Ата-әсәләр әүҙемерәк булһын

Дүртөйлө районында Башҡортостан Ректорҙар советының күсмә ултырышы үтте. Юғары уҡыу йорттары менән осрашыуға педагогтар, ата-әсәләр комитеттары етәкселәре, студенттарҙың ата-әсәләре, йәштәр килде.
Өфө дәүләт авиация техник университеты ректоры, Ректорҙар советы рәйесе Морат Ғөзәйеров студенттарға профессиональ йүнәлеш биреү эшен әүҙемләштереү кәрәклеген билдәләне, үҙе етәкселек иткән юғары уҡыу йорто менән таныштырҙы. Шулай уҡ осрашыуҙа инглиз телен өйрәнеү, беренсе курс студенттары белемен тест ярҙамында тикшереү, республика райондарын йәш белгестәр менән тәьмин итеү, уҡыу йорттары етәкселеге менән студенттарҙың ата-әсәләре араһында бәйләнеште нығытыу кеүек мәсьәләләр тикшерелде.


Малдың иҫәбе теүәл

Бәләбәй районының К. Иванов исемендәге ауыл хужалығы предприятиеһында заман технологияларын әүҙем ҡулланалар.
Бындағы һыйырҙарҙың һәр ҡайһыһына электрон чип ҡуйылған һәм малдарҙың шәхси идентефикация номеры билдәләнгән. Чип малдың тиреһе аҫтына беркетелә, ул уның тоҡомо, ауырлығы, исеме, йәше, күпме һөт биреүе хаҡында һәм башҡа бик күп мәғлүмәттәр һаҡлай, нәҫелен барларға ла булышлыҡ итә. Яңы технология мал иҫәбен теүәл алып барыуҙа ла алыштырғыһыҙ.


Иман нурын таратып

Яңауылда Мөхәммәт пәйғәмбәрҙең тыуған көнөнә арналған Мәүлит байрамы билдәләнде.
Сараны урындағы имам-мөхтәсиб Фәһим Вәлиев район етәкселеге менән берлектә ойошторған, унда Башҡортостан Диниә назараты рәйесе урынбаҫары Руслан Саяхов, М. Солтанова исемендәге Ислам колледжы уҡытыусыһы, шәйех Абдразаҡ Нуретдин ҡатнашты. Байрамды урындағы һәүәҫкәр артистарҙың сығышы биҙәне.


Тапҡырҙар көс һынашты

Ҡала мәҙәниәт һарайында “Шаяндар һәм тапҡырҙар клубы-2012” Ишембай лигаһы юбилей уйындарының сирек финалы үтте.
Һигеҙ команда көс һынашты, уларҙың бишәүһе – Өфө дәүләт авиация техник университетының Ишембай филиалы, урындағы нефть колледжы, Ә. Вәлиди исемендәге 2-се һәм 1-се гимназиялар, ҡаланың Көньяҡ биҫтәһе командалары — ярым финалға сыҡты.


Етәкселәр спорт менән дуҫ

Учалыла көньяҡ-көнсығыш райондарҙың хакимиәттәре командалары араһында ҡышҡы спартакиада үтте. Бәйгелә Учалы, Әбйәлил, Бөрйән, Ейәнсура, Йылайыр, Хәйбулла, Баймаҡ райондары һәм Сибай ҡалаһы вәкилдәре ҡатнашты.
Байрам волейбол майҙансығында башланды, барлыҡ командалар ҙа лайыҡлы сығыш яһаны. Финалға учалылар һәм баймаҡтар сыҡты, көсөргәнешле уйын хужаларҙың еңеүе менән тамамланды. Атыш бәйгеһендә лә учалыларға етеүсе табылманы, әбйәлилдәр — икенсе, ейәнсуралар өсөнсө урынды алды. "Дельфа" бассейнында иһә йөҙөүселәр ярышты. Һөҙөмтәлә Әбйәлил районы вәкилдәре еңеү яуланы. Дөйөм алғанда Учалы районы хакимиәте вәкилдәре беренсе урынға сыҡты, Әбйәлил һәм Баймаҡ райондары командалары ла призлы урындар яулап ҡайтты.


Беҙҙекеләр һынатмай!

Шәрип ауылында райондың хоккей командалары араһында ярым финал уйындары үтте, унда Шәрип, Иҫке Ҡамышлы, Иҫке Туҡмаҡлы ауылдарының спорт һөйөүселәре көс һынашты.
Бәйгелә Шәрип командаһы еңеү яуланы. Команда капитаны Нияз Ғөбәйҙуллин, ҡапҡасы Денис Солтанов айырыуса таҫыллыҡ күрһәтте. Тиҙҙән шәриптәр район үҙәгендә үтәсәк финал уйындарында көс һынаясаҡ.


Вәт һиңә ҡунаҡ!

Октябрьский ҡалаһында 45 йәшлек такси йөрөтөүсе 16 йәшлек ҡыҙҙы ҡунаҡҡа алып ҡайтҡан.
Табын ҡорғандар, хужа, тиҙ арала иҫереп, йоҡлап киткән. Ҡыҙ, был хәлде файҙаланып, фатирға өс дуҫын саҡырған. Әшнәләрҙең күҙе компьютерға төшкән. Уны алып сығып китәм генә тигәндә, хужа уянған. Йәштәр уны туҡмап ташлаған. Ҡунаҡ ҡыҙ автомобиль асҡысын да үҙе менән алған.
Таксист полиция хеҙмәткәрҙәренә мөрәжәғәт иткән. Енәйәтселәр тиҙ арала тотолған. Бәлиғ булмаған ҡыҙға ҡарата енәйәт эше асыу-асмау мәсьәләһе әлегә хәл ителмәгән, уның дуҫтары иһә яуаплылыҡтан ҡаса алмаясаҡ.