эш даирәһен күҙ алдына килтереп була. Эштәрҙең тулы циклын юғары дәрәжәлә теүәл­лек менән тәьмин итеү өсөн һауа линияһы участкалары, электр лабо­раторияһы һәм кабель хужалығы, трансформатор ярҙамсы станциялары һәм оператив диспетчерлыҡ хеҙмәте, электр энергияһын һатыу, механизация һәм автотранспорт һ.б. хеҙмәттәр ойошторолған. Уларҙың һәр ҡайһыһы сәғәт теүәллегендә эш­ләй, сөнки производствоның үҙен­сәлектәре шуны талап итә.
Коллективта ике йөҙҙән ашыу кеше эшләй. Һәр ҡайһыһы — белем­ле һәм тәжрибәле белгес, үҙ эшенең оҫтаһы. Энергетиктар араһында бил­дәле хеҙмәт династиялары бар. Рябковтар, Палаошевтар, Закировтар һәм Сәләховтарҙың бер нисә быуыны намыҫлы хеҙмәт һала. Пред­прия­тиеға байтаҡ йылдар етәкселек иткән атҡаҙанған энергетик Вениамин Коржовты ҙур ихтирам менән телгә ала хеҙмәттәштәре.
Энергетиктарға ял да, байрамдар ҙа юҡ. Селтәрҙе эксплуатациялау — өҙлөкһөҙ мәшғүллек. Ҡышҡы осорға әҙерлекте лә йыл дауамында алып баралар. Селтәрҙәренең торошо, трансформатор ярҙамсы станция­ларының көйлө эшләүе алда торған йылытыу миҙгеленә ышаныслы аяҡ баҫырға мөмкинлек бирә.
Һуңғы осорҙа предприятиела производствоны яңыртыуға етди иғтибар бирелә. Был йүнәлештәге эштәр пред­приятиеның үҙ финанс сығым­дары иҫәбенә башҡарыла. Әйтәйек, электр үткәргестәрҙе, заманса изоляциялы терегөмөшлө лампалы яҡ­тырт­ҡыстарҙы һуңғы технология буйынса эшләнгәндәренә алыштыралар. Энергетик тикшереүҙәр үткәр­гән­дән һуң энергияны һаҡлауға йү­нәл­телгән һәм яҡын киләсәктә ғәмәлгә ашыраһы мөһим саралар ҙа билдәләнгән.
Нефтекама район-ара электр сел­тәрҙәре предприятиеһы энергетика тармағында тотороҡло эшләй, заман­са технологиялар индереү һәм башҡа яңылыҡтар буйынса алдынғы иҫәптә тора. Был күрһәткестәр — пред­приятие етәксеһе Шамил Хәйрул­линдың етәкселек эшмәкәрлегенә аныҡ баһа. Сөнки һәр эштең һөҙөм­тәһе уның нисек ойошторолоуына бәйле.
— Уңған, булдыҡлы етәксе менән эш уңышлы бара, — ти хеҙмәт­тәштәре Шамил Фәйзи улы хаҡында ихлас ғорурлыҡ менән.